Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

WUKANI! NOVEMBER 2015

 IVYO BAIBOLO LIKUYOWOYA PA NKHANI YA

Umaliro wa Charu

Umaliro wa Charu

Lemba la 1 Yohane 2:17 likuti: ‘Charu chikuluta na makhumbiro ghake.’ Kasi “charu” ichi ni ntchi? Kasi chikuluta wuli ndipo pawuli?

Kasi “charu” icho chizamumara ni ntchi?

IVYO BAIBOLO LIKUYOWOYA

Pakuti charu icho chikuyowoyeka apa chili na “makhumbiro” agho Chiuta wakukwiya nagho, ipo charu icho chikuluta ntcharu chanadi yayi. Kweni mbanthu awo ŵakuyuyura Chiuta na kujizgora ŵalwani ŵake. (Yakobe 4:4) Ŵanthu aŵa ‘ŵazamupokera chilango cha pharanyiko lamuyirayira.’ (2 Ŵatesalonika 1:7-9) Kweni ŵanthu awo ŵali ku ‘chigaŵa cha charu chara,’ pakupulikira mazgu gha Yesu Khristu, ŵakulindilira umoyo wamuyirayira.—Yohane 15:19.

Lemba la 1 Yohane 2:17 likumalizga kuti: ‘Uyo wakuchita khumbo la Chiuta wakukhalilira muyirayira.’ Nadi, munthu uyo wakuchita khumbo la Chiuta wazamupokera umoyo wamuyirayira pano pa charu. Ndivyoso lemba la Salmo 37:29 likuyowoya kuti: ‘Ŵakunyoloka ŵamkuhara charu na kukhala mwenemumo kwandanda.’

‘Mungatemwanga charu chara nesi vinthu ivyo vili mu charu. Usange yunji wakutemwa charu, wakutemwa Ŵadada chara.’—1 Yohane 2:15.

Kasi charu ichi chizamumara wuli?

IVYO BAIBOLO LIKUYOWOYA

Umaliro wizenge mu vigaŵa viŵiri. Chakwamba, Chiuta wazamuparanya visopa vyose vyautesi, ivyo vili nga ni hule ilo likuchemeka “Babuloni Mukuru.” (Uvumbuzi 17:1-5; 18:8) Babuloni Mukuru wakorana ubwezi na ŵalongozgi ŵa ndyali, uku wakuyowoya kuti wakugomezga Chiuta pera. Kweni ŵalongozgi ŵeneŵaŵa ŵazamumuzgokera. ‘Ŵazamumutinkha mwanakazi muzaghali na kumuzgora wakuparanyika na wankhule, ndipo ŵazamurya minofu ya thupi lake na kumotcha thibu na moto.’—Uvumbuzi 17:16.

Kufuma apo, Chiuta wazamuparanya ŵalongozgi ŵa ndyali awo ni ‘mathemba gha charu chose.’ Aŵa ŵazamuparanyika pamoza na ŵanthu wose ŵaheni pa ‘nkhondo ya zuŵa likuru la Chiuta Wankhongonozose,’ iyo yikuchemekaso “Haramagedoni.”—Uvumbuzi 16:14, 16.

‘Penjani Yehova, imwe mose mwaŵakuzika ŵa charu, penjani urunji, penjani kuzika; panji muti mubisike mu zuŵa la ukali wa Yehova.’—Zefaniya 2:3.

 Kasi charu ichi chizamumara pawuli?

IVYO BAIBOLO LIKUYOWOYA

Umaliro wizenge para ŵanthu ŵachenjezgeka mwakukwana kwizira mu ntchito ya kupharazga Ufumu wa Chiuta. Ufumu uwu ni boma ilo lizamuwuskapo maufumu gha ŵanthu. (Daniel 7:13, 14) Yesu Khristu wakati: ‘Makani ghawemi agha gha ufumu, ghazamupharazgika mu charu chose kuti uŵe ukaboni ku mitundu yose; penepapo ndipo umaliro wizenge.’ (Mateyu 24:14) Ntchito ya kupharazga yikulongora kuti Chiuta ngwaurunji na walusungu, kweniso ‘ntchimanyikwiro’ chakuti tili mu nyengo yaumaliro. Vinyake ivyo vikulongora kuti tili mu nyengo yaumaliro ni nkhondo, vindindindi, njara, na matenda, ivyo vyakhwaska charu chose.—Mateyu 24:3; Luka 21:10, 11.

Padera pakuyowoya ivyo vizamuchitika pa charu, Baibolo likayowoyaso umo ŵanthu ŵazamuŵira mu “mazuŵa ghaumaliro.” Tikuŵazga kuti: ‘Kuzamuŵa nyengo zinonono na zakusuzga. Pakuti ŵanthu ŵazamuŵa ŵakujitemwa iwoŵene, ŵakutemwa ndalama, ŵambura kupulikira ŵapapi, ŵambura kujikora, ŵakofya, ŵambura kutemwa uwemi, ŵakutemwa vyakusanguluska m’malo mwa kutemwa Chiuta.’ *2 Timote 3:1-5.

Sonosono apa, charu chiheni ichi ‘chikuluta.’—1 Yohane 2:17

Vyose ivi vikamba kuwoneka mu 1914, Nkhondo Yakwamba ya Charu Chose yikati yamba. Kweniso kufuma mu chaka ichi, Ufumu wa Chiuta ukupharazgika kulikose pa charu chose. Ŵakaboni ŵa Yehova ŵakuwona kuti ni mwaŵi ukuru chomene kuchitako ntchito ya kupharazga. Nakuti magazini yawo iyo ŵakupharazgira yikuchemeka Gongwe la Mulinda, Likupharazga Ufumu wa Yehova.

‘Ntheura, muŵenge maso, chifukwa mukumanya chara zuŵa nesi ora.’—Mateyu 25:13.

^ ndime 14 Kuti mumanye vinandi, wonani mutu 9 mu buku lakuti Kasi Baibolo Likusambizgachi Chomenechomene? lakupharazgika na Ŵakaboni ŵa Yehova. Likusangikaso pa www.jw.org/tum.

Manyani Vinandi

Ŵanandi Ŵazamupona pa Zuŵa Laumaliro, Namwe Mungazakapona

Mungazakapona wuli? Kasi mukwenera kusunga vinthu panji kujinozgera vinthu vinyake kuti muzakapone pa zuŵa liheni?