Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

GONGWE LA MULINDA (LAKUSAMBIRA PA MPINGO) JANUARY 2016

Burnett, Simone, Eston, na Caleb

Ŵakajipeleka na Mtima Wose Mu Oceania

Ŵakajipeleka na Mtima Wose Mu Oceania

MUDUMBU RENA wali na vyaka vyakujumpha 30. Wakakulira mu mbumba ya Ŵakaboni ŵa Yehova ku Australia. Iyo wakati: “Kanandi tikasamanga kuti tikateŵetere uko kukakhumbikwiranga ŵapharazgi ŵanandi ŵa Ufumu. Adada na amama ŵakaŵa ŵamasangulusko panji kuti ŵakuchezgeka chomene. Nati nababa ŵana ŵane ŵaŵiri, nkhakhumbanga kuti nawo ŵakure na umoyo wanthena.”

 Shane, mfumu wa Rena, wali na vyaka vyakujumpha 36, ndipo nayo wakakhumbanga kuteŵetera uko kukukhumbikwira ŵapharazgi ŵanandi. Iyo wakati: “Tikati taŵa na mwana wachiŵiri, tikaŵazga nkhani yinyake mu Gongwe la Mulinda iyo yikalongosora za mbumba iyo yikasamira ku virwa vya Tonga kukapharazga. * Nkhani iyi yikatichiska kuti tilembe kalata ku ofesi ya ku Australia na New Zealand, kuti ŵatiphalire uko kukukhumbikwira ŵapharazgi ŵanandi ŵa Ufumu. * Tikapempheka kuti tisamire ku virwa vya Tonga.”

Jacob, Reneé, Skye, na Shane

Shane, Rena, pamoza na ŵana ŵawo, Jacob na Skye, ŵakati ŵakhala ku Tonga kwa chaka chimoza, ŵakawelera ku Australia chifukwa cha vivulupi. Kweni ŵakalutilira kuŵa na mtima wakupharazga uko kukukhumbikwira ŵapharazgi ŵanandi. Mu 2011, ŵakasamira ku Norfolk Island. Kufuma ku Australia kukafika ku chigaŵa ichi, ni mtunda wa makilomita 1,500. Kasi vikaŵendera wuli? Pasono, Jacob wali na vyaka 14. Iyo wakati: “Yehova wakatipwelelera chomene, ndipo wakatovwira kuti tikondwenge na uteŵeti.”

KUTEŴETERA NA BANJA

Nga ni Shane, Rena na ŵana ŵawo, Ŵakaboni ŵa Yehova ŵanandi ŵakujipeleka kukateŵetera uko kukukhumbikwira ŵapharazgi ŵa Ufumu ŵanandi. Chifukwa wuli ŵakuchita nthena?

Burnett wakati: “Ŵanthu ŵanandi ŵakakhumbanga kupulika makani ghawemi. Ntheura tikakhumbanga kuŵasambizga Baibolo.”

Burnett na Simone, ŵali na vyaka vyakujumpha 30. Iwo na ŵana ŵawo ŵaŵiri, Eston wa vyaka 12, na Caleb wa vyaka 9, ŵakasamira ku Burketown, ku Queensland, Australia. Burnett wakati: “Ŵakaboni ŵakafikanga ku malo agha kamoza pa vyaka vitatu panji vinayi. Kweni ŵanthu ŵanandi ŵakakhumbanga kupulika makani ghawemi. Ntheura tikakhumbanga kuŵasambizga Baibolo.”

Jim, Jack, Mark, na Karen

Mark na Karen, awo ŵali na vyaka vyakujumpha 50, ŵakateŵetera mu mipingo yinandi yakufupi na Sydney, Australia. Pamanyuma, iwo na ŵana ŵawo ŵatatu, Jessica, Jim, na Jack, ŵakasamira ku Nhulunbuy, Northern Territory. Mark wakati: “Nkhutemwa chomene ŵanthu, lekani nkhakhumbanga kusamira ku chigaŵa cha mpingo uwo ukukhumbikwira wovwiri.” Kweni Karen wakakayikiranga vyakusamuka. Karen wakati: “Mark na ŵabali ŵanyake ŵakati ŵanikhozga, nkhakhumbanga kuti niyezge. Pasono ndine wakukondwa kuti tikasama.”

Benjamin, Jade, Bria, na Carolyn

Benjamin na Carolyn ŵali na ŵana ŵaŵiri, Jade na Bria. Mu 2011, pambere ŵana ŵawo ŵandambe sukulu, ŵakasamuka ku Queensland, Australia, na kuwelera ku Timor-Leste, pa chirwa cha Timor. Benjamin wakati: “Pakwamba, ine na Carolyn tikachitanga upayiniya wapadera ku Timor-Leste. Ku malo agha, upharazgi ukanozganga chomene, ndipo ŵabali ŵakatovwiranga nadi. Tikadandawura chomene apo tikafumangako ku malo agha. Ntheura tikati tapempheka kuti ndiko tiluteso, tikakondwa chomene. Kweni chifukwa chakuti tikaŵa na ŵana, ulendo withu ukayima dankha.” Carolyn wakati: “Tikakhumbanga kuti ŵana ŵithu ŵachezgenge na ŵamishonale, ŵabali ŵa pa Beteli, na ŵapayiniya ŵapadera, kuti ŵamanye uwemi wakuteŵetera Yehova.”

KUNOZGEKERA KUSAMA

Yesu wakaphalira ŵalondezgi ŵake kuti: “Ni njani wa imwe uyo wakukhumba kuzenga chigongwe kwambura kukhala dankha pasi na kupendesera mtengo?” (Luka 14:28) Mwakuyana waka, para mukukhumba kusamira ku chigaŵa chinyake, ntchiwemi kunozgekera makora. Kasi munganozgekera wuli?

UMOYO WINU WAUZIMU: Benjamin wakati: “Tikakhumbanga kuteŵetera, kuŵa mphingo ku ŵabali yayi. Ntheura pambere tindasamuke, tikakhozga dankha umoyo withu wauzimu. Kweniso tikajipeleka chomene pakupharazga na pa milimo ya mpingo.”

Jacob wakati: “Pambere tindasamire ku Norfolk Island, tikaŵazga nkhani zinandi mu Gongwe la Mulinda na Wukani! za ŵabali awo ŵakasamira uko kukukhumbikwira ŵapharazgi ŵanandi. Tikadumbiskana masuzgo agho ŵakakumana nawo ndiposo umo Yehova wakaŵawovwilira.” Mudumbu wa Jacob uyo pasono wali na vyaka 11, wakati: “Nyengo zose nkhalombanga kwa Yehova, kweniso adada na amama ŵakalombanga nase.”

MAGHANOGHANO GHINU: Rena wakati: “Chikaŵa chipusu yayi kusamuka, chifukwa tikazgoŵera kukhala pafupi na ŵabali kweniso ŵabwezi ŵithu. Ntheura nkhaleka kuŵika maghanoghano pa ivyo nkhasida, m’malo  mwake nkhamba kughanaghanira chomene vitumbiko ivyo mbumba yithu yisangenge para taluta uko ŵapharazgi mbachoko.”

MITHETO: Mbumba zinandi zikufufuza dankha kuti zimanye za malo agho ŵakukhumba kusamira. Ivi vikovwira kuti ŵanozgekere makora. Mark wakati: “Tikaŵazga nkhani zinandi izo zikalongosoranga tawuni ya Nhulunbuy. Ŵabali awo ŵakakhalanga mu tawuni iyi, ŵakatitumiranga manyuzipepara agho ghakatovwira chomene kumanya mitheto ya ŵanthu ŵa ku malo agha.”

Shane, uyo wakasamira ku Norfolk Island, wakati: “Nkhaŵikapo mtima kuti nyengo zose nilongorenge vipambi vya mzimu.”

MASUZGO

Ŵanthu awo ŵateŵeterapo ku malo agho kuli ŵapharazgi ŵachoko, ŵakulongosora kuti usange pasangika suzgo la mabuchi, munthu wakwenera kuwona vinthu mwakwenelera na kuŵa wakunozgeka kusintha. Wonani viyelezgero ivi:

Rena wakati: “Nkhasinthanga umo nkhachitiranga vinthu kuyana na umo vinthu viliri. Mwachiyelezgero, para sitima zaleka kwenda chifukwa cha mphepo pa nyanja, katundu wakaduranga chomene ku Norfolk Island. Para vyaŵa nthena, nkhapenjanga vyakurya vinyake vyambura kudura.” Mfumu wake, Shane, wakati: “Tikachepeska katundu uyo tikagulanga kuti tileke kuŵa na bajeti yikuru.”

Mwana wawo Jacob wakayowoyaso suzgo linyake. Iyo wakati: “Mpingo withu uphya ukaŵa waka na ŵapharazgi 7, kweniso wose ŵakaŵa ŵalara kwa ine. Ntheura nkhaŵavya mubwezi wa msinkhu wane. Kweni chifukwa chakuti nkhapharazgiranga lumoza na ŵabali aŵa, vikatora nyengo yayi kuti tizgoŵerane.”

Jim, wa vyaka 21 nayo wakakumanapo na suzgo la nthena ili. Iyo wakati: “Mpingo unyake wapafupi ukaŵa pa mtunda wakujumpha makilomita 725 kufuma ku Nhulunbuy. Ntheura tikatangwanikanga chomene pa ungano. Tikafikanga mwakutendekera na kuchezga na ŵabali na ŵadumbu. Ivi vikaŵa vinyake mwa vinthu vyakukondweska chomene.”

 “TIKACHITA MAKORA KUSAMA”

Baibolo likuti: “Thumbiko la Yehova ndilo likusambazga munthu.” (Zinth. 10:22) Ŵabali na ŵadumbu ŵanandi awo ŵali kusamirapo uko kukukhumbikwira ŵapharazgi ŵanandi ŵa Ufumu, ŵakuzomerezga mazgu gha lemba ili.

Mark wakati: “Kusamira uko kuli ŵapharazgi ŵachoko kwawovwira chomene ŵana ŵithu. Iwo mbakukhorwa kuti Yehova wakutaya yayi wose awo ŵakuŵika Ufumu pakwamba. Ntchipusu yayi kuŵa na chigomezgo cha nthena ichi.”

Shane wakati: “Nili paubwezi na muwoli wane kweniso ŵana ŵane. Nkhukondwa chomene para ŵana ŵane ŵakuniphalira ivyo Yehova wakuŵachitira.” Jacob, mwana wa Shane, wakati: “Vikunozga chomene kuteŵetera uko kuli ŵapharazgi ŵachoko ŵa Ufumu. Tikachita makora kusama.”

^ ndime 3 Wonani nkhani yakuti “Mabwenzi a Mulungu pa Zisumbu za Tonga,” mu Gongwe la Mulinda la Chichewa la Disembala 15, 2004, peji  8-11.

^ ndime 3 Mu 2012, ofesi ya munthavi ya ku Australia na New Zealand ŵakazisazga kuŵa ofesi ya Australasia.