Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  August 2017

 KUFUMA MU NTHAMBA YITHU

“Kasi Ungano Unyake Tiŵenge Nawo Pawuli?”

“Kasi Ungano Unyake Tiŵenge Nawo Pawuli?”

KUKAŴA kuumaliro wa Novembala, mu chaka cha 1932 mu msumba wa Mexico. Mu msumba uwu mukaŵa ŵanthu ŵakujumpha 1 miliyoni ndipo pakaŵa kuti pajumpha waka sabata yimoza kufuma apo maroboti ghakwamba ghakaŵikikira. Sono ŵanthu ŵakaŵa kuti ŵaluwako vya maroboti. Ŵamutoramakani mu msumba uwu ŵakathilimukira ku chakuchitika chinyake icho chikaŵako mu sabata iyo. Ŵakaluta pa siteji ya sitima yapamtunda uku makamera ghali mu mawoko. Ŵakalindiliranga mulendo wapadera. Mulendo uyu wakaŵa Joseph F. Rutherford, uyo panyengo iyo wakaŵa pulezidenti wa Watch Tower Society. Pakaŵaso Ŵakaboni ŵanandi awo ŵakalindiliranga Mubali Rutherford, uyo wakiza kuzakachitiska ungano wa chigaŵa wa mazuŵa ghatatu.

Wukani! iyo panyengo iyo yikachemekanga kuti The Golden Age yikayowoya kuti, “Tikugomezga kuti ungano uwu uluwikenge yayi mu mbiri yose ya charu cha Mexico chifukwa wovwirenge ŵanthu ŵanandi kuti ŵamanye unenesko.” Kweni chifukwa wuli ungano uwu ukaŵa wapadera chomene uku pakiza ŵanthu 150 pera?

Pambere ungano uwu undachitike, mbanthu ŵachoko chomene ku Mexico awo ŵakapulika unenesko. Kufuma mu 1919, kukachitikanga waka maungano ghachokoghachoko. Pakati pajumpha vyaka, chiŵelengero cha mipingo chikamba kukhira. Ofesi ya munthavi yikati yajulika ku Mexico mu 1929, tikaghanaghananga kuti vinthu visinthenge. Kweni pakaŵa masuzgo ghanyake. Mupayiniya munyake wakati waphalirika kuti waleke kuchita bizinesi para wali mu uteŵeti, wakakhuŵara chomene. Wakaleka ukaboni na kwambiska gulu lake. Kweniso mulaŵiliri wa munthavi wakachita chinthu chinyake icho Malemba ghakukana ndipo ŵakamulekeska uteŵeti. Lekani Ŵakaboni ŵakugomezgeka ku Mexico ŵakakhumbikwiranga kukhozgeka.

Mubali Rutherford wakati wiza, wakaŵakhozga chomene ŵabali ŵakugomezgeka aŵa. Pa ungano, wakayowoya nkhani ziŵiri zakukhozga ndipo nkhani zinyake 5 wakayowoya pa wayilesi. Kakaŵa kakwamba kuti ŵanthu ŵa mu charu chose cha Mexico ŵapulike makani ghawemi pa mawayilesi gha mu charu ichi. Ungano ukati wamara, mulaŵiliri wa munthavi munyake wakimikika ndipo wakanozga vinthu vinyake mu charu ichi. Ŵakaboni ŵakambaso kulimbikira uteŵeti, ndipo Yehova wakatumbika uteŵeti wawo.

Ungano wa chigaŵa mu 1941, mu msumba wa Mexico

Chaka chakulondezgapo, mu charu cha Mexico mukachitika maungano ghaŵiri gha chigaŵa. Unyake ukachitikira mu msumba wa Veracruz ndipo unyake mu msumba wa Mexico. Ŵabali na ŵadumbu ŵakalimbikira chomene kupharazga ndipo ŵanthu ŵanandi ŵakamba kwiza mu gulu. Mu 1931, ku Mexico kukaŵa ŵapharazgi 82. Pakati pajumpha vyaka 10, chiŵelengero ichi chikajumpha 800. Pa ungano uwo ukachitika mu msumba wa Mexico mu 1941, pakaŵa ŵanthu 1,000.

“ŴAKAMBONYA MU MISEWU”

Mu 1943, Ŵakaboni ŵakavwara maposita kuti ŵamanyiske ŵanthu vya ungano wa mutu wakuti ‘Mtundu Wakufwatuka’ (Free Nation), uwo ukachitikira mu  misumba 12 ya mu charu cha Mexico. * Ŵabali ŵakavwaranga maposita ghaŵiri. Yinyake kunthazi, ndipo yinyake kumanyuma. Ŵakaboni ŵakamba kupharazga mu nthowa iyi kufuma mu 1936.

Chithuzithuzi cha mu magazini gha 1944 icho chikulongora ŵabali ŵakupharazga na maposita mu msumba wa Mexico

Pakuyowoyapo umo upharazgi wa maposita uwu ukendera mu msumba wa Mexico, magazini ya La Nación yikati: “Pa zuŵa lakwamba [la ungano], [Ŵakaboni] ŵakapempheka kuti ŵachemereko ŵanthu ŵanandi. Pa zuŵa lachiŵiri, ŵanthu ŵakazura pa malo gha ungano.” Tchalitchi la Katolika likakondwa yayi na upharazgi uwu. Ntheura likayamba kampeni, kulimbana na Ŵakaboni. Nangauli vikaŵa nthena, kweni ŵabali na ŵadumbu ŵakawopa yayi. Ŵakalutilira kupharazga na maposita mu misewu. Magazini iyi yikayowoyaso kuti: “Waliyose mu msumba wakaŵawona . . . ŵanalume na ŵanakazi, wose ŵakaŵa waka maposita ghekhagheka.” Pakaŵa chithuzi cha ŵabali na ŵadumbu ŵakupharazga mu misewu ya mu msumba wa Mexico. Musi mwa chithuzithuzi mukaŵa mazgu ghakuti: “Ŵambonya mu misewu.”

“GHAKAŴA MABEDI GHA WOFUWOFU NA GHAKUTHUKIRA KULUSKA KUGONA PASI”

Pa nyengo iyo, ŵabali ŵanandi ŵakeneranga kujinora vinandi kuti ŵalute ku maungano gha chigaŵa mu Mexico. Ŵabali na ŵadumbu ŵanandi ŵakafuma mu mizi yakutali iyo kukaŵavya misewu kweniso sitima zapamtunda zikafikangako yayi. Mpingo unyake ukalemba kuti: “Palije sitima iyo yikufika kuno.” Ntheura ŵabali na ŵadumbu ŵakakweranga myulu panji kwenda pasi mazuŵa ghanandi kuti ŵakafike ku malo ghakukwelera sitima zakuluta ku msumba uwo kukaŵa ungano.

Ŵakaboni ŵanandi ŵakaŵa ŵakavu, chikaŵa chakusuzga chomene kusanga thirasipoti. Para ŵafika ku ungano, ŵanandi ŵakakhalanga mu nyumba za ŵabali. Ndipo ŵabali ŵa ku malo agha ŵakaŵapokeleranga makora ŵabali ŵawo. Ŵanyake ŵakagonanga mu Nyumba za Ufumu. Nyengo yinyake, ŵabali 90 ŵakafikira pa ofesi ya munthavi ndipo ŵakagona pa mabedi gha makatoni 20 ghakuti mabuku ŵafumiskamo. Buku Lapachaka likati ŵabali aŵa ŵakawona kuti mabedi agha ghakaŵa “gha wofuwofu na ghakuthukira kuluska kugona pasi.”

Ŵabali aŵa ŵakaŵa ŵakukondwa chomene ndipo ŵakawonanga kuti ungano ukaŵa wakuzirwa chomene kuluska chilichose icho ŵakajinora. Mazuŵa ghano, chiŵelengero cha ŵapharazgi ku Mexico chili pafupi kufika 1 miliyoni, ndipo ŵabali ŵachali na mtima wa kuwonga. * Mu 1949, ofesi ya munthavi ku Mexico yikayowoya za ŵabali kuti: “Ŵakuleka yayi kutemwa Chiuta chifukwa cha masuzgo agho ŵakukumana nagho. Kanandi ŵakutemwa kudumbiskana za ungano uwo ŵachita, ndipo ŵakudumbiskana kwa nyengo yitali. Fumbo ilo kanandi ŵabali ŵakutemwa kufumba ndakuti, Kasi ungano unyake tiŵenge nawo pawuli?” Ivyo ofesi ya munthavi yikayowoya ndivyo vichali kuchitika m’paka sono.—Kufuma mu nthamba yithu ya ku Central America.

^ ndime 9 Buku Lapachaka la 1944, likati ungano uwu “ukawovwira kuti ŵanthu ŵanandi ŵaŵamanye makora Ŵakaboni ŵa Yehova.”

^ ndime 14 Ku Mexico, ŵanthu ŵakukwana 2,262,646 ŵakiza pa Chikumbusko mu 2016.