Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) JANUARY 2017

‘Vinthu Ivi Uvipeleke ku Ŵanthu Ŵakugomezgeka’

‘Vinthu Ivi Uvipeleke ku Ŵanthu Ŵakugomezgeka’

“Vinthu [ivi] . . . uvipeleke ku ŵanthu ŵakugomezgeka, awo ŵaŵengeso ŵakwenelera kusambizga ŵanyawo.”—2 TIM. 2:2.

SUMU: 123, 53

1, 2. Kasi ŵanthu ŵanandi ŵakuyiwona wuli ntchito yawo?

KANANDI ŵanthu ŵakumanyikwa na ntchito iyo ŵakugwira. Ŵanandi ŵakuchindika munthu chifukwa cha ntchito iyo wakugwira panji udindo wake. Kunyake, para ŵanthu ŵakukhumba kumanyana ŵakufumbana dankha fumbo lakuti, “Mukugwira ntchito wuli?”

2 Nyengo zinyake para Baibolo likuyowoya za ŵanthu, likuzunura ntchito iyo ŵakachitanga. Mwachiyelezgero, likuyowoya za “Mateyu wakusonkheska msonkho,” “Simoni, wakunyuka vikumba,” na “Luka, dokotala wakutemweka.” (Mat. 10:3; Mil. 10:6; Kol. 4:14) Ŵanthu ŵanyake ŵakumanyikwa na mauteŵeti panji maudindo agho ŵali nagho mu gulu la Yehova. Mu Baibolo tikuŵerenga za Themba Davide, ntchimi Eliya, na mpositole Paulosi. Ŵanalume aŵa ŵakawonanga kuti mauteŵeti agho Chiuta wakaŵapa ghakaŵa ghakuzirwa. Para nase tili na milimo mu gulu la Yehova, tikwenera kuyiwona kuti njakuzirwa chomene.

3. Chifukwa wuli ŵabali ŵalara msinkhu ŵakwenera kusambizga ŵachinyamata? (Wonani chithuzi chakwamba.)

3 Taŵanandi tikuyitemwa ntchito yithu ndipo tingatemwa kuti  tilutilirenge waka kuyigwira. Kweni chachitima ntchakuti kufuma waka mu nyengo ya Adamu, ŵanthu ŵakuchekura na kufwa, ndipo pakwiza ŵanyake. (Muph. 1:4) Mazuŵa ghano, Ŵakhristu ŵaunenesko ŵakusangana na masuzgo chifukwa cha uchekuru na nyifwa. Ntchito ya ŵanthu ŵa Yehova yikukura chomene ndipo yikukhumba vinandi. Apo tikwamba kuchita milimo yinyake, tikwenera kusambira umo ntchito iyo yikwendera. Kanandi tikugwiliskira ntchito vinthu panji makina ghaphya. Kanandi makina ghakusuzga kughasambira. Ŵabali ŵanyake ŵachekuru panji ŵalara msinkhu, vingaŵasuzga kusambira vinthu vyasono. (Luka 5:39) Nanga ŵabali aŵa ŵangasambira kugwiliskira ntchito vinthu ivi, kweni ŵachinyamata mbankhongono kuluska iwo. (Zinth. 20:29) Pa chifukwa ichi, ntchamahara kuti ŵawovwirenge ŵachinyamata kuti ŵazakachite milimo yawo munthazi.—Ŵerengani Salimo 71:18.

4. Chifukwa wuli ŵanyake vikuŵasuzga kulekera ŵanyawo udindo? (Wonani bokosi la mutu wakuti, “ Icho Ŵanyake Ŵakulekera Kupeleka Milimo ku Ŵanyawo.”)

4 Nyengo zinyake awo ŵali na maudindo vingaŵasuzga kulekera ŵachinyamata. Ŵanyake ŵakopa kuti ŵangaluza udindo uwo ŵakutemwa. Ŵanyake ŵakopa kuti para ŵalongozgenge mbanyake, vinthu vyendenge makora yayi. Kweni ŵanyake ŵangaghanaghana kuti ŵalije nyengo yakusambizgira ŵanyawo. Ŵanyamata ŵakwenera kuchimbilira yayi para ŵandapike uteŵeti.

5. Kasi tizgorenge mafumbo wuli mu nkhani iyi?

5 Nkhani yakulekera ŵanyithu milimo yili na vigaŵa viŵiri. Chakwamba, kasi ŵabali ŵalara msinkhu ŵangawovwira wuli ŵanyamata kuti ŵazakachite makora milimo yawo kunthazi, ndipo chifukwa wuli ntchakuzirwa? (2 Tim. 2:2) Chachiŵiri, chifukwa wuli ntchakuzirwa kuti ŵanyamata ŵaŵenge na ntchindi apo ŵakovwira ŵabali ŵalara msinkhu mwakuti ŵasambireko? Tiyeni tiwone dankha umo Themba Davide likawovwilira mwana wake kuti wachite ntchito yakuzirwa.

DAVIDE WAKAKHOZGA NA KOVWIRA SOLOMONI

6. Kasi Themba Davide likakhumbanga kuchita vichi, kweni Yehova wakati wuli?

6 Davide wakati wabisama muthondo vyaka vinandi, wakaŵa themba ndipo wakamba  kukhala mu nyumba yiwemi chomene. Wakakwenyeleranga kuti wakaŵa wandazenge “nyumba” panji tempile la Yehova, ndipo wakakhumbanga kuzenga. Wakaphalira ntchimi Natani kuti: “Wona, ine nkhukhala mu nyumba ya makuni gha sidara apo likasa la phangano la Yehova lili mu salu za mahema.” Natani wakazgora kuti: “Chitani chilichose icho chili mu mtima winu, pakuti Chiuta waunenesko wali namwe.” Kweni Yehova wakaŵa na maghanoghano ghanyake. Wakaphalira Natani kuti waphalire Davide kuti: “Ndiwe yayi unizengerenge nyumba yakuti nikhalemo.” Nangauli Yehova wakasimikizgira Davide kuti walutilirenge kumutumbika, kweni wakati Solomoni, mwana wake, ndiyo wazamuzenga tempile. Kasi Davide wakachita wuli wati wapulika nthena?—1 Mid. 17:1-4, 8, 11, 12; 29:1.

7. Kasi Davide wakachita wuli apo Yehova wakakana kuti wamuzengere tempile?

7 Davide wakawovwirapo pakuzenga tempile, nangauli wakamanyanga kuti wazamulumbikirapo yayi. Tempile likati lazengeka, likachemekanga tempile la Solomoni, la Davide yayi. Nangauli panji Davide wakakwenyelera kuti ivyo wakakhumbanga vikafiskika yayi, kweni wakawovwira chomene pa ntchito yakuzenga tempile ili. Wakasanga ŵantchito na kuwunjika visulo, mkuŵa, siliva, golide, na mathabwa gha sidara. Kweniso wakakhozga Solomoni, wakati: “Sono, iwe mwana wane, Yehova waŵe nawe, ndipo vinthu vikwendere makora, uzengere nyumba Yehova Chiuta wako, nga umo wayowoyera vya iwe.”—1 Mid. 22:11, 14-16.

8. Chifukwa wuli Davide mphanyi wakaghanaghana kuti Solomoni wangakwaniska yayi ntchito iyo Yehova wakamupa? Kweni kasi wakachita vichi?

8 Ŵerengani 1 Midauko 22:5. Davide waŵenge munthu munyake, mphanyi wakaghanaghana kuti Solomoni ni mwana, wangakwaniska yayi kwendeska ntchito yikuru nthena. Nakuti tempile likaŵa ‘likuru chomene’ ndipo pa nyengo iyo Solomoni wakaŵa ‘muchoko ndipo wakamanyanga vinandi yayi.’ Kweni Davide wakamanya kuti Yehova wamovwirenge Solomoni kuti wachite ntchito iyi. Davide wakaŵika mtima pa kuchita ivyo wangakwaniska kuti wawovwirepo. Wakawunjika vinthu vinandi kuti ŵazakazengere tempile.

SAMBIZGANI ŴANYINU KUTI MUŴE ŴAKUKONDWA

Ntchakukondweska kuwona ŵanyamata ŵakujipeleka (Wonani ndime 9)

9. Kasi ŵabali ŵalara msinkhu ŵakwenera kujipulika wuli para ŵakulekera ŵanyamata vyakuchita? Yowoyani chiyelezgero.

9 Ŵabali ŵalara msinkhu ŵakwenera kuchita sanji yayi para ntchakukhumbikwa kuti ŵapeleke milimo yawo ku ŵanyamata. Para ŵanyamata tikuŵasambizga kuchita milimo yinandi mu mpingo ndikuti tikughanaghanira mpingo. Ŵalara ŵakwenera kukondwa para ŵanyamata ŵasambizgika makora ndipo mbakwenelera kuchita milimo iyo iwo ŵakuchita. Tiyelezgere kuti mupapi wakusambizga mwana wake kwendeska galimoto. Para mwana uyu ni muchoko chomene, iyo wakulaŵilira waka apo awiske ŵakwendeska galimoto. Para wakurako, dada wakwamba kumulongosolera ivyo  wakuchita. Para mwana wafika pa msinkhu wakuti wangendeska, iyo ndiyo wakwendeska, uku adada ŵake ŵakumusambizga tunyake na tunyake. Nyengo zinyake ŵakusinthana pakwendeska. Para pajumpha nyengo, kanandi mwana ndiyo wakwendeska. Para dada wachekura wakulekera waka mwana kuti ndiyo wendeskenge. Dada wamahara wakukondwa para mwana wake wakuchita ntchito iyo wakachitanga ndipo wakumugomezga. Ŵabali ŵalara msinkhu nawo ŵakukondwa para ŵasambizga ŵanyamata kuti ŵaŵapokere milimo mu mpingo.

10. Kasi Mozesi wakaziwonanga wuli ntchindi na mazaza?

10 Ŵabali ŵalara msinkhu ŵakwenera yayi kuŵa na sanji. Wonani umo Mozesi wakachitira apo ŵanalume ŵanyake mu msasa wa Israyeli ŵakamba kuchita nga ni ntchimi. (Ŵerengani Maŵazgo 11:24-29.) Joshuwa, uyo wakawovwiranga Mozesi wakakhumbanga kuŵakanizga. Iyo wakawona nga ŵapokenge mazaza gha Mozesi. Kweni Mozesi wakazgora kuti: “Kasi ukuchita sanji mu malo gha ine? Ine ningatemwa kuti ŵanthu wose ŵa Yehova ŵaŵe ntchimi, chifukwa Yehova waŵikenge mzimu wake pa iwo.” Iyo wakamanya kuti Yehova wakaŵa na ŵanalume ŵara. Mozesi wakakhumba yayi kujipenjera ntchindi ndipo wakati wangatemwa kuti mzimu wa Yehova uŵeso pa ŵateŵeti ŵanyake ŵa Yehova. Kasi tingatemwa kuti ŵanyithu ŵachitenge milimo iyo tate tichitenge nga umo wakachitira Mozesi?

11. Kasi mubali munyake wakati wuli pa nkhani ya kulekera ŵanyake udindo?

11 Mazuŵa ghano, pali ŵabali ŵanandi awo ŵateŵetera Yehova vyaka vinandi ndipo ŵawovwira ŵanyawo kuti ŵachitenge vinandi mu mpingo. Mubali uyo zina lake ni Peter wachita uteŵeti wanyengozose vyaka 74. Wateŵetera pa ofesi ya Ŵakaboni ŵa Yehova ku Europe vyaka 35. Wakaŵa mulaŵiliri wa Dipatimenti ya Uteŵeti kumanyuma kose uku. Kweni sono, wachinyamata munyake zina lake Paul ndiyo wakuchita mulimo uwu. Mubali Paul wakateŵetera lumoza na Peter vyaka vinandi. Apo Peter wakafumbika umo wakajipulikira wati waleka kuŵa mulaŵiliri wa dipatimenti iyi, iyo wakati, “Nkhukondwa chomene kuwona kuti pali ŵabali awo ŵali kusambizgika kuchita milimo yikuru nga ni iyi ndipo ŵakuchita makora milimo yawo.”

CHINDIKANI ŴABALI ŴALARA MSINKHU MU MPINGO

12. Kasi nkhani ya Rehobowamu yikutisambizga vichi?

12 Solomoni wakati wafwa, mwana wake Rehobowamu ndiyo wakaŵa fumu. Apo Rehobowamu wakakhumbanga mahara kuti wendeske makora vinthu, wakafumba dankha ŵanalume ŵalara msinkhu. Kweni wakapulikira yayi ivyo ŵakamuphalira. Wakalondezga ivyo ŵakamuphalira ŵanyamata ŵanthanga yake awo ŵakaŵa ŵateŵeti ŵake. Vinthu vikamara makora yayi. (2 Mid. 10:6-11, 19) Tikusambirapo vichi? Ntchamahara kufumba ŵabali ŵalara msinkhu na kulondezga ulongozgi wawo chifukwa ŵakumanya vinandi. Nangauli ŵachinyamata ŵakwenera kuchichizgika yayi kwendeska vinthu nga umo vikenderanga kale, kweni ŵakwenera kughanaghanirapo ivyo ŵabali ŵalara msinkhu ŵakuŵaphalira.

13. Kasi ŵachinyamata ŵangawovwirana wuli na ŵabali ŵalara msinkhu?

13 Ŵachinyamata ŵanyake ŵakulaŵilira milimo ya ŵabali ŵanyake, na awo mbalara msinkhu wuwo. Ŵachinyamata aŵa ŵangachita makora kufumba mahara ku ŵabali ŵalara msinkhu pakuchita vinthu. Paul, uyo tamuzura mu ndime 11 kuti wakatora malo gha Peter ndipo wakamba kulaŵilira dipatimenti pa Beteli wakati, “Kanandi nkhafumbanga mahara kwa Peter, ndipo nkhuphalirako ŵanyane mu dipatimenti kuti nawo ŵafumbenge kwa iyo.”

14. Kasi tikusambirako vichi kwa Paulosi na Timote para tikuwona umo ŵakagwilira ntchito mwakukolerana?

 14 Timote, uyo wakaŵa wachinyamata, wakateŵetera na mpositole Paulosi vyaka vinandi. (Ŵerengani Ŵafilipi 2:20-22.) Paulosi wakalembera Ŵakorinte kuti: “Nkhumutumirani Timote, pakuti ni mwana wane wakutemweka na wakugomezgeka mu Fumu. Ndipo wazamumukumbuskani nthowa zane pakuteŵetera Khristu Yesu, nga umo nkhusambizgira kulikose mu mpingo uliwose.” (1 Kor. 4:17) Nangauli mazgu agha ngachoko waka, kweni ghakulongora kuti Paulosi na Timote ŵakakolerananga chomene. Paulosi wakapatura nyengo kusambizga Timote “nthowa [zake] pakuteŵetera Khristu.” Timote wakasambira makora ndipo Paulosi wakamutemwanga chomene. Paulosi wakaŵa na chigomezgo chose kuti Timote wawovwirenge ŵabali mu mpingo wa Korinte. Ŵalara mazuŵa ghano ŵakwenera kuchita nga ni Paulosi pakusambizga ŵachinyamata mu mpingo.

TOSE TIKWENERA KUCHITAPO KANTHU

15. Kasi ulongozgi uwo Paulosi wakaphalira Ŵakhristu ku Romu ungatovwira wuli para vinthu vyasintha?

15 Tili mu nyengo yapadera chomene. Chigaŵa cha pa charu chapasi cha gulu la Yehova chikukura, ndipo pali vinandi ivyo vikusintha. Para vinthu vyasintha, tiyeni tijiyuyure, ndipo tileke kughanaghana vya ise pera kweni vya mulimo wa Yehova. Para tikuchita nthena, mpingo ukuŵa wakukolerana. Paulosi wakalembera Ŵakhristu ŵa mpingo wa Romu kuti: “Nkhuphalira waliyose wa imwe kuti waleke kujighanaghanira mwakujumphizga kuluska umo wakwenera kughanaghanira. Kweni waghanaghanenge mwakwenelera, kuyana na chipulikano icho Chiuta wamupa. Chifukwa nga umo thupi liliri na viŵaro vinandi, kweni viŵaro vyose vili na ntchito yakuyana yayi, ntheura nase, nangauli tili ŵanandi, tili thupi limoza mwa Khristu.”—Rom. 12:3-5.

16. Kasi ŵalara msinkhu, ŵanyamata, na ŵawoli ŵakwenera kuchita wuli kuti gulu la Yehova lendenge makora?

16 Tiyeni tose tikhozgere mulimo wa Ufumu wa Yehova nanga vinthu vingasintha. Mwaŵalara msinkhu, tikumupemphani kuti musambizgenge ŵanyamata. Mwaŵanyamata, tikumupemphani kuti muzomerenge milimo iyo ŵakumupani, jiyuyurani, ndipo chindikani ŵabali ŵalara msinkhu. Mwaŵawoli, chitani nga ni Prisila, muwoli wa Akwila, uyo nyengo zose wakendanga na mfumu wake na kumovwira para vinthu vyasintha.—Mil. 18:2.

17. Kasi Yesu wakalongora wuli kuti wakuŵagomezga ŵasambiri ŵake, ndipo wakaŵasambizga vichi?

17 Pa ŵanthu wose Yesu ndiyo tikusambirako vinandi chomene pa nkhani yakusambizga ŵanyake. Iyo wakamanyanga kuti uteŵeti wake pa charu chapasi umarenge ndipo ŵanyake ndiwo ŵazamulutizga. Nangauli ŵasambiri ŵake ŵakaŵa ŵambura kufikapo, kweni wakaŵagomezganga ndipo wakaŵaphalira kuti ŵazamuchita vinandi kuluska iyo. (Yoh. 14:12) Wakaŵasambizga mwakukwana, ndipo ŵakapharazga makani ghawemi mu charu chose pa nyengo yira.—Kol. 1:23.

18. Kasi tikulindilira vichi munthazi, ndipo ni vichi ivyo tingachita sono?

18 Yesu wakati wafwa, wakawuka na kuluta kuchanya. Wati wafika kuchanya, wakapika mulimo ukuru chomene “kuluska maboma ghose, mazaza, nkhongono, [na] muwuso.” (Efe. 1:19-21) Para tingafwa ŵakugomezgeka pambere Aramagedoni yindize, tizamuwuskika na kukhala mu charu chiphya umo tizamuŵa na ntchito zinandi zakukondweska. Kweni panyengo yasono tili na ntchito yakuzirwa chomene iyo tose tikwenera kuchita. Ntchito iyi nkhupharazga makani ghawemi na kovwira ŵanthu kuti ŵaŵe ŵasambiri. Kwali ndise ŵana panji ŵalara, tiyeni tose tiŵe “na vyakuchita vinandi mu mulimo wa Fumu.”—1 Kor. 15:58.