Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Yesu ni Nthowa, Unenesko, na Umoyo

 MUTU 28

Chifukwa Wuli Ŵasambiri ŵa Yesu Ŵakaziŵizganga Yayi?

Chifukwa Wuli Ŵasambiri ŵa Yesu Ŵakaziŵizganga Yayi?

MATEYU 9:14-17 MARIKO 2:18-22 LUKA 5:33-39

  • ŴASAMBIRI ŴA YOHANE ŴAKAFUMBA YESU VYA KUZIŴIZGA KURYA

Yohane Mubatizi wakakhala mu jele nyengo yitali. Apo Yesu wakaŵa pa Paska mu 30 C.E., Yohane wakaŵa kuti wachali mu jele. Yohane wakakhumbanga kuti ŵasambiri ŵake ŵalondezgenge Yesu. Kweni Yohane wakati wajalirika mu jele, ni wose yayi awo ŵakalondezga Yesu.

Sono Paska likati lasendelera mu 31 C.E., ŵasambiri ŵanyake ŵa Yohane ŵakiza kwa Yesu na kumufumba kuti: “Chifukwa wuli ise na Ŵafarisi tikuziŵizga kurya kweni ŵasambiri ŵinu ŵakuziŵizga chara?” (Mateyu 9:14) Ŵafarisi ŵakaziŵizganga kurya. Ndivyo ŵakachitanga kuyana na chisopa chawo. Pamanyuma, Yesu wakayowoya ntharika ya Mufarisi uyo wakajiwonanga kuti ni murunji. Mufarisi uyu wakalombanga, wakati: “A Chiuta, nkhumuwongani kuti nili nga mbanthu ŵanyake chara, . . . Nkhuziŵizga kurya kaŵiri pa sabata.” (Luka 18:11, 12) Ŵasambiri ŵa Yohane nawo ŵakwenera kuti ŵakaziŵizganga. Panji ŵakaziŵizganga kurya chifukwa chakuti Yohane wakajalirika mu jele. Ŵanthu awo ŵakawonanga nawo ŵakazizwanga kuti ŵasambiri ŵa Yesu ŵakuziŵizga yayi. Panji nawo ŵakaziŵizganga kurya chifukwa chakuti ŵakaŵa na chitima.

Yesu wakayowoya chiyelezgero, wakati: “Kasi ŵabwezi ŵa mweneko wa nthengwa ŵangatengera para mweneko wa nthengwa wachali nawo? Kweni mazuŵa ghizenge apo mweneko wa nthengwa wazamutolekako kwa iwo, apo ndipo ŵazamuziŵizga kurya.”—Mateyu 9:15.

Yohane wakayowoya kuti Yesu ni mweneko wa nthengwa. (Yohane 3:28, 29) Ntheura ŵasambiri ŵa Yesu ŵakaziŵizga kurya yayi apo Yesu wakaŵa nawo. Pamanyuma, Yesu wati wafwa, ŵasambiri ŵake ŵakamulira ndipo ŵakaŵavya khumbo lakuti ŵarye. Kweni vinthu vikasintha apo Yesu wakawuskika. Pakaŵavya chifukwa chakuti ŵaziŵizgire chakurya panji kumulira.

Pamanyuma, Yesu wakayowoya ntharika ziŵiri izi, wakati: “Palije munthu uyo wakusona chigamba chiphya pa laya lakuwaro lakale, chifukwa chigamba chiphya chikuguza laya ndipo laya likupaluka chomene. Kweniso ŵanthu ŵakuŵika vinyo liphya mu mathumba gha vikumba vyakale chara. Usange ŵachita nthena, mathumba gha vikumba ghakuphumuka ndipo vinyo likuthika. Mathumba gha vikumba nagho ghakunangika. Kweni ŵanthu ŵakuŵika vinyo liphya mu mathumba gha vikumba viphya.” (Mateyu 9:16, 17) Kasi apa fundo ya Yesu yikaŵa yakuti wuli?

Yesu wakawovwiranga ŵasambiri ŵa Yohane Mubatizi kuti ŵaleke kughanaghana kuti ŵasambiri ŵa Yesu ŵalondezgenge mitheto yakale ya Ŵayuda, nga mutheto wa kuziŵizga kurya. Yesu wakiza kuti wagambike chisopa chakale chara chifukwa chikamara ntchito. Chisopa cha Ŵayuda chikaŵa pafupi kumara. Yesu wakayowoyapo yayi kuti ŵanthu ŵalondezgenge maluso gha chisopa cha Ŵayuda pamoza na maluso gha ŵanthu. Wakakhumba yayi kubatika chigamba chiphya pa laya lakale panji kuŵika vinyo liphya mu mathumba gha vikumba ghakale.