Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  June 2017

Kasi Mukulaŵiska Kuwaro Panji mu Mtima?

Kasi Mukulaŵiska Kuwaro Panji mu Mtima?

KABONI wa Yehova munyake wa ku Canada, zina lake Don, wakuyezgayezga chomene kuti wayowoyeskanenge na ŵanthu awo ŵalije pakukhala ndipo ŵakukhala waka mu msewu. Don wakulongosora za munthu munyake uyo wakakumana nayo. Wakuti: “Munthu munyake uyo wakakhalanga waka mu msewu, zina lake Peter, wakaŵa wakubinkha chomene, ndipo kawiro, nindawonepo munthu wakubinkha nthena. Munthu uyu wakanunkhanga chomene ndipo wakakhumbanga yayi kuti ŵanthu ŵize kufupi na iyo. Iyo wakakananga para ŵanthu ŵakumulongora lusungu.” Don wakayezgayezga kulongora lusungu kwa munthu uyu vyaka vyakujumpha 14.

Zuŵa linyake Peter wakafumba Don kuti: “Kasi ukukhumba vichi chomene? Ŵanyako ŵali kuleka kale kunisuzga. Nili nawe na ntchito wuli? Don wakachita vinthu mwamahara chomene. Wakaŵerenga malemba ghatatu kuti wamufike pamtima Peter. Chakwamba, wakafumba Peter usange wakumanya kuti Chiuta wali na zina na kumupempha kuti waŵerenge lemba la Salimo 83:18. Chachiŵiri, kuti walongore chifukwa icho wakamutemweranga, Don wakapempha Peter kuti waŵerenge Ŵaroma 10:13, 14. Pa lemba ili pakuti “waliyose uyo wakuchema pa zina la Yehova wazamuponoskeka.” Chaumaliro, Don wakamuŵelengera lemba la Mateyu 9:36, pamanyuma wakapempha Peter kuti waŵerenge yekha. Lemba ili likuti: “Wakati wawona mizinda, wakayilengera chitima, chifukwa ŵakaŵa ŵakufyopoka na kujowoleka nga ni mberere zambura muliska.” Peter wakati waŵerenga, wakafumba Don uku masozi ghali gelegele kuti: “Kasi ndine yumoza wa mberere izi?

Peter wakamba kusintha. Wakamba kugeza makora, kumeta mwembe, na kuvwara malaya ghawemi agho Don wakamupa. Peter wakalutilira kuwoneka makora.

Peter wakaŵa na kadayale. Pakwamba wakalembangamo vinthu viheni. Kweni kufuma apo wakadumbiskana na Don, wakasintha na kwamba kulembamo vinthu viwemi. Vinyake ivyo wakalembamo ni vyakuti: “Mwahuno namanya zina la Chiuta. Para sono nkhulomba, nkhulomba kwa Yehova. Nakondwa chomene kumanya zina lake. Don waniphalira kuti Yehova wangaŵa mubwezi wane, ndipo nyengo  zose wakunitegherezga. Iyo wakutegherezga chilichose kweniso nyengo yiliyose.”

Mazgu ghaumaliro agho Peter wakayowoya, wakaphaliranga ŵabali ŵake. Wakalemba kuti:

“Mwahuno nkhujipulika makora cha. Nkhuwona kuti nachekura, nyengo yiliyose ningafwa. Kweni nanga mwahuno lingaŵa zuŵa lane laumaliro, nkhugomezga kuti mubwezi wane [Don] tizamuwonanaso mu Paradiso. Apo mukuŵerenga kalata iyi, manyani kuti ine kulije. Kweni para mwazakawona munthu wachilendo pa nyifwa yane, muzakayowoye nayo. Chonde muŵerenge buku la buluu ili [wakanenanga buku lakuti “Unenesko Weneuwo Ukulongozgera ku Umoyo wa Muyirayira” ilo wakapokera kumanyuma]. * Buku ili likuti nizamuwonanaso na mubwezi wane mu Paradiso. Nkhugomezga fundo iyi na mtima wane wose. Ndine mubali winu wakutemweka, Peter.”

Peter wakati wafwa, mudumbu wake, zina lake Ummi, wakati: “Vyaka viŵiri ivyo vyajumpha Peter wakazakaniwona. Kakaŵa kakwamba kuwona mudumbu wane ngwakukondwa. Wakamwemweteranga.” Mudumbu wa Peter wakaphalira Don kuti: “Namuŵerenga buku ili chifukwa nkhuwona kuti vinthu ivyo vingakhorweska mudumbu wane mbwe ni viwemi chomene.” Ummi wakazomeraso kusambira buku la Kasi Baibolo Likusambizgachi Chomenechomene? na Kaboni wa Yehova.

Nase tikwenera kulaŵiska waka umo ŵanthu ŵakuwonekera kuwaro yayi, kweni mu mtima. Tikwenera kuzikira na kulongora chitemwa chanadi ku ŵanthu ŵa mitundu yose. (1 Tim. 2:3, 4) Para tichitenge nthena, tovwirenge ŵanthu ŵa nga ni Peter, awo ŵakuwoneka makora yayi kuwaro, kweni ŵali na mitima yiwemi. Tili na chigomezgo chose kuti Chiuta uyo “wakuwona mu mtima,” wawovwirenge kuti unenesko umere mu mitima ya ŵanthu ŵawemi.—1 Sam. 16:7; Yoh. 6:44.

^ ndime 7 Buku ili ndakupharazgika na Ŵakaboni ŵa Yehova. Kweni sono ŵali kuleka kupurinta.