Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) NOVEMBER 2016

Mazgu Ghakukhozga

Mazgu Ghakukhozga

“WA MWANAKAZI.” Umu ndimo nyengo zinyake Yesu wakachemeranga ŵanakazi. Mwachiyelezgero, apo wakachizganga munthu wakupendera uyo wakalwara vyaka 18, wakati: “Wa mwanakazi, wafwatuka ku ulwari wako.” (Luka 13:10-13) Kale ndimo ŵanthu ŵakachemeranga ŵanakazi kulongora kuti ŵakuŵachindika. Yesu nayo ndimo wakachemeranga amama ŵake. (Yoh. 19:26; 20:13) Kweni pakaŵa mazgu ghanyake agho ghakalongoranga vinandi padera pa ntchindi.

Pakuyowoya za ŵanakazi, Baibolo likugwiliskira ntchito mazgu ghanyake agho ghakulongora lusungu kweniso kuŵaghanaghanira. Nakuti ndigho ni mazgu agho Yesu wakagwiliskira ntchito apo wakayowoyanga na mwanakazi uyo wakasuzgika na nthenda yakusulura ndopa vyaka 12. Ivyo mwanakazi uyu wakachita pakwiza kwa Yesu, vikasuskananga na Dango la Chiuta. Munthu wanthena wakeneranga kukhala kwayekha chifukwa wakaŵa wakufipirwa. (Lev. 15:19-27) Kweni mwanakazi uyu wakamanyanga chilichose yayi icho wangachita kuti wachire. Nakuti “madokotala ghanandi ghakasazgirangako vyakuŵinya vyake, ndipo wakamara vyake vyose. Kweni wakachira chara, m’malo mwake suzgo lake likalutiliranga munthazi.”—Mrk. 5:25, 26.

Mwanakazi uyu wakagwegwetera mukati mu ŵanthu ŵanandi ndipo wakiza kumasinda na kukhwaska munjilira wa Yesu ndipo ndopa zake zikaleka kufuma. Wakaghanaghananga kuti palije uyo wamanyenge ivyo wachita. Kweni Yesu wakamanya ndipo wakafumba kuti: “Ni njani uyo wanikhwaska?” (Luka 8:45-47) Ntheura mwanakazi yura wakachita wofi na kwamba kumbwambwantha ndipo wakawa panthazi pa Yesu na “kumuphalira unenesko wose.”—Mrk. 5:33.

Kuti Yesu wamupembuzge mwanakazi uyu, wakayowoya mwalusungu kuti: “Khwima mtima wamwana!” (Mat. 9:22) Nkhwantha yinyake ya Baibolo yikati mazgu ghakuti “wamwana,” nyengo zinyake mu Chihebere na Chigiriki ghakung’anamura kuti munthu wakuyowoya ‘mwalusungu.’ Yesu wakalutilira kupembuzga mwanakazi yura ndipo wakayowoya kuti: “Chipulikano chako chakuchizga. Luta mu mtende, ndipo uchizgike ku ulwari wako wakofya.”—Mrk. 5:34.

Bowazi nayo, uyo wakaŵa musambazi chomene wakachema Rute, mwanakazi Wachimowabu, kuti: “Wamwana.” Nga ni mwanakazi wakusulura ndopa yura, Rute nayo wakajiwonanga kuti ngwambura kwenelera kupika ntchindi panji lusungu lwanthena chifukwa iyo wakavuluranga mu munda wa munthu uyo wakamumanyanga yayi. Bowazi wakati: “Pulika, mwana wane.” Pamanyuma wakamukhozga na kumuphalira kuti walutilire kuvulura mu munda wake. Rute wakagwada panthazi pa Bowazi ndipo wakamufumba chifukwa icho Bowazi wakachitira nthena kwa iyo pakuŵa mulendo. Bowazi wakazgora ndipo wakamusimikizgira kuti: “Napulika vyose ivyo wachitira anyokovyara [a Naomi awo ŵakaŵa chokoro] . . . Yehova wakupe njombe pa ivyo wachita.”—Rute 2:8-12.

Ŵalara wose mazuŵa ghano, ŵangasambirako kwa Yesu na Bowazi. Nyengo zinyake ŵalara ŵaŵiri ŵangakumana na mudumbu uyo wakukhumbikwira wovwiri wauzimu kweniso kumukhozga. Para ŵangapempha ulongozgi kwa Yehova na kutegherezga chomene apo mudumbu uyu wakuyowoya, ŵalara ŵamanyenge makora umo ŵangamukhozgera na kumupembuzga na Mazgu gha Chiuta.—Rom. 15:4.