Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

WUKANI! AUGUST 2015

 IVYO BAIBOLO LIKUYOWOYA PA NKHANI YA

Kwenderana

Kwenderana

Ŵanthu ŵakukhala mwamtende para ŵakupulikana, kugowokerana, na kwenderana. Kweni kasi kwenderana kukwenera kuŵa na mphaka?

Kasi ntchivichi icho chingawovwira munthu kuti waŵe wakufwatuka kwenderana na ŵanyake?

UMO VINTHU VILIRI PASONO

Ŵanthu pa charu chose ŵakukhumba yayi kwenderana na ŵanyawo chifukwa cha kusankhana mitundu, mafuko, na kupambana visopa.

IVYO BAIBOLO LIKUYOWOYA

Apo Yesu Khristu wakaŵa pa charu chapasi napo ŵanthu ŵanyake ŵakenderananga yayi. Ŵayuda na Ŵasamariya ndiwo ŵakatinkhananga chomene. (Yohane 4:9) Ŵanthu ŵakawonanga ŵanakazi kuŵa ŵapasi. Ŵalongozgi ŵa Ŵayuda ŵakachitiranga msinjiro ŵanthu bweka. (Yohane 7:49) Kweni Yesu Khristu wakachitanga nthena yayi. Lekani ŵalwani ŵake ŵakatenge: “Munthu uyu wakupokelera ŵakwananga na kurya nawo.” (Luka 15:2) Yesu wakaŵa walusungu, wakuzikira, kweniso wakuchezgeka chifukwa wakizira kweruzga ŵanthu yayi, kweni kuti waŵawovwire kuti ŵatemwenge Chiuta. Wakachitanga vyose chifukwa cha chitemwa.—Yohane 3:17; 13:34.

Yesu wakizira kweruzga ŵanthu yayi, kweni kuŵawovwira kuti ŵatemwenge Chiuta

Chitemwa ndicho chingawovwira munthu kuti waŵenge wakufwatuka kwenderana na ŵanyake na kuchezga nawo, nangauli nawo mbakwananga ndipo ŵakubudiska vinyake. Lemba la Ŵakolose 3:13 likuti: ‘Lutilirani kuzizipizgirana yumoza na munyake na kugowokerana na mtima wose usange munthu wali na chifukwa chakudandawulira munyake.’

‘Pachanya pa vyose, mutemwanenge nkhanirankhanira yumoza na munyake, chifukwa chitemwa chikubenekelera wumba wa zakwananga.’—1 Petrosi 4:8.

 Chifukwa wuli kwenderana kukwenera kuŵa na mphaka?

IVYO VIKUCHITIKA

Maboma ghanandi ghakukhumba yayi kuti ŵanthu ŵachitenge vinthu bwekabweka na kunanga vinthu. Ntheura ŵakuŵika malango ghakukanizga nkharo zinyake.

IVYO BAIBOLO LIKUYOWOYA

‘Chitemwa chikuchita mwambura kwenelera chara.’ (1 Ŵakorinte 13:5) Nangauli Yesu wakachezganga na ŵanthu ŵakupambanapambana, kweni wakalekeleranga yayi ŵanthu awo ŵakachitanga vinthu mwambura kwenelera, upusikizgi, na viheni vinyake. Wakasuskanga chomene ŵanthu awo ŵakachitanga vinthu ivi. (Mateyu 23:13) Iyo wakati: ‘Uyo wakuchita vinthu viheni, wakutinkha ungweru.’—Yohane 3:20.

Mpositole Paulosi wakalemba kuti: ‘Nyanyarani icho ntchiheni, demelerani ku icho ntchiwemi.’ (Ŵaroma 12:9) Ivyo Paulosi wakayowoya apa ndivyo nayo wakachitanga. Chiyelezgero, Paulosi wakasuska Ŵakhristu ŵanyake Ŵachiyuda wakati wawona kuti ŵakujipatura ku ŵanyawo ŵa mitundu yinyake. Kweni iyo nayo wakaŵa Muyuda. (Ŵagalatiya 2:11-14) Paulosi wakamanyanga kuti Chiuta ‘wakutemwera chara,’ ntheura wangakondwa yayi kuwona ŵanthu ŵake ŵakusankhana mitundu.—Milimo 10:34.

Ŵakaboni ŵa Yehova ŵakugomezga Baibolo kuti ndilo liŵalongozgenge. (Yesaya 33:22) Ntheura ŵakulekelera yayi ŵanthu awo ŵakuchita viheni mu mpingo wawo. Ntchakwenelera yayi kuti ŵanthu awo ŵakusulako fundo za mu Baibolo ŵanangenge mpingo utuŵa. Pa chifukwa ichi, Ŵakaboni ŵakupulikira fundo ya mu Baibolo yakuti: “Fumyanimo munthu muheni mukati mwinu.”—1 Ŵakorinte 5:11-13.

“Imwe mukutemwa Yehova, tinkhani uheni.”—Salmo 97:10.

Kasi Chiuta walekelerenge uheni muyirayira?

IVYO ŴANANDI ŴAKUGOMEZGA

Ŵanthu ŵanandi ŵakuti uheni ungamara yayi.

IVYO BAIBOLO LIKUYOWOYA

Ntchimi Habakuku yikadandawura kwa Yehova Chiuta kuti: ‘Mukundilongolerachi maubendezi na kundiwoneska vyasuzgo? Phasulo na nkhaza vili pamaso pane; mphindano na kulimbana vyazara.’ (Habakuk 1:3) Chiuta wakamukhwimiska Habakuku, wakamuphalira kuti walangenge ŵaheni. Wakati: ‘Chizenge nadi, kuti chiziwulikenge chara.’—Habakuk 2:3.

Pasono ŵanthu awo ŵakuchita viheni ŵali na mwaŵi wakuti ŵawereko ku nthowa zawo ziheni. Baibolo likuti: ‘Kasi nkhukondwera kuti muheni wafwe,’ wakuti Yehova Chiuta, ‘Asi nkhukhumba kuti wawereko ku nthowa zake, waŵe na umoyo?’ (Ezekiel 18:23) Awo ŵakuleka mendero ghawo ghaheni na kupenja Yehova ŵangaŵa na chigomezgo chakuti kunthazi ŵazamusanga viwemi. Baibolo likuti: ‘Yose uyo wakupulikira ine wakhalenge na kufwasa; waŵenge mu mtende, kwambura kopa viheni.’—Zintharika 1:33.

‘Kwakhala kanyengo, ndipo muheni kuti wazamuŵapo chara. Ŵakuzika ndiwo ŵazamuhara charu, ŵazamukondwa na kusakata chomene.’—Salmo 37:10, 11.

Manyani Vinandi

Kasi Ciuta Ni Munthu Wamtundu Wuli?

Kasi ni vici ivyo mukumanya vyakukhwaskana na Ciuta? Kasi tingacita wuli kuti timumanye makora?

Ciuta Wazamuwuskapo Viheni

Kasi namwe mukukhumba kuzakakhala mu caru ico viheni vizamucitikiraso ŵanthu ŵawemi yayi?