Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Yesu ni Nthowa, Unenesko, na Umoyo

 MUTU 52

Wakalyeska Ŵanthu Ŵanandi na Tuvingwa Tuchoko Waka na Somba

Wakalyeska Ŵanthu Ŵanandi na Tuvingwa Tuchoko Waka na Somba

MATEYU 14:13-21 MARIKO 6:30-44 LUKA 9:10-17 YOHANE 6:1-13

  • YESU WAKALYESKA ŴANALUME 5,000

Ŵapositole 12 ŵakakondwa chomene kupharazga mu Galileya yose. Ŵakaphalira Yesu “vinthu vyose ivyo ŵakachita na kusambizga.” Mphake kuti ŵakavuka chomene. Ŵakaŵavya na nyengo yakulyera wuwo chifukwa ŵanthu ŵanandi ŵakizanga na kuluta. Ntheura Yesu wakaŵaphalira kuti: “Zaninge, imwe mwekha ku malo ghamayiyi na kupumulapo pachoko.”—Mariko 6:30, 31.

Ŵakakwera boti, panji pafupi na Kaperenaumu, na kunjilira kwaŵekha, kumafumiro gha dazi kwa Mlonga wa Yorodani kujumpha Betesayida. Kweni ŵanthu ŵanandi ŵakaŵawonanga apo ŵakafumangapo, ndipo ŵanandiso ŵakamanya. Ŵanthu wose ŵakachimbira mumphepete pera ndipo apo boti ilo mukaŵa Yesu na ŵasambiri likafikanga ku mtunda, ŵanthu ŵakaŵa kuti ŵafika kale.

Yesu wakakhira boti. Wakawona mzinda wa ŵanthu ndipo chitima chikamukora chifukwa ŵakaŵa nga ni mberere zambura muliska. Ntheura “wakamba kuŵasambizga vinthu vinandi” vya Ufumu. (Mariko 6:34) Kweniso “wakachizga awo ŵakaŵa ŵalwari.” (Luka 9:11) Kanyengo kakati kajumphapo, ŵasambiri ŵakati kwa Yesu: “Malo agha ngamayiyi ndipo nyengo yamara kale, wezgani mizinda kuti yilute mu mizi yikajigulire vyakurya.”—Mateyu 14:15.

Yesu wakazgora kuti: “Ŵakwenera kuluta yayi. Imwe ndimwe muŵape chakuti ŵarye.” (Mateyu 14:16) Nangauli Yesu wakamanyanga kale icho wachitenge, kweni wakakhumbanga kumuyezga Filipu. Wakamufumba kuti: “Kasi tamugura nkhu vingwa vyakuti ŵanthu aŵa ŵarye?” Wakafumba Filipu chifukwa pakwake pakaŵa pa Betesayida, pafupi na malo agha. Kweni ŵakatenge ŵakwaniskenge yayi kugura vingwa vyakukwana. Pakaŵa ŵanalume 5,000. Para tingasazgako ŵanakazi na ŵana, mbwenu chiŵelengero ichi chinjirengemo kaŵiri. Filipu wakazgora kuti: “Vingwa vya madinari 200 [dinari ghakaŵa malipiro gha zuŵa limoza] vingaŵakwana chara nanga waliyose tingamupa kachokokachoko.”—Yohane 6:5-7.

Andireya wakayowoya mazgu ghakulongora kuti vingachitika yayi kulyeska ŵanthu wose ŵara. Wakati: “Pali msepuka uyo wali na vingwa vinkhondi vya balere na tusomba tuŵiri. Kasi ivi vingaŵakwana ŵanthu wose aŵa?”—Yohane 6:9.

Nyengo ya chifuku yikaŵa kuti yajumpha waka. Paska la mu 32 C.E. likaŵa pafupi kuchitika. Malo ghose gha mapiri ghakaŵa na utheka wakubiliŵira. Yesu wakaphalira ŵasambiri ŵake kuti ŵaphalire ŵanthu kuti ŵakhale pa utheka mu magulu gha ŵanthu 50 na 100. Wakatora vingwa vinkhondi na somba ziŵiri na kuwonga Chiuta. Kufuma apo, wakamenya vingwa na kugaŵa somba. Pamanyuma wakapeleka ku ŵasambiri ŵake kuti ŵagaŵire ŵanthu. Chakuzizwiska ntchakuti ŵanthu wose ŵakarya na kukhuta.

Kufuma apo, Yesu wakaphalira ŵasambiri ŵake kuti: “Wunjikani pamoza vimenyu ivyo vyakhalapo kuti paleke kusakazika kanthu.” (Yohane 6:12) Ŵakawunjika vimenyu vyakuzura vidunga 12.