Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  October 2017

Kasi Mukumanya?

Kasi Mukumanya?

Kasi Ŵayuda ŵakachitanga vichi kuti Yesu waŵakanizge kulapa?

DANGO la Mozesi likazomerezganga munthu kulapa para ntchakwenelera. Kweni ŵanthu mu nyengo ya Yesu ŵakajilapiranga waka bweka. Ŵakalapanga waka pa chilichose icho ŵakuyowoya. Ŵanthu ŵakalapanga kuti ŵalongore kuti ivyo ŵakuyowoya ni vyaunenesko. Kweni Yesu wakawerezgapo kaŵiri kuti ntchiheni kuchita nthena. Iyo wakasambizga kuti: “Mazgu ghinu ghaŵenge waka ‘Enya’ kung’anamura enya, ‘Chara’ winu, chara.”—Mat. 5:33-37; 23:16-22.

Buku la Theological Dictionary of the New Testament likuti “Ŵayuda ŵakatemwanga kulapa pa chilichose icho ŵakuyowoya.” Buku la Malango gha Ŵayuda likulongora kuti uwu mbunenesko chifukwa mukalembeka mtundu wa vilapo ivyo para munthu walapa wakeneranga kufiska na ivyo yikaŵanga nkhani yikuru viŵi yayi para wandafiske.

Padera pa Yesu, paliso ŵanyake awo ŵakawona kuti Ŵayuda ŵakachitanga makora yayi pa nkhani iyi. Mwachiyelezgero, wakulemba mbiri Wachiyuda, Flavius Josephus wakati: ‘Ŵayuda ŵakugaluka ŵakagomezganga kuti ntchiheni chomene kulapa kuluska kuteta. Ŵakatenge para munthu wakulapa kuti ŵanthu ŵagomezge ivyo wakuyowoya, ndikuti wakuteta.’ Kweniso buku linyake la Ŵayuda ilo likumanyikwa kuti Wisdom of Sirach likuti: ‘Munthu uyo wakutemwa kulapa ni muheni chomene.’ Yesu wakayowoya kuti ntchiheni chomene kuvitolera maseŵera ivyo talapa. Para tikuyowoya unenesko nyengo zose, ŵanthu ŵakugomezga ivyo tayowoya nanga tingaleka kulapa.