Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  July 2017

“Wakovwire Kuti Vyose Ivyo Ukughanaghana Vikwendere Makora”

“Wakovwire Kuti Vyose Ivyo Ukughanaghana Vikwendere Makora”

“Ukondwere chomene mwa Yehova, ndipo wakupenge ivyo mtima wako ukukhumba.”—SAL. 37:4.

SUMU: 89, 140

1. Kasi ŵachinyamata ŵakwenera kuchita vichi? Kweni chifukwa wuli ŵakwenera kufipa mtima yayi? (Wonani chithuzithuzi chakwamba.)

ŴACHINYAMATA ŵangazomerezga kuti pambere munthu wandambe ulendo, wakwenera kumanyirathu uko wakuluta. Umoyo uli nga ni ulendo, ndipo nyengo yakughanaghanira uko ŵakukhumba kuluta ni apo ŵachali ŵachinyamata. Mbunenesko kuti nyengo zinyake ntchakusuzga kupangirathu mapulani. Mudumbu munyake zina lake Heather wakati: “Ntchakusuzga chomene kuchita nthena. Ukwenera kusankhirathu ivyo uchitenge pa umoyo wako.” Kweni mukwenera kuŵa ŵachikanga. Yehova wakuphalira ŵanthu ŵake kuti: “Ungenjerwanga chara, pakuti ndine Chiuta wako. Nikukhozgenge, enya, nikovwirenge.”—Yes. 41:10.

2. Kasi mukumanya wuli kuti Yehova wakukhumba kuti musankhe vinthu ivyo mungazakakondwa navyo munthazi?

2 Yehova wakuchiska imwe ŵachinyamata kuti mukwenera kusankha mwamahara ivyo muzamuchita munthazi. (Muph. 12:1; Mat. 6:20) Iyo wakukhumba kuti mukondwenge. Uwu mbunenesko, chifukwa ndiyo wali kulenga vinthu ivyo mukuwona, kupulika, kweniso ivyo mukurya. Kweniso wakutipwelelera na kutisambizga ivyo tikwenera kuchita kuti tikhalenge makora. Yehova wakuphalira ŵanthu awo ŵakukana ulongozgi wake kuti: “Mukasankha ivyo vikunikwiyiska. . . . Wonani! Ŵateŵeti ŵane ŵasekelerenge, kweni imwe muŵenge na soni. Wonani! Ŵateŵeti  ŵane ŵachemerezgenge mwachimwemwe chifukwa cha kukondwa mu mtima.” (Yes. 65:12-14) Tikuchindika Yehova para tikusankha vinthu mwamahara.—Zinth. 27:11.

SANKHANI VINTHU IVYO MUNGAZAKAKONDWA NAVYO

3. Kasi Yehova wakukhumba kuti muchitenge vichi?

3 Kasi Yehova wakukhumba kuti musankhe vichi? Chiuta wakalenga ŵanthu kuti ŵamumanye na kumuteŵetera mwakugomezgeka kuti ŵaŵe ŵakukondwa. (Sal. 128:1; Mat. 5:3) Taŵanthu tikupambana na vinyama. Vinyama vikalengeka waka kuti viryenge, kumwa, na kubaba ŵana. Kweni taŵanthu ndimo tiliri yayi. Chiuta wakukhumba kuti musankhenge makora vinthu kuti muŵe ŵakukondwa. Mlengi winu ni “Chiuta wa chitemwa,” “Chiuta wakukondwa,” uyo wakalenga ŵanthu “mu chikozgo chake.” (2 Kor. 13:11; 1 Tim. 1:11; Gen. 1:27) Muŵenge ŵakukondwa para mukuyezga Chiuta withu wachitemwa. Kasi namwe mukuwona kuti ivyo lemba ili likuyowoya vili kumuchitikiranipo? Likuti: “Uyo wakupeleka wakukondwa chomene kuluska uyo wakupokera.” (Mil. 20:35) Fundo iyi njaunenesko nadi. Yehova wakukhumba kuti ivyo mukusankha vilongorenge kuti mukumutemwa kweniso mukutemwa ŵanyinu.—Ŵerengani Mateyu 22:36-39.

4, 5. Chifukwa wuli Yesu wakakondwanga?

4 Ŵachinyamata mungasambirako kwa Yesu. Apo wakaŵa mwana, wakwenera kuti wakaseŵeranga na kuchezga. Mazgu gha Chiuta ghakuti pali “nyengo ya kuseka . . . na nyengo ya kuvina.” (Muph. 3:4) Yesu wakaŵa paubwezi uwemi na Yehova chifukwa wakasambiranga Mazgu gha Chiuta. Apo wakaŵa na vyaka 12, ŵasambizgi ŵa pa tempile ŵakazizwa chomene chifukwa “wakapulikiskanga luŵiro vinthu kweniso wakaŵazgoranga makora” vinthu vyauzimu.—Luka 2:42, 46, 47.

5 Yesu wakati waŵa mulara, wakalutilira kuŵa wakukondwa. Chifukwa wuli wakaŵa wakukondwa? Wakamanya kuti Chiuta wakakhumbanga kuti iyo ‘wapharazge makani ghawemi ku ŵakavu na kujura maso gha ŵachibulumutira.’ (Luka 4:18) Yesu wakakondwanga chifukwa cha kuchita khumbo la Chiuta. Lemba la Salimo 40:8 likuyowoya umo Yesu wakajipulikiranga, likuti: “Nkhukondwa kuchita khumbo linu, A Chiuta wane.” Yesu wakakondwanga para wakusambizga ŵanthu vya Adada ŵake ŵakuchanya. (Ŵerengani Luka 10:21.) Yesu wakati wasambizga mwanakazi munyake vya kusopa kwaunenesko, wakaphalira ŵasambiri ŵake kuti: “Chakurya chane ntchakuti nichite khumbo la uyo wakanituma na kufiska mulimo wake.” (Yoh. 4:31-34) Yesu wakakondwanga chifukwa chakuti wakatemwanga Chiuta na ŵanthu. Namwe mukondwenge para muchitenge nthena.

6. Chifukwa wuli ntchakuzirwa kudumbiskana na Ŵakhristu ŵakukhwima ivyo mukukhumba kuzakachita munthazi?

6 Ŵakhristu ŵanandi ŵakukondwa chifukwa chakuti ŵakamba upayiniya ŵachali ŵachinyamata. Mungadumbiskana na Ŵakhristu aŵa ivyo mukukhumba kuzakachita munthazi. “Vinthu vikulongosoka yayi para palije kudumbiskana, kweni vinthu vikwenda makora para pali ŵakupeleka fundo ŵanandi.” (Zinth. 15:22) Ŵakhristu ŵakukhwima mwauzimu awo muŵafumbenge, ŵamuphaliraninge kuti para mungachita upayiniya, musambirenge vinthu ivyo vingamovwirani umoyo winu wose. Yesu wakati wasambizgika na Adada ŵake kuchanya, wakalutilira kusambira apo wakachitanga uteŵeti wake pa charu chapasi. Wakasambira kuti munthu wakukondwa para waŵafika pamtima ŵanthu na makani ghawemi. Wakasambiraso kuti munthu wakukondwa para wakugomezgeka kwa Chiuta pa nyengo iyo wakuyezgeka. (Ŵerengani Yesaya 50:4; Heb. 5:8; 12:2) Tiyeni tiwone umo upayiniya ungamovwilirani kuti muŵe ŵakukondwa.

CHIFUKWA WULI NTCHIWEMI KUSAMBIZGA ŴANTHU?

7. Chifukwa wuli ŵachinyamata ŵanandi ŵakutemwa kusambizga ŵanthu Baibolo?

7 Yesu wakati: “Lutaninge mukazgore ŵanthu . . . kuŵa ŵasambiri, . . . mukaŵasambizge.” (Mat. 28:19, 20) Para mukukhumba kuzakachita  ntchito yakuzgora ŵanthu kuŵa ŵasambiri, ndikuti mwasankha ntchito yiwemi chomene iyo yikuchindika Chiuta. Nga umo vikuŵira na ntchito zose, pakutora nyengo kuti muŵe ŵaluso. Mubali munyake zina lake Timothy, uyo wakamba upayiniya wachali munyamata, wakati: “Nkhutemwa chomene kuteŵetera Yehova nyengo zose chifukwa ni nthowa yimoza iyo nkhulongolera kuti nkhumutemwa. Pakwamba nkhaŵavya sambiro la Baibolo. Kweni apo nkhasamukira ku chigaŵa chinyake, nkhaŵa na masambiro gha Baibolo ghanandi mu mwezi umoza pera. Munyake uyo nkhasambiranga nayo wakamba kwiza ku Nyumba ya Ufumu. Nkhati nasambira Sukulu Yakusambizga Baibolo ya Ŵabali Ŵambura Kutora * kwa myezi yiŵiri, ŵakanituma ku malo ghanyake uko nkhaŵa na masambiro gha Baibolo 4. Nkhutemwa chomene kusambizga ŵanthu, ndipo nkhuwona kuti mzimu utuŵa ukuŵawovwira kuti ŵasinthe nkharo zawo.”—1 Tes. 2:19.

8. Kasi ŵachinyamata ŵanyake ŵachita vichi kuti ŵasambizge ŵanthu ŵanandi Baibolo?

8 Ŵachinyamata ŵanyake ŵali kusambira chiyowoyero chinyake. Mwachiyelezgero, Jacob wa ku North America, wakati: “Apo nkhaŵa na vyaka 7, ŵanyane ŵanandi awo tikasambiranga kilasi limoza ŵakaŵa ŵa ku Vietnam. Nkhakhumbanga kuŵaphalira za Yehova. Pakati pajumpha kanyengo, nkhaghanaghana kuti nisambire chiyowoyero chawo. Kuti nisambire, kanandi nkhayaniskanga Gongwe la Mulinda la Chingelezi na la Chiviyetinamu. Kweniso nkhasanga ŵabwezi mu mpingo wapafupi uwo ukayowoyanga Chiviyetinamu. Apo nkhaŵa na vyaka 18, nkhamba upayiniya. Pamanyuma nkhanjira Sukulu Yakusambizga Baibolo ya Ŵabali Ŵambura Kutora. Sukulu iyi yanovwira chomene apo nkhuchita upayiniya mu kagulu kakuyowoya chiyowoyero cha Chiviyetinamu, ndipo niliko nekha mubali mulara. Ŵanthu ŵanandi awo ŵakuyowoya Chiviyetinamu, ŵakuzizwa chomene kuti nili kusambira chiyowoyero chawo. Kanandi ŵakunichema mu nyumba zawo, ndipo nkhusambira nawo Baibolo. Ŵanyake awo nkhasambiranga nawo ŵali kubatizika.”—Yaniskani na Milimo 2:7, 8.

9. Kasi ntchito yakuzgora ŵanthu kuŵa ŵasambiri yikutovwira wuli?

9 Ntchito yakuzgora ŵanthu kuŵa ŵasambiri njiwemi chomene. Yikutovwira kuti tiŵe na mikhaliro yiwemi, tiŵe ŵaluso pakuyowoya na ŵanthu, tiŵe na chikanga ndiposo ŵakuzika. (Zinth. 21:5; 2 Tim. 2:24) Kweniso ntchito iyi njakukondweska chomene, chifukwa yikutovwira kumanya makora Malemba agho ghakulongosora ivyo tikugomezga. Yikutovwiraso umo tingagwilira ntchito na Yehova.—1 Kor. 3:9.

10. Kasi mungachita wuli kuti mukondwenge pakupharazga mu chigaŵa icho ŵanthu ŵakukhumba yayi kusambira unenesko?

10 Mungakondwa na ntchito yakupharazga mu chigaŵa chinu nangauli ŵanthu ŵachoko waka ndiwo ŵakutegherezga makani ghawemi. Ntchito yakupharazga yikukhumba kukolerana. Mpingo wose ukupenja ŵanthu awo ŵakukhumba kusambira unenesko. Nangauli mubali panji mudumbu yumoza ndiyo wangasanga munthu uyo pamanyuma wangaŵa Kaboni, kweni tose tikukondwa para tikuchitako ntchito ya kupenja awo ŵakukhumba kumanya unenesko. Mwachiyelezgero, Brandon wakachita upayiniya vyaka 9 mu chigaŵa icho ŵanthu ŵakakhumbanga yayi kusambira unenesko. Iyo wakati: “Nkhutemwa chomene kupharazga makani ghawemi chifukwa ni ntchito iyo Yehova wanituma. Nkhamba upayiniya nati namalizga waka sukulu. Nkhutemwa kuchiska ŵabali ŵachinyamata mu mpingo withu na kuwona umo ŵakukulira mwauzimu. Nkhati nasambira Sukulu Yakusambizga Baibolo ya Ŵabali Ŵambura Kutora, ŵakanituma ku malo ghanyake uko nkhachitanga upayiniya. Mbunenesko kuti ku chigaŵa ichi nindasambirepo na munthu m’paka kubatizika, nga umo vikaŵira ku ŵanyane. Kweni nkhukondwa kuti nkhasankha makora. Lekani nili na mwaŵi wa kupharazga mwakukwana.”—Muph. 11:6.

 MUNGACHITA VINANDI PARA MWASANKHA MAKORA

11. Kasi ŵachinyamata ŵanandi ŵakukondwa na vichi?

11 Tingateŵetera Yehova mu nthowa zinandi. Mwachiyelezgero, ŵachinyamata ŵanandi ŵakujipeleka pa ntchito yakuzenga. Pakukhumbikwa Nyumba za Ufumu zinandi. Ntchito yakuzenga mbuteŵeti wakupatulika uwo ukuchindika Chiuta. Kweniso tikukondwa para tikuchitako. Nga umo vikuŵira na mauteŵeti ghose, tikukondwa para tikugwira ntchito iyi na Ŵakhristu ŵanyithu. Ntchito yakuzenga njiwemi chomene. Yikutisambizga kuŵa na njuŵi yiwemi, kulimbikira ntchito, kweniso kuti tikoleranenge na awo ŵakutilongozga.

Awo ŵakuchita uteŵeti wanyengozose ŵakulindilira vitumbiko vinandi (Wonani ndime 11-13)

12. Kasi pali uwemi wuli para tamba upayiniya?

12 Mubali Kevin wakati: “Kufuma waka pa wana, nkhakhumbanga chomene kuteŵetera Yehova. Apo nkhaŵa na vyaka 19 nkhamba upayiniya. Nkhagwiranga ntchito mazuŵa ghachoko waka na mubali munyake uyo wakazenganga nyumba kuti nisange vyakukhumbikwira. Nkhasambira kukhoma nyumba, kuŵika magilasi mu mawindo, kweniso kuŵika vijaro. Pamanyuma, ine na ŵabali ŵanyake tikawovwira kuzengaso Nyumba za Ufumu, na nyumba za ŵabali izo zikanangika na chimphepo chikuru cha hurricane. Tikachita ntchito iyi vyaka viŵiri. Nkhati napulika kuti ku South Africa ŵakukhumba ŵabali awo ŵakumanya kuzenga, nkhasayina mafomu ndipo ŵakanitora. Kuno ku Africa, para tamara kuzenga Nyumba ya Ufumu kwa masabata ghachoko waka, tikulutaso ku malo ghanyake. Awo tikuzengera lumoza tili nga ni banja limoza. Tikukhala pamoza, tikusambira lumoza Baibolo, na kugwilira lumoza ntchito. Kweniso nkhukondwa kuti sabata yiliyose tikupharazgira lumoza na ŵabali ku mpingo. Pasono nkhukondwa kuti nkhasankha makora apo nkhaŵa munyamata. Nkhamanyanga yayi kuti ndimo vingazakaŵira.”

13. Chifukwa wuli ŵachinyamata ŵakukondwa na uteŵeti wa pa Beteli?

13 Ŵanyake ŵali kufiska ivyo ŵakasankha kuti  ŵateŵetere Yehova, ndipo pasono ŵakuteŵetera pa Beteli. Ntchakukondweska chomene kuteŵetera pa Beteli, chifukwa chilichose icho munthu wakuchita, wakuchitira Yehova. Awo ŵakuteŵetera pa Beteli ŵakovwira kuti ŵabali ku mpingo ŵasange chakurya chauzimu. Dustin uyo wakuteŵetera pa Beteli, wakati: “Apo nkhaŵa na vyaka 9 nkhamba kukhumba kuzakachita uteŵeti wanyengozose. Nkhati namalizga waka sukulu nkhamba upayiniya. Nati nachita upayiniya chaka chimoza na hafu, ŵakanichema ku Beteli. Nati nafika, nkhasambira kugwiliskira ntchito mashini ghakupurintira mabuku. Pamanyuma ŵakaniŵika ku dipatimenti ya vya makompyuta. Pa Beteli nili na mwaŵi wa kupulika umo ntchito yakupharazga yikwendera pa charu chose. Nkhukondwa kuteŵetera pa Beteli chifukwa ntchito iyo tikugwira yikovwira ŵanthu kuti ŵasendelere kwa Yehova.”

KASI MUKUKHUMBA KUZAKACHITA VICHI MUNTHAZI?

14. Kasi mungachita wuli kuti mwambe uteŵeti wanyengozose?

14 Kasi mungachita wuli kuti kunthazi muzakachite uteŵeti wanyengozose? Mikhaliro yauzimu ndiyo njakuzirwa chomene ndipo yingamovwirani kuti muzakachite makora uteŵeti uwu. Ntheura mulimbikirenge kusambira Mazgu gha Chiuta. Mughanaghanirengepo ivyo mukusambira, na kuzgorapo pa maungano, kulongora kuti muli na chipulikano. Para mukusambira sukulu, muphalirengeko ŵanyinu makani ghawemi mwakuti muŵe na maluso. Mufwatukenge na ŵanthu. Muŵafumbenge mafumbo mwaluso na kutegherezga ivyo ŵakuzgora. Kweniso muchitengeko ntchito za pa mpingo, nga nkhutozga na kunozga Nyumba ya Ufumu. Yehova wakukondwa kugwiliskira ntchito ŵanthu ŵakujiyuyura kweniso ŵakujipeleka. (Ŵerengani Salimo 110:3; Mil. 6:1-3) Mpositole Paulosi wakachema Timote kuti ŵalutire lumoza ku umishonale chifukwa “ŵabali ŵakamulumbanga chomene.”—Mil. 16:1-5.

15. Kasi mungachita wuli kuti musange vyakukhumbikwa pa umoyo?

15 Awo ŵakuchita uteŵeti wanyengozose ŵakwenera kugwira ntchito kuti ŵasange vyakukhumbikwa pa umoyo. (Mil. 18:2, 3) Panji mungachita kosi ya nyengo yifupi iyo yingamovwirani kusanga ntchito iyo yingamupani mpata kuti muchitenge uteŵeti. Apo mukusankha kosi, mungafumba vinandi kwa mulaŵiliri winu wa dera kweniso ŵapayiniya ŵa mu dera linu. Ŵafumbani ntchito iyo ŵapayiniya ŵangafiska kugwira. Baibolo likuti: “Peleka kwa Yehova chose icho ukuchita, ndipo ivyo ukughanaghana vikwenderenge makora.”—Zinth. 16:3; 20:18.

16. Kasi kuchita uteŵeti wanyengozose apo muli ŵachinyamata kungazakamovwirani wuli munthazi?

16 Gomezgani kuti Yehova wakukhumba kuti ‘mukoleske’ umoyo wakukondweska wa munthazi. (Ŵerengani 1 Timote 6:18, 19.) Awo ŵakuchita uteŵeti wanyengozose ŵakuŵa na mwaŵi wa kuchezga na ŵabali ŵakukhwima mwauzimu awo nawo ŵakuchita uteŵeti. Ŵanandi ŵawona kuti nthengwa yawo yikwenda makora chifukwa ŵakamba kuteŵetera Yehova apo ŵakaŵa ŵachinyamata. Kanandi awo ŵakachitanga upayiniya pambere ŵandanjire mu nthengwa, ŵakulutilira kuchita upayiniya lumoza na munyawo wa mu nthengwa.—Rom. 16:3, 4.

17, 18. Kasi mukwenera kughanaghanira vichi para mukusankha vyakuchita?

17 Mukwenera kughanaghanirapo ivyo mukukhumba kuzakachita munthazi. Lemba la Salimo 20:4 likuti: “Wakupe ivyo mtima wako ukukhumba, ndipo wakovwire kuti vyose ivyo ukughanaghana vikwendere makora.” Ntheura ghanaghanirani ivyo mukukhumba kuchita pa umoyo winu. Ghanaghanirani ivyo Yehova wakuchita sono, na ivyo imwe mungachita kuti mumuteŵetere. Pamanyuma, ghanaghanirani ivyo mungachita kuti mumukondweske.

18 Muzamukondwa chomene para muteŵeterenge Yehova mwakukwana, chifukwa ni nthowa yimoza yakulumbira Chiuta. Baibolo likuti: “Ukondwere chomene mwa Yehova, ndipo wakupenge ivyo mtima wako ukukhumba.”—Sal. 37:4.

^ ndime 7 Pasono yikuchemeka Sukulu ya Ŵapharazgi ŵa Ufumu.