Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Yesu ni Nthowa, Unenesko, na Umoyo

 MUTU 58

Wakandaniska Vingwa Kweniso Wakachenjezga vya Nthukumusi

Wakandaniska Vingwa Kweniso Wakachenjezga vya Nthukumusi

MATEYU 15:32–16:12 MARIKO 8:1-21

  • YESU WAKALYESKA ŴANALUME 4,000

  • WAKACHENJEZGA VYA NTHUKUMUSI YA ŴAFARISI

Wumba ukuru ukakhundumukira kwa Yesu apo wakaŵa mu chigaŵa cha Dekapoli, kumafumiro gha dazi kwa Nyanja ya Galileya. Ŵakiza kuti ŵazakapulikizge visambizgo vyake ndiposo kuti wazakaŵachizge. Ŵanthu aŵa ŵakayegha vidunga vikuruvikuru.

Pamanyuma, Yesu wakaphalira ŵasambiri ŵake kuti: “Nili na chitima na mzinda, chifukwa ŵakhala nane mazuŵa ghatatu kweni ŵalije kakuti ŵarye. Usange ningaŵawezga ku vikaya vyawo na njara, ŵalendukenge pa nthowa, chifukwa ŵanyake ŵali kufuma kutali chomene.” Ŵasambiri ŵakamufumba kuti: “Kasi mu mayiyi ghano, munthu wangatora nkhu vingwa vyakukwana ŵanthu aŵa kuti ŵakhute?”—Mariko 8:2-4.

Yesu wakafumba kuti: “Muli na vingwa vilinga?” Ŵasambiri ŵakati: “Vingwa 7 na tusomba tuchoko waka.” (Mateyu 15:34) Yesu wakaphalira ŵanthu kuti ŵakhale pasi. Wakatora vingwa vira na somba, ndipo wakalomba kwa Chiuta. Pamanyuma wakapa ŵasambiri ŵake kuti ŵagaŵire ŵanthu. Ntchakuzizika chomene kuti ŵanthu wose ŵakarya na kukhuta. Vimenyu ivyo vikakhalapo vikazura vidunga vikuruvikuru 7 nangauli ŵanalume 4,000 ndiposo ŵanakazi na ŵana ŵakarya.

Yesu wakati waphalira mzinda kuti uwerenge, iyo na ŵasambiri ŵake ŵakakwera boti na kwambukira ku Magadani. Uku kukaŵa kumanjiliro gha dazi kwa Nyanja ya Galileya. Ŵakati ŵafika ku malo agha, Ŵafarisi na Ŵasaduki ŵakakhumbanga kuyezga Yesu. Ŵakamupempha kuti wachite chimanyikwiro chakufuma kuchanya.

Yesu wakamanya mahara ghawo, ndipo wakazgora kuti: “Para ni namise mukuti, ‘Kuchenge makora, chifukwa mtambo wachesama chomene.’ Namulenji mukuti, ‘Muhanya uno kuzizimenge ndipo kuŵenge vula, chifukwa mtambo wachesama chomene kweniso wabinkha.’ Mukumanya kulongosora mawonekero gha mtambo, kweni vimanyikwiro vya zinyengo mungavilongosora chara.” (Mateyu 16:2, 3) Ndipo Yesu wakaphalira Ŵafarisi na Ŵasaduki kuti ŵapikenge chimanyikwiro chilichose yayi kupaturako chimanyikwiro cha Yona.

Yesu na ŵasambiri ŵake ŵakakwera boti na kunjilira ku Betesayida, kumpoto cha kumanjiliro gha dazi kwa nyanja. Mukati mwa ulendo wawo, ŵasambiri ŵakawona kuti ŵaluwa kuyegha chakurya chakukwana. Ŵakaŵa na chingwa chimoza pera. Nyengo yeneyira, Yesu wakakumbuka umo Ŵafarisi na Ŵasaduki awo ŵakaŵa ku chigaŵa cha Herode ŵakakhumbiranga kumuyezga. Ntheura wakachenjezga ŵasambiri ŵake kuti: “Muŵe maso, ndipo chenjerani na nthukumusi ya Ŵafarisi na nthukumusi ya Herode.” Ŵasambiri ŵakapulikiskira mphuvya, ŵakaghanaghananga kuti wakayowoyanga vya nthukumusi chifukwa chakuti ŵakaluwa kuyegha chingwa. Yesu wakamanya kuti ŵandamupulikiske makora, ntheura wakati: “Chifukwa wuli mukukwesana kuti mulije vingwa?”—Mariko 8:15-17.

Ni kale yayi apo Yesu wakalyeska vingwa ŵanthu ŵanandi chomene. Ŵasambiri ŵakeneranga kumanya kuti Yesu wakafipanga mtima yayi kuti iwo ŵandayeghe vingwa. Wakaŵafumba kuti: “Kasi mukukumbuka chara, apo nkhamenyera vingwa vinkhondi ŵanalume 5,000? Kasi mukatora vidunga vilinga vyakuzura na vimenyu?” Ŵakati: “Vidunga 12.” Yesu wakalutilira kuti: “Apo nkhamenyera vingwa 7 ŵanalume 4,000, kasi mukatora vidunga vikuruvikuru vilinga vyakuzura na vimenyu?” Ŵakazgora kuti: “Vidunga 7.”—Mariko 8:18-20.

Yesu wakaŵafumba kuti: “Chifukwa wuli mukuwamo chara kuti nayowoyanga namwe vya vingwa chara?” Yesu wakawerezgaso kuti: “Muchenjere na nthukumusi ya Ŵafarisi na Ŵasaduki.”—Mateyu 16:11.

Paumaliro, ŵasambiri ŵakapulikiska icho wakang’anamuranga. Nthukumusi ndiyo yikutukumuska chingwa. Apa Yesu wakayowoya vya nthukumusi kulongora kuti Ŵafarisi na Ŵasaduki mbanthu ŵakutimbanizgika. Wakachenjezganga ŵasambiri kuti ŵaŵe maso na “chisambizgo cha Ŵafarisi na Ŵasaduki” icho chingaŵatimbanizga.—Mateyu 16:12.