Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Gongwe la Mulinda—Lakusambira pa Mpingo  |  July 2017

Chifukwa Wuli Tikwenera ‘Kulumba Ya’?

Chifukwa Wuli Tikwenera ‘Kulumba Ya’?

“Lumbani Ya! . . . Ntchakukondweska na chakwenelera nadi kumulumba.”—SAL. 147:1.

SUMU: 104, 152

1-3. (a) Kasi Salimo 147 likwenera kuti likalembeka pauli? (b) Kasi Salimo 147 lingatisambizga vichi?

KANANDI tikulumba munthu uyo wachita makora chinthu chinyake, panji wali na nkharo yiwemi chomene. Usange ŵanthu tikuŵalumba, ipo tikwenera kulumba chomene Yehova Chiuta. Tingamulumba chifukwa ivyo wali kulenga vikulongora kuti wali na nkhongono chomene. Tikumulumbaso chifukwa cha umo wakuchitira na ŵanthu mwachitemwa. Kweniso wali kupeleka mwana wake kuŵa sembe yakuwombora.

2 Uyo wakalemba Salimo 147 wakalumba Yehova. Kweniso wakachiska ŵanyake kuti nawo ŵalumbenge Chiuta.—Ŵerengani Salimo 147:1, 7, 12.

3 Tikumanya yayi uyo wakalemba Salimo 147. Kweni uyo wakalemba Salimo ili, wakwenera kuti wakaŵako mu nyengo iyo Yehova wakawezgera Ŵaisrayeli ku Yerusalemu kufuma ku wuzga ku Babuloni. (Sal. 147:2) Wamasalimo wakalumba Yehova chifukwa ŵanthu ŵa Chiuta ŵakaweleraso kukwawo kuti ŵakambireso kusopa kwaunenesko. Kweniso wakayowoya vifukwa vinyake ivyo wakalumbira Yehova. Kasi vikaŵa vifukwa wuli? Kasi muli na vifukwa wuli ivyo  mungachemerezgera kuti “Aleluya!” pa umoyo winu?—Sal. 147:1, mazgu ghamusi.

YEHOVA WAKUCHIZGA ŴAKUSWEKA MTIMA

4. Kasi Ŵaisrayeli ŵakwenera kuti ŵakajipulika wuli apo Fumu Sayirasi yikaŵafumiska ku wuzga? Ndipo chifukwa wuli?

4 Ghanaghanirani umo Ŵaisrayeli ŵakwenera kuti ŵakajipulikiranga apo ŵakaŵa ku wuzga ku Babuloni. Awo ŵakakora wuzga Ŵaisrayeli ŵakatenge: “Tiyimbiranipo sumu ya ku Ziyoni.” Panyengo iyo, Yerusalemu wakaŵa kuti wabwanganduka ndipo pakaŵavya chifukwa chakuti ŵakondwere. (Sal. 137:1-3, 6) Ntheura Ŵayuda ŵakakana kwimba. Ŵakaŵa na chitima, ndipo ŵakakhumbanga kupembuzgika. Kweni nga umo uchimi ukayowoyera, Yehova wakaponoska ŵanthu ŵake kwizira mwa Sayirasi, fumu ya Peresiya. Wakathereska Babuloni na kuyowoya kuti: “Yehova . . . wanituma kuti nimuzengere nyumba mu Yerusalemu. . . Ntheura waliyose wa ŵanthu ŵake uyo wali pakati pinu, Yehova Chiuta wake waŵe nayo, wakwelere ku Yuda.” (2 Mid. 36:23) Mazgu agha ghakwenera kuti ghakaŵapembuzga chomene Ŵaisrayeli awo ŵakaŵa ku Babuloni.

5. Kasi wamasalimo wakamanya vichi vyakukhwaskana na nkhongono za Yehova?

5 Yehova wakapembuzga mtundu wa Ŵaisrayeli pera yayi, wakapembuzgaso munthu waliyose payekha. Ndimo wakuchitiraso mazuŵa ghano. Wamasalimo wakalemba kuti, Chiuta “wakuchizga ŵakusweka mtima, wakukaka vilonda vyawo.” (Sal. 147:3) Yehova wakupwelelera nadi awo ŵali na masuzgo, kwali ŵakusuzgika maghanoghano panji ŵali na masuzgo ghanyake. Mazuŵa ghano, Yehova ngwakukhumbisiska kutipembuzga na kutichizga para tasuzgika maghanoghano. (Sal. 34:18; Yes. 57:15) Yehova wakutipa vinjeru kweniso nkhongono kuti tizizipizge masuzgo agho tikusangana nagho.—Yak. 1:5.

6. Kasi mazgu gha pa Salimo 147:4 ghangatovwira wuli? (Wonani chithuzithuzi chakwamba.)

6 Pamanyuma, wamasalimo wakayowoya vya kuchanya, wakati Yehova “wakupenda unandi wa nyenyezi. Yiliyose wakuyichema zina.” (Sal. 147:4) Chifukwa wuli wamasalimo uyu wakasintha nkhani na kwamba kuyowoya vya kuchanya? Ghanaghanirani fundo iyi: Wamasalimo wakawonanga nyenyezi, kweni wakamanyanga yayi unandi wake. Pasono, chiŵelengero cha nyenyezi izo tikuwona chikulutilira kukwera. Ŵasayansi ŵanyake ŵakughanaghana kuti chipingausiku cha Milky Way chili na nyenyezi mabiliyoni ghanandi chomene. Ndipo pakwenera kuti pali vipingausiku matililiyoni ghanandi. Ise tingamanya yayi unandi wa nyenyezi. Kweni Yehova uyo ni Mlengi, wakumanya nyenyezi yiliyose na kuyichema zina. Fundo iyi yikulongora kuti nyenyezi yiliyose njakuzirwa kwa Yehova. (1 Kor. 15:41) Wuli pakuyowoya za ŵanthu ŵake pa charu chapasi? Pakuti Chiuta wakumanya apo pali nyenyezi yiliyose, ntheura wakumanya munthu waliyose payekha. Wakumanya apo munthu waliyose wali, umo wakujipulikira, kweniso ivyo wakukhumbikwira.

7, 8. (a) Kasi Yehova wakughanaghanira vichi pakovwira ŵanthu ŵake para ŵasangana na viyezgo? (b) Longosorani umo Yehova wakulongolera lusungu para wakovwira taŵanthu ŵakwananga.

7 Yehova wakuwona waka kuti muli ŵakuzirwa yayi, kweniso wakumovwirani para mwasangana na masuzgo, chifukwa wali na nkhongono kweniso ngwalusungu. (Ŵerengani Salimo 147:5.) Nyengo zinyake mungajipulika kuti suzgo linu ndikuru chomene kweniso mungazizipizga yayi. Chiuta wakumanya ivyo tingatondeka kufiska chifukwa “wakukumbuka kuti tili fuvu.” (Sal. 103:14) Pakuti tili ŵakwananga, kanandi tikubudiska vinthu vimoza na vimoza. Nyengo zinyake tikuŵayowoyera makora yayi ŵanyithu ndipo pamanyuma tikukwenyelera. Tikughanaghana panji kuchita vinthu viheni,  ndipo tikuchitira sanji ŵanyithu. Yehova wakuchita ivi yayi, kweni wakumanya makora umo ise tikujipulikira.—Yes. 40:28.

8 Mukwenera kuti muli kuwonapo nkhongono za Yehova apo wakamovwirani kuzizipizga chiyezgo chinyake. (Yes. 41:10, 13) Mudumbu Kyoko, uyo wakaŵa mupayiniya, wakagongowa chomene wati wamba uteŵeti uphya ku charu chinyake. Kasi Yehova wakalongora wuli kuti wakupulikiska masuzgo gha Kyoko? Wakati wamba uteŵeti uphya, Kyoko wakawona kuti wakaŵa na ŵabwezi awo ŵakamupulikiskanga. Wakajipulika nga Yehova wakumuphalira kuti: “Nkhukutemwa chifukwa chakuti ndiwe waka mupayiniya yayi, kweni chifukwa chakuti ndiwe mwana wane kweniso uli kujipeleka kwa ine. Nkhukhumba kuti ukondwenge chifukwa ndiwe yumoza wa Ŵakaboni ŵane.” Kasi Wankhongonozose wamulongorani wuli kuti “mahara ghake ngambura kupenjeka”?

YEHOVA WAKUTIPA IVYO TIKUKHUMBIKWIRA

9, 10. Kasi Yehova wakupeleka wovwiri wuli? Longosorani.

9 Nyengo zinyake mungakhumbikwira wovwiri wakuthupi. Mungenjerwa kuti mulije chakurya chakukwana. Kweni ni Yehova uyo wakalenga vyose ivyo vikovwira kuti mu charu mumere vyakurya, nanga ntchakurya cha ŵana ŵachaholi (chihoŵe). (Ŵerengani Salimo 147:8, 9.) Para Yehova wakulyeska ŵachaholi, tikwenera kugomezga kuti watipenge vinthu vyakuthupi ivyo tikukhumbikwira.—Sal. 37:25.

10 Chakuzirwa chomene ntchakuti, Yehova wakutipa chakurya chauzimu icho chikutipa “mtende wa Chiuta uwo ukuluska maghanoghano ghose.” (Fil. 4:6, 7) Wonani umo Mutsuo na muwoli wake ŵakawonera nkhongono za Yehova pamanyuma pa chimphepo cha tsunami icho chikachitika ku Japan mu 2011. Kuti ŵapone tsunami, ŵakakwera pachanya pa nyumba yawo. Kweni pa zuŵa ili, ŵakataya chilichose icho ŵakaŵa nacho. Ŵakagona mu chipinda chakuzizima chomene mu nyumba yawo iyo yikanangika na tsunami. Kwati kwacha namlenji, ŵakakhumbanga kukhozgeka mwauzimu. Kweni ŵakasanga waka Buku Lapachaka la Ŵakaboni ŵa Yehova. Mutsuo wakati wajura waka buku ili, wakafikira pa mutu wakuti, “Tsunami Yakofya Chomene Iyo Yindachitikepo.” Mutu uwu ukayowoyanga vya chindindindi icho chikachitika ku Sumatra mu 2004, icho chikapangiska tsunami iyo yindachitikepo kumanyuma kose. Mutsuo na muwoli wake ŵakaliranga apo ŵakaŵerenganga nkhani iyi. Ŵakajipulika kuti Chiuta wakuŵatemwa chifukwa wakaŵapa chakurya chauzimu chakwenelera pa nyengo iyo ŵakakhumbikwiranga nadi. Kweniso Yehova wakaŵawovwira mwakuthupi. Ŵabali ŵawo ŵauzimu ŵakaŵawovwira. Ŵakaŵapa vinthu vyakukhumbikwira. Kweni ŵakakhozgeka chomene apo gulu la Chiuta likatuma ŵabali ŵakufuma ku ofesi ya munthavi kuti ŵakakhozge mpingo wawo. Mutsuo wakati: “Nkhajipulika kuti Yehova wakaŵa pafupi na waliyose wa ise ndipo wakatipweleleranga. Yehova wakatipembuzga nadi.” Wovwiri ukuru uwo Chiuta wakupeleka ngwauzimu. Kweniso wakupeleka wovwiri wakuthupi.

CHIUTA WAKUTOVWIRA NA NKHONGONO ZAKE

11. Kasi tikwenera kuchita wuli kuti Chiuta watovwire?

11 Nyengo zose Yehova ngwakunozgeka kovwira na ‘kuwuska ŵakuzika.’ (Sal. 147:6a) Kweni kasi tikwenera kuchita wuli kuti watovwire? Tikwenera kuŵa paubwezi uwemi na iyo. Kuti ivi vichitike, tikwenera kuŵa ŵakuzika. (Zef. 2:3) Awo mbakuzika ŵakugomezga Chiuta kuti ndiyo wamazgenge vinthu viheni kweniso vinthu vyambura urunji ivyo vikuŵachitikira. Yehova wakukondwa na ŵanthu ŵanthena.

12, 13. (a) Kasi tikwenera kuchita vichi kuti Chiuta watovwire? (b) Kasi mbanjani awo Yehova wakukondwa nawo?

 12 Kweni Chiuta “ŵaheni wakuŵaponya pasi.” (Sal. 147:6b) Mazgu agha ngankhongono chomene. Kuti Yehova watitemwe kweniso kuti tizakapone, tikwenera kutinkha ivyo Yehova wakutinkha. (Sal. 97:10) Tikwenera kutinkha uzaghali. Ichi chikung’anamura kuti tikwenera kuleka chilichose icho chingatipangiska kuti tichite uzaghali, nga nkhuwonelera vithuzithuzi vyamuziro. (Sal. 119:37; Mat. 5:28) Nangauli ntchakusuzga kuchita nthena, kweni para tikuyezgayezga na kupulikira, Yehova watitumbikenge.

13 Kuti tileke kuchita viheni, tikwenera kugomezga Yehova, nkhongono zithu yayi. Kasi Yehova wangakondwa para tikugomezga “nkhongono za hachi,” panji kuti kugomezga ŵanthu? Yayi. Tikwenera yayi kugomezga “malundi ghankhongono gha munthu,” na kuchita nga tingajiponoska tekha panji ŵanthu ŵanyithu ndiwo ŵangatiponoska. (Sal. 147:10) Kweni tikwenera kugomezga Yehova na kumupempha kuti watovwire. Iyo wakupambana na ŵanthu. Wakuvuka yayi kupulika maŵeyelero ghithu nanga tingamupempha mwakuwerezgawerezga kuti watovwire. “Yehova wakukondwa na awo ŵakumopa, awo ŵakulindilira lusungu lwake.” (Sal. 147:11) Tikugomezga kuti wakutitemwa. Watitayenge yayi, ndipo walutilirenge kutovwira kuti tilimbane na makhumbiro ghaheni.

14. Kasi wamasalimo wakakhozgeka na vichi?

14 Yehova wakutipa vifukwa vyakukwana vyakugomezgera kuti wawovwirenge ŵanthu ŵake para ŵakukhumbikwira wovwiri. Apo wamasalimo wakaghanaghaniranga umo Yehova wakawovwilira Ŵaisrayeli kuti ŵawelere ku Yerusalemu, wakimbira sumu Chiuta kuti: “Wakukhozga mphingilizgo za vipata vya msumba wako. Wakutumbika ŵana ŵako mukati mwako. Wakupeleka mtende ku chigaŵa chako.” (Sal. 147:13, 14) Wamasalimo wakakhozgeka chomene nkhanira kuwona kuti Chiuta wakhozgenge mphingilizgo za vipata kuti wavikilire awo ŵakumusopa.

Kasi Mazgu gha Chiuta ghangatovwira wuli para takumana na masuzgo? (Wonani ndime 15-17)

15-17. (a) Kasi nyengo zinyake tingajipulika wuli para takumana na masuzgo? Kweni Yehova wakutovwira wuli na Mazgu ghake Baibolo? (b) Longosorani umo ‘Mazgu gha Chiuta ghakuchimbilira luŵiro.’

15 Nyengo zinyake namwe mungafipa mtima na masuzgo agho mungakumana nagho. Yehova wangamupani mahara kuti muzizipizge masuzgo. Wamasalimo wakayowoya kuti Chiuta “wakutuma dango lake ku charu chapasi. Mazgu ghake ghakuchimbira luŵiro.” Wamasalimo wakati wayowoya kuti Yehova ‘wakutuma chiwuvi, wakuchupura chiwuvi chakukhoma, wakuponya matalala,’ wakafumba kuti: “Ni njani wangima ku kuzizima kwake?” Wakayowoyaso kuti Yehova “wakutuma mazgu ghake, ndipo ghakusongonoka.” (Sal. 147:15-18) Chiuta withu wankhongonozose, uyo ngwavinjeru chomene kuluska waliyose, uyo wakupangiska matalala na chiwuvi, wangamovwirani kulimbana na masuzgo ghose agho mungakumana nagho.

16 Mazuŵa ghano Yehova wakutilongozga na Mazgu ghake, Baibolo. “Mazgu ghake ghakuchimbira luŵiro” mu nthowa yakuti, nyengo zose ngwakunozgeka kutipa ulongozgi wauzimu panyengo iyo tikukhumbikwira. Mukwenera kuti mukukhozgeka chomene para mukuŵerenga Baibolo, na kusambira mabuku agho “muzga wakugomezgeka na wavinjeru” wakutipa. Kweniso mukukhozgeka chomene para mukuwonelera JW Broadcasting, kuŵerenga nkhani pa webusayiti yithu, kudumbiskana na ŵalara, kweniso para mukuchezga na Ŵakhristu ŵanyinu. (Mat. 24:45) Kasi imwe mukuwona kuti Yehova wakutovwira luŵiro na ulongozgi wake?

17 Simone wajiwonera yekha umo Chiuta wamovwilira na Mazgu ghake. Pakwamba wakajiwonanga kuti ngwawakawaka. Wakakayikanga usange Chiuta wangamutemwa. Kweni apo  wakasuzgikanga na maghanoghano agha, wakamuŵeyelera chomene Yehova kuti wamovwire. Kweniso wakalimbikira chomene kusambira Baibolo. Iyo wakati: “Palije apo nkhuwona kuti Yehova wakaleka kunikhozga na kunovwira na ulongozgi wake.” Ivi vyamovwira chomene kuti walutilire kuchita makora na kuzizipizga masuzgo.

18. Chifukwa wuli mukuwona kuti Chiuta wakumutemwani? Chifukwa wuli mukwenera kuchemerezga kuti “Lumbani Ya!”?

18 Wamasalimo wakamanyanga kuti Chiuta wakasora mtundu wa Israyeli kuŵa ŵanthu ŵake. Ukaŵa mtundu wekha uwo Chiuta wakawupa “mazgu” ndiposo “malango na vyeruzgo vyake.” (Ŵerengani Salimo 147:19, 20.) Mazuŵa ghano, tatumbikika chomene kuti ndise pera tikumanyikwa na zina la Chiuta pa charu chose chapasi. Tili paubwezi na Yehova chifukwa tamumanya, na kuzomera kuti Mazgu ghake ghatilongozgenge. Kasi namwe muli na vifukwa vyakupulikikwa vyakuchemerezgera kuti “Lumbani Ya!,” na kuchiska ŵanyinu kuti nawo ŵachitenge nga ndimwe? Para muchitenge nthena, muyanenge waka na uyo wakalemba Salimo 147.