Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  March 2017

Ŵani na Chipulikano—Sankhani Mwamahara

Ŵani na Chipulikano—Sankhani Mwamahara

‘Lutilirani kulomba mu chipulikano, kwambura kukayika.’—YAK. 1:6.

SUMU: 81, 70

1. Ntchivichi chikapangiska Kayini kuti wasankhe mwambura mahara, ndipo ntchivichi chikachitika?

KAYINI wakaŵa na mwaŵi wakusankha. Wakenera kusankha kukanizga maghanoghano ghaheni panji kughazomerezga kuti ghamulamulire. Chilichose icho wakate wasankhenge, chikaŵa na uwemi na uheni wake. Kweni mukumanya ivyo Kayini wakasankha. Wakasankha makora yayi. Iyo wakasankha kukoma munung’una wake Abelu. Ubwezi na Mlengi wake ukanangika chifukwa cha ivyo wakasankha.—Gen. 4:3-16.

2. Chifukwa wuli tikwenera kusankha mwamahara?

2 Nase tili na mwaŵi wakusankha icho tikukhumba kuchita. Ni vyose yayi ivyo tikusankha vingatipwetekeska. Kweni vinandi ivyo tingasankha vingatikhwaska. Para tasankha makora vingatovwira kuti tikhale makora kweniso tiŵe na mtende. Kweni para tasankha uheni tiŵenge na masuzgo ghakofya kweniso tikhuŵarenge.—Zinth. 14:8.

3. (a) Kasi tikwenera kuŵa na chipulikano mu vichi kuti tisankhe vinthu mwamahara? (b) Kasi tidumbiskanenge mafumbo wuli?

3 Ntchivichi chingatovwira kuti tisankhenge vithu mwamahara? Tikwenera kuŵa na chipulikano mwa Chiuta. Tileke kukayikira  kuti wakukhumbisiska kutovwira kuti tisankhe mwamahara. Kweniso tikwenera kuŵa na chipulikano mu Mazgu gha Yehova. Tileke kukayikira umo wakuchitira vinthu, kweniso tikwenera kugomezga ulongozgi wake. (Ŵerengani Yakobe 1:5-8.) Apo tikuŵa nayo paubwezi na kulutilira kutemwa Mazgu ghake, timugomezgenge chomene. Tiwoneseskenge kuti tikusanda dankha Mazgu gha Chiuta pambere tindasankhe vyakuchita. Kweni kasi tingachita wuli kuti tisankhenge vinthu mwamahara? Kasi ntchakwenelera kusintha ivyo tasankha kale?

TOSE TIKWENERA KUSANKHA VYAKUCHITA

4. Adamu wakasankha vichi? Ndipo ni vichi ivyo vili kuchitika?

4 Kufuma waka apo ŵakalengekera, ŵanthu ŵakwenera kusankha chakuchita pa nkhani zinyake. Adamu wakaŵa na mwaŵi wakusankha kupulikira Mlengi wake panji Eva. Kweni kasi mukuwona kuti wakasankha makora? Adamu wasankha kupulikira mwanakazi uyo wakapusikika. Pamanyuma wakachimbizgika mu Paradiso na kutaya umoyo wake chifukwa cha kusankha uheni. Ivyo wakasankha vikambiska masuzgo ghanandi. Tose mazuŵa ghano tikusuzgika chifukwa cha ivyo Adamu wakasankha.

5. Kasi Yehova watipa udindo wuli?

5 Ŵanthu ŵanyake ŵakughanaghana kuti umoyo mphanyi ukunozga chomene tiŵavyenge wanangwa wakusankha. Kasi namwe mukuwona nthena? Kumbukani kuti Yehova wakalenga ŵanthu nga ni vidoli yayi kuti ŵaleke kughanaghana panji kusankha vyakuchita. Baibolo likutisambizga umo tingasankhira vinthu mwamahara. Yehova wakukhumba kuti tisankhenge tekha vinthu, na kuleka kujipweteka. Tiyeni tiwone maukaboni agho ghakukolerana na fundo iyi.

6, 7. Kasi Ŵaisrayeli ŵakaŵa na wanangwa wakusankha vichi? Ndipo chifukwa wuli chikaŵa chakusuzga kuti Ŵaisrayeli ŵasankhe mwamahara? (Wonani chithuzi chakwamba.)

6 Ŵaisrayeli ŵakati ŵakhazikika mu Charu cha Layizgano, ŵakaŵa na mwaŵi wakusankha chithu chakuzirwa chomene. Ŵakeneranga kusankha kuteŵetera Yehova panji kuteŵetera ŵachiuta ŵanyake. (Ŵerengani Joshuwa 24:15.) Nkhani iyi yingawoneka nga yikaŵa yipusu waka. Kweni ivyo ŵakate ŵasankhenge, yikaŵa nkhani ya umoyo panji nyifwa. Kanandi mu nyengo ya Ŵeruzgi, Ŵaisrayeli ŵakasankhanga mwambura mahara. Ŵakalekanga kusopa Yehova na kwamba kusopa ŵachiuta ŵatesi. (Ŵeru. 2:3, 11-23) Nyengo yinyake ŵanthu ŵa Chiuta ŵakeneranga kusankha uyo ŵakenera kumusopa. Ntchimi Eliya yikaphalira Ŵaisrayeli kuti: Sankhani kuteŵetera Yehova panji kuteŵetera chiuta mutesi Baala. (1 Mathe. 18:21) Eliya wakasuska ŵanthu chifukwa cha kutondeka kusankha chimoza. Pakuti nyengo zose ntchamahara kuteŵetera Yehova, panji mungaghanaghana kuti chikaŵa chipusu kusankha pa nkhani iyi. Unenesko ngwakuti munthu wamahara wangasopa Baala yayi. Kweni Ŵaisrayeli ‘ŵakakora manthanga.’ Eliya wakaŵaphalira kuti ŵasankhe kusopa Yehova chifukwa ndiko nkhusopa kwaunenesko.

7 Chifukwa wuli chikaŵa chakusuzga kuti Ŵaisrayeli ŵasankhe mwamahara? Chakwamba, ŵakaleka kuŵa na chipulikano mwa Yehova, na kukana kupulikira mazgu ghake. Ŵakaleka kugomezga Yehova, ŵakaleka kusambira Mazgu ghake, panji kulondezga ulongozgi wake. Ŵasambirenge Mazgu gha Chiuta na kughalondezga, ŵakate ŵasankhenge vinthu mwamahara. (Sal. 25:12) Ŵaisrayeli ŵakazomerezga kwendera fundo za ŵanyawo, kweniso kuti ŵanthu ŵaŵasankhirenge vyakuchita. Ŵanthu ŵambura kusopa Yehova awo  ŵakakhalanga nawo ŵakapangiska Ŵaisrayeli kuti ŵendere maghanoghano ghawo. Ŵaisrayeli ŵakamba kutolera vinthu ivyo ŵanthu aŵa ŵakachitanga. Kweni Yehova wakaŵa kuti waŵachenjezga kale.—Eks. 23:2.

KASI ŴANYITHU NDIWO ŴATISANKHIRENGE VYAKUCHITA?

8. Kasi tikusambirako vichi ku Ŵaisrayeli pa nkhani ya kusankha?

8 Nkhani ya Ŵaisrayeli yikutisambizga kuti tikwenera kusankha mwamahara. Tose tikwenera kusankha tekha chakuchita. Tingasankha mwamahara para tikulondezga fundo za mu Malemba. Pa Ŵagalatiya 6:5 pakuti: “Chifukwa waliyose wayeghenge katundu wake.” Tileke kupeleka ku ŵanyithu udindo wakusankha tekha vyakuchita. Kweni tikwenera kusankha tekha icho ntchakwenelera pa maso pa Chiuta na kuchita.

9. Chifukwa wuli ntchiheni chomene kuti ŵanyithu ŵatisankhirenge vyakuchita?

9 Kasi pangaŵa uheni wuli para tingazomerezga kuti ŵanyithu ŵatisankhirenge vyakuchita? Ŵanyithu ŵangatichichizga kusankha mwambura kwenelera. (Zinth. 1:10, 15) Nangauli ŵanthu ŵangatichichizga, kweni ni udindo withu kulondezga njuŵi yithu iyo tili kuyisambizga fundo za mu Baibolo. Para tikuzomerezga kuti ŵanyithu ŵatisankhirenge vyakuchita, ndikuti tikukhumba ‘kuŵalondezga.’ Ni wanangwa withu kusankha nthena, kweni umaliro wake nguheni chomene.

10. Kasi Paulosi wakachenjezga vichi Ŵakhristu ŵa ku Galatiya?

10 Mpositole Paulosi wakachenjezga Ŵakhristu ŵa ku Galatiya uheni wakuti ŵanyawo ŵaŵasankhirenge vyakuchita. (Ŵerengani Ŵagalatiya 4:17.) Ŵabali ŵanyake mu mpingo ŵakakhumbanga kuti ŵasankhirenge ŵanyawo vyakuchita kuti ŵaŵapatuske ku ŵapositole. Chifukwa wuli? Ŵakajipenjeranga ntchindi. Ŵakaŵa ŵakujikuzga ndipo ŵakachindikanga yayi wanangwa wakusankha wa Ŵakhristu ŵanyawo.

11. Kasi tingaŵawovwira wuli ŵanyithu para ŵakusankha vyakuchita?

11 Paulosi wakachindikanga wanangwa wakusankha wa Ŵakhristu ŵanyake. Nase tingasambirako kwa iyo. (Ŵerengani 2 Ŵakorinte 1:24.) Mazuŵa ghano napo, ŵalara ŵakwenera  kuchita nga ni Paulosi para ŵakupeleka ulongozgi pa nkhani iyo munthu wakwenera kusankha yekha chakuchita. Ŵalara ŵakukondwa para ŵakovwira mberere mu mpingo na fundo za mu Baibolo. Kweni ŵalara ŵakuwoneseska kuti ŵabali na ŵadumbu ŵasankhenge ŵekha vyakuchita. Fundo iyi yikupulikikwa nadi chifukwa ŵabali na ŵadumbu aŵa ŵazamukolora ivyo ŵakumija. Fundo yikuru njakuti: Tingawovwira ŵabali na ŵadumbu na fundo panji ulongozgi unyake wa mu Baibolo. Kweni tikwenera kukumbuka kuti nawo ŵali na wanangwa kweniso udindo wakusankha ŵekha vyakuchita. Vinthu vikuŵayendera makora para ŵasankha mwamahara. Tileke kughanaghana kuti tili na mazaza panji udindo wakusankhira ŵabali na ŵadumbu vyakuchita.

Ŵalara ŵachitemwa ŵakovwira ŵanyawo kuti ŵasankhenge ŵekha vyakuchita (Wonani ndime 11)

KUSANKHA VYAKUCHITA PARA TAKWIYA

12, 13. Chifukwa wuli ntchiheni kusankha vinthu uku takwiya panji ŵanthu ŵatigongoweska?

12 Ŵanthu ŵanandi ŵakutemwa kuyowoya kuti: Chita icho mtima wako ukukhumba. Kweni ntchiheni chomene kughanaghana nthena. Kweniso ni fundo ya mu Malemba yayi. Baibolo likutichenjezga kuti tileke kugomezga mtima withu wambura kufikapo panji kwendera ivyo tikughanaghana para tikusankha vyakuchita. (Zinth. 28:26) Baibolo likuyowoya za ŵanthu ŵanyake awo ŵakalondezga mtima wawo na ivyo vikachitika ŵati ŵachita nthena. Suzgo ndakuti ŵanthu ŵambura kufikapo, “mtima nguryarya kuluska chilichose, nguheni wambura kukoleka.” (Yer. 3:17; 13:10; 17:9; 1 Mathe. 11:9) Kasi chingachitika ntchivichi para tikulondezga waka ivyo mtima withu ukukhumba?

13 Yehova wakutiphalira kuti timutemwenge na mtima withu wose kweniso kutemwa ŵanyithu nga umo tikujitemwera tekha. (Mat. 22:37-39) Lemba ilo lili mu ndime iyo yajumpha, languyowoya uheni wakuchita vinthu chifukwa cha kwendera ivyo mtima withu ukukhumba. Kasi chingachitika ntchivichi para tikusankha vyakuchita uku takwiya? Vinthu vingaŵa makora yayi. Panyake namwe vili kumuchitikiranipo. (Zinth. 14:17; 29:22) Kasi tingasankha makora vinthu para ŵanyithu ŵatigongoweska? (Maŵa. 32:6-12; Zinth. 24:10) Mazgu gha Chiuta ghakulongora uwemi wakuŵa “muzga wa dango la Chiuta.” (Rom. 7:25) Para tikusankha vinthu vyakuzirwa uku takwiya, tingasankha mwamahara yayi.

APO TINGASINTHA IVYO TASANKHA

14. Chifukwa wuli ntchiwemi nyengo zinyake kusintha ivyo tasankha para ntchakwenelera?

14 Tikwenera kusankha vinthu mwamahara. Kweni fundo iyi yikung’anamura kuti tileke kusintha para tasankha vinthu yayi. Nyengo zinyake vingachitika kuti ivyo tikasankha tikwenera kuviwonaso makora panji kusintha. Wonani ivyo Yehova wakachita na ŵanthu ŵa ku Nineve mu nyengo ya Yona. “Chiuta waunenesko wakati wawona ivyo ŵakachita, umo ŵakawelerako ku nthowa zawo ziheni, wakaghanaghanirapo pa soka ilo wakayowoya kuti wizenge nalo pa iwo, ndipo wakiza nalo chara.” (Yona 3:10) Yehova wakati wawona kuti ŵanthu ŵa ku Nineve ŵalapa na kusintha, wakasintha maghanoghano ghake. Ivyo Yehova wakachita, wakalongora kuti wakughanaghanira ŵanthu, ngwakujiyuyura, kweniso ngwalusungu. Chiuta wakuchita chithu chifukwa chakuti wakwiya yayi. Iyo wakupambana na umo ŵanthu ŵakuchitira vinthu para ŵakwiya.

15. Chifukwa wuli nyengo zinyake tingasintha ivyo takhumbanga kuchita?

15 Nyengo zinyake vikuŵa makora kusintha ivyo tasankha panji ivyo tikukhumba kuchita. Tingasintha chifukwa cha umo vinthu vyaŵira  panji vyasinthira. Nyengo yinyake Yehova wakasintha maghanoghano chifukwa cha umo vinthu vikaŵira. (1 Mathe. 21:20, 21, 27-29; 2 Mathe. 20:1-5) Panji tingasintha maghanoghano chifukwa chakuti tapulikiska makora nkhani yinyake iyo tikayimanyanga makora yayi. Wonani ivyo vikachitikira fumu Davide. Ŵanthu ŵakamuphalira nkhani yautesi yakukhwaskana na muzukuru wa Sauli, Mefibosheti. Kweni wakati wayimanya makora nkhani iyi, wakasintha maghanoghano ghake. (2 Sam. 16:3, 4; 19:24-29) Nyengo zinyake chingaŵa chiwemi kuchita nga ni Davide.

16. (a) Ni fundo wuli zingatovwira kuti tisankhe vinthu mwamahara? (b) Chifukwa wuli tingasintha vinthu vinyake ivyo tikasankha?

16 Baibolo likutiphalira kuti tileke kuchimbilira para tikukhumba kuchita chinthu chakuzirwa. (Zinth. 21:5) Para tikughanaghanirapo dankha panji kusanda mwakupwelelera icho tikukhumba kuchita, vinthu vitenderenge makora. (1 Tes. 5:21) Pambere mfumu wandasankhe chakuchita, vingaŵa makora kupenjerezga dankha ulongozgi mu Malemba, mu mabuku ghithu, kweniso kufumba maghanoghano gha ŵa mu banja lake. Kumbukani kuti Chiuta wakaphalira Abrahamu kuti wapulikire ivyo muwoli wake wakayowoya. (Gen. 21:9-12) Ŵalara nawo ŵakwenera kupenjerezga dankha ulongozgi pambere ŵandasankhe chakuchita. Para ŵalara ŵakughanaghana makora kweniso mbakujiyuyura, ŵawopenge yayi kusintha ivyo ŵakayowoya panji kudumura chifukwa cha kughanaghana kuti ŵabali ŵangaleka kuŵachindika. Ŵalara ŵakwenera kusintha maghanoghano ghawo kweniso ivyo ŵakadumura para ntchakwenelera. Ndipo tose tingachita makora kuchita nga ndiwo. Para tingachita nthena, mu mpingo muŵenge mtende kweniso vinthu vyendenge makora.—Mil. 6:1-4.

CHITANI IVYO MWASANKHA

17. Kasi tingachita wuli kuti tisankhenge mwamahara?

17 Vinthu vinyake ivyo tikukhumba kusankha vikuŵa vyakuzirwa chomene. Vinthu ivi tikwenera kughanaghanirapo chomene kweniso kulomba kwa Yehova. Ntheura pangatora nyengo kuti tisankhe chakuchita. Ŵakhristu ŵanyake ŵakwenera kusankha usange ŵatorenge panji kutengwa, kweniso munthu uyo ŵangatorana nayo. Nkhani yinyake yakuzirwa iyo munthu wakwenera kusankha ni umo wangachitira kuti wambe uteŵeti wanyengozose kweniso apo wazamwambira. Pa nkhani izi, munthu wakwenera kugomezga Yehova kuti wamovwire na kumulongozga. (Zinth. 1:5) Lekani ntchakuzirwa kupenja ulongozgi mu Baibolo kweniso kulomba ulongozgi kwa Yehova. Manyani kuti Yehova wangatipa ivyo tikukhumbikwira kuti tisankhe mwakukolerana na khumbo lake. Para tikukhumba kusankha vyakuchita, ntchiwemi kujifumba kuti: ‘Kasi ivyo nkhukhumba kusankha vikulongora kuti nkhutemwa Yehova? Kasi mu banja lane muŵenge chimwemwe kweniso mtende na ivyo nisankhenge? Ndiposo kasi ivyo nisankhenge vilongorenge kuti ndine wakuzikira kweniso walusungu?

18. Chifukwa wuli Yehova wakukhazga kuti tisankhenge tekha vyakuchita?

18 Yehova wakutichichizga yayi kuti timutemwenge panji kumuteŵetera. Tili na wanangwa wakusankha. Chifukwa chakuti Yehova wali kutipa wanangwa wakusankha, iyo wakuchindika wanangwa withu wakusankha kuti timuteŵetere panji yayi. (Josh. 24:15; Muph. 5:4) Kweni para talondezga ulongozgi wake pakusankha vinthu vinyake, iyo wakukhazga kuti tifiskenge. Para tili na chipulikano mwa Yehova na kulondezga ulongozgi uwo wakutipa, tisankhenge vinthu mwamahara kweniso tilongorenge kuti tili ŵakukhazikika munthowa zithu zose.—Yak. 1:5-8; 4:8.