Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Wukani!  |  June 2015

 FUNDO ZAKOVWIRA MBUMBA | NTHENGWA

Sungani Phangano la Nthengwa

Sungani Phangano la Nthengwa

SUZGO

Pa zuŵa la ukwati winu mukachita chilapo. Mukalayizga kuti mukhalenge na munyinu kwa umoyo winu wose na kumazga masuzgo agho ghangaŵapo.

Kweni para nyengo yajumphapo, mu nthengwa mungawuka masuzgo ndipo mungamba kugazgana na munyinu. Kasi pa nyengo iyi muluwenge phangano linu?

IVYO MUKWENERA KUMANYA

Phangano mukwenera kuliwona nga ni nyanguru uyo wakukhozga nthengwa yinu

Phangano ni mphingo yayi kweni likukhozga nthengwa. Ŵanthu ŵanandi ŵakukayikira usange phangano ndakuzirwa. Ŵanyake ŵakuwona kuti phangano ni mphingo iyo yikuŵatondeska kutakasuka. Kweni phangano mukwenera kuliwona nga ni nyanguru uyo wakukhozga nthengwa yinu. Megani uyo ngwakutengwa wakati, “Phangano likovwira chomene para mwambana. Pakuŵavya uyo wakughanaghanako vyakuleka munyake wa mu nthengwa.” * Ŵakutorana awo ŵakumanya kuti nthengwa nja umoyo wose, ŵakusanga nthowa zakumazgira suzgo iyo yawuka.—Wonani bokosi lakuti, “ Kusunga Phangano na Kugomezgeka.

Fundo yikuru: Usange mukukumana na masuzgo mu nthengwa yinu, ni nyengo yakuti mukoleskere phangano linu la nthengwa, m’malo mwa kuwona nga kuti muli kubudiska. Kasi mungasunga wuli phangano linu?

IVYO MUNGACHITA

Sandani umo mukuwonera nthengwa. Ŵakutorana ŵakwenera kupatana chara. Kasi fundo iyi yikumukakani panji yikumuvikilirani? Para mwakumana na masuzgo,  kasi nyengo zose mukughanaghana waka vya kumazga nthengwa? Kuti musunge phangano linu, ntchakuzirwa kuwona nthengwa kuti nja umoyo winu wose.—Fundo ya mu Baibolo: Mateyu 19:6.

Sandani umo mukakulira. Ivyo mukawona ku ŵapapi ŵinu vikukhwaska umo mukuwonera phangano la nthengwa. Mwanakazi munyake zina lake Lea wakati: “Ŵapapi ŵane ŵakalekana apo nkhaŵa muchoko, ndipo nkhufipa mtima kuti ivyo ŵakachita vinganipangiska kuti nileke kuzirwiska phangano la nthengwa.” Manyani kuti namwe mu nthengwa yinu mungachita vinthu vyakupambana na ŵapapi ŵinu. Namwe mungachita vinu kwambura kuwerezga ivyo ŵapapi ŵinu ŵakabudiska.—Fundo ya mu Baibolo: Ŵagalatiya 6:4, 5.

Sandani umo mukuyowoyera. Para mwapambana maghanoghano na muwoli panji mfumu winu, lekani kuyowoya mazgu agho pamanyuma mungadandawura nagho, nga ni mazgu ghakuti, “Nilije nawe ntchito!” panji, “Namumusanga munyake uyo wamunipulikiska!” Uyo wakuyowoya nthena wakulongora kuti wakuyuyura phangano la nthengwa, nakuti kayowoyero aka kakumazga masuzgo yayi, kweni kakupemba waka moto. M’malo mwa kuyowoya mazgu ghakulasa, mungayowoya kuti: “Wuli tose tijikore mtima na kusanga nthowa yakumazgira suzgo iyi?”—Fundo ya mu Baibolo: Zintharika 12:18.

Longorani kuti mukusunga phangano. Usange mukugwira ntchito mu ofesi, muŵikenge chithuzi cha mfumu panji muwoli winu pa desiki. Muyowoyenge viwemi vya mfumu panji muwoli winu. Muyimbiranenge foni zuŵa lililose para mwatalikirana. M’malo mwa kuyowoya kuti “chinthu ichi ntchane,” mutenge “chinthu ichi ntchithu.” Para mungachita nthena, mulongorenge kuti muli kujibatika nadi kwa mfumu panji muwoli winu.

Ŵanthu awo mungatolerako. Chezgani na ŵakutorana awo ŵakumazga makora masuzgo ghawo gha mu nthengwa. Ŵafumbani kuti, “Kasi phangano la nthengwa mukuliwona wuli, ndipo lawovwira wuli nthengwa yinu?” Baibolo likuti: ‘Chuma [panji chisulo] chikunora chuma, ndipo munthu nayo wakunora munthu.’ (Zintharika 27:17) Ulongozgi uwo ŵangamupani awo nthengwa zawo zikwenda makora ungamovwirani kuti nthengwa yinu nayo yende makora.

^ ndime 7 Baibolo likuti ŵakutorana ŵangamazga nthengwa yawo para yumoza wachita uzaghali. Wonani “Ivyo Baibolo Likuyowoya pa Nkhani ya Uleŵi” mu Wukani! yeneyiyi.

Manyani Vinandi

MUNGAŴA ŴAKUKONDWA MU MBUMBA YINU

Ŵani Ŵakugomezgeka kwa Munyinu

Kasi munthu wangaŵa wambura kugomezgeka kwa mfumu panji muwoli wake nangauli wakucita uzaghali yayi?

MAFUMBO AGHO BAIBOLO LIKUZGORA

Kasi Baibolo Lingatovwira Kuŵa Ŵakukondwa mu Nthengwa?

Baibolo lili na ulongozgi uwo wawovwira mabanja ghanandi kuŵa ghakukondwa.

CHIUTA WAKUTIPHALIRA UTHENGA UWEMI!

Kasi Fundo Izo Zili mu Baibolo Zikutovwira Wuli?

Yesu wakalongosora kuti ŵanthu ŵakwenera kulongozgeka. Wakayowoyaso fundo ziŵiri za mu Baibolo izo ni zakovwira chomene.