Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

WUKANI! JULY 2015

 NKHANI YA PA CHIKOPI | KASI MUNGACHITA WULI PARA VINTHU VYASUZGA?

Suzgo: Usange Mukughanaghana Viheni

Suzgo: Usange Mukughanaghana Viheni

KASI mukughanaghana viheni chifukwa cha chitima, ukali, panji vyakusingo? Usange ndimo viliri, mungaŵavya nyengo panji nkhongono zakuchitira vinthu vyakukhumbikwa chomene. Kasi mungachita wuli na suzgo ili? *

CHIYELEZGERO CHA MU BAIBOLO: DAVIDE

Davide wakakumana na vinthu ivyo vikachitiska kuti waŵe wakwenjerwa na chitima. Kasi ntchivichi chikamovwira kuti wakhazikike mtima? Davide wakaleka vyose mu mawoko gha Yehova. (1 Samuel 24:12, 15) Kweniso wakalemba vinthu ivyo vikamusuzganga. Pakuti wakaŵa na chipulikano, wakalombanga kwa Chiuta kaŵirikaŵiri. *

IVYO GREGORY WAKUCHITA

Nga umo vyayowoyekera mu nkhani yakwamba, Gregory wali na suzgo la kwenjerwa chomene. Iyo wakuti: “Kwenjerwa kwane kukafika paheni chomene.” Kasi Gregory wakachita wuli kuti wakhazikike mtima? Iyo wakuti: “Muwoli wane na ŵabwezi ŵakunovwira ndipo ivi vyanovwira kuti nikhazikike mtima. Kweniso nkhakumana na dokotala ndipo nkhamanya vinandi pa suzgo lane. Nkhati nasintha vinthu vinyake pa umoyo wane, nkhamba kuwona kuti mtima wane wakhazikika, nkhasuzgikangaso chomene yayi. Nangauli nyengo zinyake nkhwenjerwa, kweni sono nkhumanya ivyo vikupangiska kuti nijipulikenge nthena. Nkhumanyaso umo ningachitira na suzgo ili.”

‘Mtima wakusangwa ni munkhwala uwemi.’—Zintharika 17:22

IVYO IMWE MUNGACHITA

Usange mukusuzgika na maghanoghano ghaheni, yezgani kulondezga fundo izi:

  • Lembani ivyo vikumusuzgani mu mtima.

  • Phalirani mubali winu panji mubwezi winu ivyo vikumusuzgani.

  • Lekani kwendera waka ivyo mukughanaghana. Mwachiyelezgero, jifumbani kuti, ‘Kasi pali chifukwa chakukwana chakuti nijiwonenge wawakawaka?’

  • Lekani kusunga mu mtima ivyo mukwenjerwa navyo, ukali, panji vyakusingo. Kweni ŵikani mahara pakuchita vinthu ivyo vingamovwirani. *

Fundo Yikuru: Kanandi munthu wakughanaghana viheni chifukwa cha ivyo vyamuchitikira yayi, kweni chifukwa cha umo iyo wakuviwonera.

^ ndime 3 Nyengo zinyake munthu wangaghanaghana viheni chifukwa chakuti wali na suzgo ilo lingakhumbikwira kuti wakakumane na dokotala. Magazini ya Wukani! yikuphalira munthu wovwiri uwo wakwenera kupokera yayi. Waliyose wakwenera kumanya yekha chakuchita pa nkhani iyi.

^ ndime 5 Mu buku la Masalmo, mukusangika malurombo agho Davide wakalemba.

^ ndime 13 Kuti mumanye vinandi, wonani nkhani ya mutu wakuti, “Kasi Mungachita Wuli Kuti Muleke Kwenjerwa?” Nkhani iyi yili mu Gongwe la Mulinda la Julayi 1, 2015.

Manyani Vinandi

Munthu Wamahara Wakuwezgako Ukali Wake

Nkhani ya Davide, themba la Israyeli, yingamovwirani kuti mujiwezgenge para mwakalipa.

Kasi Baibolo Linganovwira Para Nkhufipa Mtima?

Chiuta wakutipa vinthu vitatu kuti vitovwire para tikufipa mtima.

Kasi Chiuta Wanganizgora Para Ningalomba?

Kasi Chiuta wakutipwelelera nadi?