Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  October 2017

Unenesko Ukwiza na “Mtende Chara, Kweni Lupanga”

Unenesko Ukwiza na “Mtende Chara, Kweni Lupanga”

“Mungaghanaghananga kuti nkhizira kuzakaŵika mtende pa charu chapasi, nkhizira kuzakaŵikapo mtende chara, kweni lupanga.”—MAT. 10:34.

SUMU: 125, 135

1, 2. (a) Kasi tingaŵa na mtende wuli? (b) Ntchivichi chikutitondeska kusanga mtende wenecho? (Wonani chithuzithuzi chakwamba.)

TOSE tikukhumba kukhala mwamtende, kwambura kufipa mtima na chilichose. Tikumuwonga chomene Yehova pakutipa “mtende wa Chiuta.” Mtende uwu ukutizikiska mtima na kuvikilira maghanoghano ghithu kuti tijipulikenge makora. (Fil. 4:6, 7) Pakuti tili kujipeleka kwa Yehova, tikukondwa kuŵa “pamtende na Chiuta.” Tikuŵa paubwezi na iyo.—Rom. 5:1.

2 Kweni nyengo yakuti Chiuta wize na mtende pa charu chose yindakwane. Mu mazuŵa ghaumaliro agha, ŵanthu ŵakutemwa kwambana. Ndipo ŵanandi mbakali. (2 Tim. 3:1-4) Ise pakuŵa Ŵakhristu, tikwenera kurwa nkhondo yauzimu, kulimbana na Satana na visambizgo vyake vyautesi. (2 Kor. 10:4, 5) Ŵabali ŵithu awo Mbakaboni yayi ndiwo ŵangatisoŵeska chomene mtende. Ŵanyake ŵangatinena chifukwa cha ivyo tikugomezga. Ŵangati tikwambiska kuti tileke kukolerana pa nyumba. Ŵangatiwofya kuti ubali umarenge para tikuleka yayi ivyo tikugomezga. Kasi tikwenera kuŵawona wuli ŵabali ŵithu awo ŵakutisuska? Kasi tingachita wuli mwamahara kuti paŵe mtende?

 KASI TIKWENERA KUŴAWONA WULI ŴABALI ŴITHU AWO ŴAKUTISUSKA?

3, 4. (a) Ntchivichi chikuchitika para munthu wamba kulondezga ivyo Yesu wakasambizganga? (b) Mphauli apo chikuŵa chakusuzga chomene kulondezga Yesu?

3 Yesu wakamanyanga kuti ivyo wakasambizganga vizamugaŵaniska ŵanthu. Wakamanyangaso kuti awo ŵakumulondezga ŵakwenera kuŵa na chikanga chifukwa ŵanthu ŵaŵasuskenge. Mtende mungaŵavya mu banja para munyake wamba unenesko. Yesu wakati: “Mungaghanaghananga kuti nkhizira kuzakaŵika mtende pa charu chapasi, nkhizira kuzakaŵikapo mtende chara, kweni lupanga. Chifukwa nkhizira kuzakapatura mwana mwanalume na awiske, mwana msungwana na anyina, mkamwana na nyinavyara. Ŵalwani ŵa munthu ŵazamuŵa ŵanthu ŵamunyumba yake.”—Mat. 10:34-36.

4 Yesu wakati: “Mungaghanaghananga kuti nkhizira kuzakaŵika mtende pa charu chapasi.” Iyo wakang’anamuranga kuti awo ŵakumulondezga, ŵakwenera kumanya kuti ŵakumanenge na masuzgo. Ŵanthu ŵangaleka kukolerana chifukwa cha uthenga wake. Yesu wakakhumbanga kupharazga uthenga wa Chiuta waunenesko. Wakakhumbanga kuti ŵanthu ŵaleke kukolerana yayi. (Yoh. 18:37) Kweni chikuŵa chakusuzga chomene kulondezga ivyo Yesu wakasambizganga para mubwezi wapamtima, panji ŵabali ŵako pa nyumba ŵakana unenesko.

5. Kasi awo ŵakulondezga Yesu ŵakukumana na masuzgo wuli?

5 Yesu wakati para munthu wamba kumulondezga, ŵabali ŵake ŵazamwamba kumususka. Kweni wakati wakwenera kuzizipizga. (Mat. 10:38) Kuti ŵasambiri ŵakondweske Khristu, ŵakazizipizganga para ŵanthu ŵakuŵanena, panji para ŵabali ŵawo ŵamunyumba yimoza ŵaŵakana. Kweni ŵakasanga vinandi chomene kuluska ivyo ŵakataya.—Ŵerengani Mariko 10:29, 30.

6. Kasi tikwenera kukumbuka vichi para ŵabali ŵithu ŵakutikanira kusopa Yehova?

6 Para ŵabali ŵithu ŵakutikanira kusopa Yehova, tikulutilira kuŵatemwa. Kweni tikwenera kukumbuka kuti chakwamba tikwenera kutemwa chomene Chiuta na Khristu. (Mat. 10:37) Kweniso tikwenera kukumbuka kuti Satana wayezgeyezgenge kutipusika kuti titemwenge chomene ŵamubanja lithu na kuleka kugomezgeka kwa Yehova. Tiyeni tiwone masuzgo agho tingakumana nagho chifukwa cha kususkika na ŵamubanja lithu. Kweniso ivyo tingachita kuti tilutilire kuzizipizga.

MFUMU PANJI MUWOLI UYO NI KABONI YAYI

7. Kasi awo munyawo wamunthengwa ni Kaboni wa Yehova yayi ŵakwenera kuchita wuli?

7 Baibolo likuchenjezga awo ŵakunjira mu nthengwa kuti “ŵaŵenge na suzgo mu thupi lawo.” (1 Kor. 7:28) Para munyinu wamunthengwa ni Kaboni yayi, mungasuzgika chomene maghanoghano kweniso kwenjerwa. Kweni chakuzirwa ntchakuti mukwenera kuwona vinthu nga umo Yehova wakuviwonera. Para munyinu wakukhumba yayi kulondezga Khristu, palije chifukwa chakupatukirana panji kumazgira nthengwa. (1 Kor. 7:12-16) Nangauli mfumu uyo ni Kaboni yayi wangalongozga yayi vinthu vyauzimu, kweni mukwenera kumuchindika chifukwa ni mutu wa banja. Kweniso mfumu uyo muwoli wake ni Kaboni yayi, wakwenera kumutemwa kufumira pasi pamtima na kumupwelelera.—Efe. 5:22, 23, 28, 29.

8. Kasi mungajifumba mafumbo wuli para munyinu wamunthengwa wakukhumba kuti muchepeskeko nyengo yakuchitira vinthu vyauzimu?

8 Kasi mungachita wuli para munyinu wamunthengwa uyo ni Kaboni yayi wakukhumba kuti muchepeskeko nyengo yakuchitira vinthu vyauzimu? Mwanalume munyake wakaphalira muwoli wake uyo ni Kaboni kuti mazuŵa ghanyake wangapharazganga yayi. Usange namwe vikumuchitikirani, jifumbani kuti: ‘Kasi munyane wakunikanizga kusopa Chiuta? Para zgoro ndakuti yayi, kasi ningachita ivyo munyane  wakukhumba?’ Mahara ghangamovwirani kuti muleke kukangana pa vinthu vya zii.—Fil. 4:5.

9. Kasi Ŵakhristu ŵangasambizga wuli ŵana ŵawo kuti ŵachindikenge mupapi uyo ni Kaboni yayi?

9 Vikusuzga chomene kusambizga makora ŵana para munyinu ni Kaboni yayi. Mwachiyelezgero, mukwenera kusambizga ŵana ŵinu kuti ŵapulikirenge dango la mu Baibolo lakuti: “Chindika awuso na anyoko.” (Efe. 6:1-3) Kweni mungachita wuli para munyinu wakulondezga yayi fundo za mu Baibolo? Mukwenera kumuchindika kuti ŵana ŵinu ŵasambireko kwa imwe. Mughanaghanirenge viwemi ivyo munyinu wakuchita makora na kumuwonga. Lekani kuyowoya viheni vya munyinu pamaso pa ŵana ŵinu. Kweni ŵaphalirani ŵana ŵinu kuti munthu waliyose wakwenera kusankha yekha kuteŵetera Yehova panji yayi. Nkharo yiwemi ya ŵana ŵinu yingawovwira munyinu kuti wasambire unenesko.

Sambizgani ŵana ŵinu unenesko para mwaŵi wasangika (Wonani ndime 10)

10. Kasi mungasambizga wuli ŵana ŵinu Baibolo para munyinu wamunthengwa ni Kaboni yayi?

10 Nyengo zinyake munyinu uyo ni Kaboni yayi wangakhumba kuti ŵana ŵachitengeko vikondwelero ivyo Baibolo likukana. Panji wangakhumba kuti ŵasambirenge visambizgo vyautesi. Ŵafumu ŵanyake awo Mbakaboni yayi ŵangakanizga muwoli wawo uyo ni Kaboni kuti wasambizgenge ŵana Baibolo. Nangauli ndimo vingaŵira, muwoli uyo ni Kaboni wakwenera kuchita chilichose icho wangafiska kuti wasambizge ŵana unenesko. (Mil. 16:1; 2 Tim. 3:14, 15) Vingachitika kuti mfumu wangakanizga muwoli wake uyo ni Kaboni kuti wasambirenge na ŵana ŵachoko, panji kuti waleke kuluta nawo ku maungano ghithu. Nangauli mfumu wake wangamukanizga, kweni wakwenera kulutilira kusambizga ŵana para mwaŵi wasangika. Ivi vingawovwira kuti ŵana ŵaŵe na nkharo yiwemi kweniso  ŵamanye Yehova. (Mil. 4:19, 20) Paumaliro ŵana ŵazamusankha ŵekha kuti ŵasope Yehova panji yayi.—Doto. 30:19, 20. *

PARA ŴABALI ŴINU ŴAKUMUKANIZGANI UNENESKO

11. Ntchivichi chingapangiska kuti tileke kuŵa pamtende na ŵabali ŵithu awo Mbakaboni yayi?

11 Vingachitika kuti pakwamba tikaŵaphalira yayi ŵabali ŵithu kuti tikuwungana na Ŵakaboni ŵa Yehova. Kweni apo chipulikano chithu chikakuranga, tikawona kuti ntchiwemi kuŵaphalira ivyo tikugomezga. (Mrk. 8:38) Usange mwamba kukumana na masuzgo chifukwa chakuti mukaŵaphalira kuti ndimwe Kaboni, wonani vinyake ivyo mungachita kuti muŵe nawo pamtende na kulutilira kugomezgeka kwa Yehova.

12. Chifukwa wuli ŵabali ŵithu awo Mbakaboni yayi ŵangatikanira unenesko? Kweni tingalongora wuli kuti tikuŵaghanaghanira?

12 Ŵapulikiskani ŵabali ŵinu awo Mbakaboni yayi. Ise tikukondwa chomene kuti tasambira unenesko. Kweni ŵabali ŵithu ŵangawona nga kuti ŵanthu ŵatenda pasi, panji tanjira mpingo wambura kumanyikwa makora. Ŵangawona nga taleka kuŵatemwa chifukwa taleka kuchitira nawo lumoza vikondwelero. Nyengo zinyake ŵangawopa kuti chinthu chinyake chiheni chizamutichitikira para tafwa. Tikwenera kuŵapulikiska na kuŵategherezga chomene kuti timanye ivyo ŵakufipa navyo mtima. (Zinth. 20:5) Mpositole Paulosi wakayezgayezganga chomene kuti wapulikiske “ŵanthu ŵa mitundu yose,” kuti waŵapharazgire makani ghawemi. Nase vingatovwira para tingachita nga ni Paulosi.—1 Kor. 9:19-23.

13. Kasi tikwenera kuyowoya wuli na ŵabali ŵithu awo Mbakaboni yayi?

13 Yowoyani mwakuzika. Baibolo likuti: “Ivyo mukuyowoya viŵenge vyakukondweska nyengo zose.” (Kol. 4:6) Tikwenera kumupempha Yehova kuti watovwire na mzimu wake utuŵa kuti tilongorenge vipambi vya mzimu para tikuyowoya na ŵabali ŵithu. Tikwenera yayi kususka waka chilichose icho ŵakuyowoya chakukhwaskana na chisopa chawo chautesi. Para ŵatiyowoyera mazgu ghakulasa panji ŵatichitira vinthu viheni, tikwenera kuchita nga mbapositole. Paulosi wakalemba kuti: “Para ŵakutituka, tikuŵatumbika. Para ŵakutitambuzga, tikuzizipizga. Para ŵakutinena, tikuŵazgora mwakuzika.”—1 Kor. 4:12, 13.

14. Chifukwa wuli tikwenera kuŵa na nkharo yiwemi?

14 Ŵani na nkharo yiwemi. Kuyowoya mwakuzika vikovwira chomene para ŵabali ŵithu ŵakutisuska. Kweni nkharo yithu yiwemi yikuluska ivyo tikuyowoya. (Ŵerengani 1 Petrosi 3:1, 2, 16.) Ivyo imwe mukuchita vilongore ŵabali ŵinu ŵakuthupi kuti Ŵakaboni ŵa Yehova ŵakukondwa mu nthengwa, ŵakupwelelera makora ŵana ŵawo, ŵakuchita viheni yayi, ŵali na nkharo yiwemi, kweniso ŵakukhala umoyo wakukondweska. Nangauli ŵabali ŵithu ŵangakana kusambira unenesko, kweni tiŵenge ŵakukondwa para tikuchita vinthu ivyo Yehova wakukhumba.

15. Kasi tinganozgekera wuli kuti tileke kugazgana na ŵabali ŵithu nkhani za chisopa?

15 Nozgekerani. Ghanaghanirani ivyo vingapangiska kuti muleke kukolerana na ŵabali ŵinu. Kweniso manyani umo mungamazgira mphindano. (Zinth. 12:16, 23) Mudumbu munyake wa ku Australia wakati: “Adadavyara ŵakasuskanga chomene unenesko. Pambere tindalute kukaŵawona, ine na mfumu wane tikalombanga dankha Yehova kuti watovwire kuti tikazgore mwalusungu para ŵakwiya. Tikapangananga nkhani izo tamuyowoya ndipo ivi vikawovwiranga kuti tichezge makora. Tikaŵikirangathu utali wa nyengo iyo tamuchezgera nawo. Ivi vikawovwiranga kuti tileke kutora nyengo yitali na kwamba kugazgana vya chisopa.”

16. Kasi mungachita wuli kuti muleke kujiyimba mulandu chifukwa cha kuleka kukondweska ŵabali ŵinu?

 16 Unenesko ngwakuti vingachitika yayi kuti tigegerethu vyose ivyo vingapangiska kuti tipambane maghanoghano na ŵabali ŵithu. Para ivi vyachitika, mungajiyimba mulandu chifukwa chakuti mukuŵatemwa ŵabali ŵinu, ndipo nyengo zose mukukhumba kuti muchitenge vinthu vyakuŵakondweska. Para ndimo mukujipulikira, nyengo zose muchitenge vinthu vyakukondweska Yehova kuluska ŵamubanja linu. Para muchitenge nthena, ŵabali ŵinu ŵawonenge kuti kulondezga fundo za mu Baibolo ni nkhani ya umoyo na nyifwa. Nyengo zose mukumbukenge kuti mungaŵachichizga yayi ŵanyinu kuti ŵasambire unenesko. Kweni ŵawovwirani kuti ŵawone uwemi wa kupulikira Yehova. Chiuta withu wachitemwa waŵapa mwaŵi kuti ŵasankhe kumuteŵetera panji yayi, nga umo wakachitira na ise.—Yes. 48:17, 18.

PARA MUBALI WINU WALEKA UNENESKO

17, 18. Ntchivichi chingamovwirani kuzizipizga para mubali winu waleka unenesko?

17 Para mubali winu wasezgeka panji wajilekaniska na mpingo, vikuŵinya chomene nga kuti munthu wamulasani na chimayi. Kasi mungazizipizga wuli para vyaŵa nthena?

18 Lutilirani kuchita vinthu vyauzimu. Mukwenera kulutilira kukhozga chipulikano chinu. Mungakhozga chipulikano chinu para mukuŵerenga Baibolo nyengo zose, kunozgokera maungano na kusangikapo, kupharazga ndiposo kulomba kwa Yehova kuti wamupani nkhongono zakuzizipizgira. (Yuda 20, 21) Wuli usange mukuwona kuti mukuchita vyose ivi kweni vichali kumuŵinyani? Kuleka yayi. Para mulutilirenge kuchita vinthu vyauzimu, chitima chichepenge ndipo mwambenge kujipulikako makora. Wonani ivyo vikachitikira uyo wakalemba Salimo 73. Wakaŵa na maghanoghano ghaheni ndipo ghakamusuzganga chomene. Kweni wakasintha maghanoghano wakati wanjira mu malo ghakusoperamo Chiuta. (Sal. 73:16, 17) Namwe mungachita nthena para musopenge Yehova mwakugomezgeka.

19. Kasi tingalongora wuli kuti tikukolerana na chilango cha Yehova?

19 Zomerani para Yehova wakumulangani. Chilango chikovwira chomene munthu uyo wabuda nangauli vikuŵinya panyengo iyo wakupokera chilango. Kweni paumaliro tose tikukondwa. (Ŵerengani Ŵahebere 12:11.) Mwachiyelezgero, Yehova wakutiphalira kuti ‘tileke kwenderana’ na ŵanthu ŵambura kupera. (1 Kor. 5:11-13) Nangauli vikuŵinya, kweni tikwenera yayi kuchezga na mubali withu uyo wasezgeka. Tileke kuchezga nayo pa foni, kumulembera meseji, kalata, imelu, panji kuchezga nayo pa Intaneti.

20. Kasi tikwenera kuŵa na chigomezgo wuli para munthu waleka Yehova?

20 Ŵani na chigomezgo. Chitemwa “chikugomezga vinthu vyose.” Ntheura tikugomezga kuti awo ŵali kumuleka Yehova, zuŵa linyake ŵazamuwelera kwa iyo. (1 Kor. 13:7) Tingamulombera mubali withu wamunyumba yimoza para tawona kuti wamba kusintha. Tikwenera kuchita nthena kuti walutilire kupulikira ivyo Baibolo likuyowoya kweniso kuti wazomere apo Yehova wakumuchema kuti: “Welera kwa ine.”—Yes. 44:22.

21. Kasi mukwenera kuchita wuli para ŵabali ŵinu ŵakumusuzgani chifukwa cha kulondezga Yesu?

21 Tikwenera kumutemwa chomene Yesu kuluska munthu waliyose. Fundo iyi ndiyo Yesu wakayowoya. Yesu wakagomezganga kuti ŵasambiri ŵake ŵaŵenge na chikanga kuti ŵalutilire kugomezgeka kwa iyo nangauli ŵabali ŵawo ŵakaŵasuskanga. Para ŵabali ŵinu ŵakumusuzgani chifukwa cha kulondezga Yesu, gomezgani Yehova kuti wamovwiraninge kuzizipizga. (Yes. 41:10, 13) Yehova na Yesu ŵakukondwa na umo mukuchitira ndipo ŵamutumbikaninge para mukugomezgeka. Para mwamanya fundo izi muŵenge ŵakukondwa.

^ ndime 10 Kuti mumanye umo mungasambizgira ŵana ŵinu para munyinu wamunthengwa ni Kaboni yayi, wonani “Mafumbo Ghakufuma Kuŵaŵazgi” mu Gongwe la Mulinda la Ogasiti 15, 2002.