Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Yesu ni Nthowa, Unenesko, na Umoyo

 MUTU 18

Yesu Wakalutilira Kusazgikira Ndipo Yohane Wakachepanga

Yesu Wakalutilira Kusazgikira Ndipo Yohane Wakachepanga

MATEYU 4:12 MARIKO 6:17-20 LUKA 3:19, 20 YOHANE 3:22–4:3

  • ŴASAMBIRI ŴA YESU ŴAKABATIZANGA ŴANTHU

  • YOHANE MUBATIZI ŴAKAMUJALIRA MU JELE

Ŵakati ŵachita Paska mu 30 C.E., Yesu na ŵasambiri ŵake ŵakafumamo mu Yerusalemu. Kweni m’malo mwa kuluta kukwawo ku Galileya, iwo ŵakalazga kunyake. Ŵakaluta ku Yudeya, uko ŵakakabatiza ŵanthu ŵanandi chomene. Yohane Mubatizi nayo wakabatiza ŵanthu pafupifupi chaka chimoza. Ndipo ŵasambiri ŵake ŵanyake ŵakaŵa ŵachali na iyo. Pa nyengo iyi ŵakwenera kuti ŵakaŵa ku Mlonga wa Yorodani.

Yesu wakabatizapo munthu waliyose yayi. Kweni ŵasambiri ŵake ndiwo ŵakabatizanga ŵanthu. Pa nyengo iyi, Yesu na Yohane ŵakasambizganga Ŵayuda awo ŵakang’anamuka mtima na kuleka zakwananga izo ŵakanangira Dango la Chiuta.—Milimo 19:4.

Ŵasambiri ŵa Yohane ŵakachita sanji, ŵakadandawuranga vya Yesu kuti: “Munthu yura mukaŵa nayo . . . wakubatiza ndipo ŵanthu wose ŵakuluta kwa iyo.” (Yohane 3:26) Kweni Yohane wakachita sanji yayi. Wakakondwa chomene kuwona kuti Yesu uteŵeti wake ukumwendera makora ndipo wakakhumbanga kuti ŵasambiri ŵake nawo ŵakondwenge. Yohane wakaŵakumbuska kuti: “Imwe mukunichitira ukaboni kuti nkhati, ‘Ndine Khristu chara, kweni natumika panthazi pake.’” Kuti ŵapulikiske makora icho wakang’anamuranga, Yohane wakati: “Waliyose uyo wali na mwali ni mweneko wa nthengwa. Kweni mubwezi wa mweneko wa nthengwa, para wakwima na kumupulika, wakuŵa na chimwemwe chikuru chifukwa cha mazgu gha mweneko wa nthengwa. Ntheura chimwemwe chane chafiskika.”—Yohane 3:28, 29.

Yohane pakuŵa mubwezi wa mweneko wa nthengwa, wakakondwa chomene myezi yakumanyuma apo wakaŵalongoranga Yesu ŵasambiri ŵake. Ŵasambiri ŵanyake ŵakalondezga Yesu, ndipo pakati pajumpha nyengo ŵakaphakazgika na mzimu utuŵa. Yohane wakakhumbanga kuti ŵasambiri ŵake ŵalondezgenge Yesu. Nakuti Yohane wakizira kuzakanozgera nthowa Khristu. Yohane wakati: “Iyo wakwenera kulutilira kusazgikira, kweni ine nkhwenera kulutilira kuchepa.”—Yohane 3:30.

Yohane munyake, uyo wakamba kulondezga Yesu, wakazakalongosora uko Yesu wakafuma kweniso mulimo ukuru uwo wali nawo wa kovwira ŵanthu kuti ŵazakapone. Iyo wakalemba kuti: “Uyo wakufuma kuchanya wali pachanya pa ŵanyake wose. . . . Awiske ŵakutemwa Mwana ndipo ŵapeleka vinthu vyose mu mawoko ghake. Uyo wakupulikana mwa Mwana wali na umoyo wamuyirayira. Uyo wakuleka kupulikira Mwana wazamuwona umoyo chara, kweni ukali wa Chiuta ukukhalilira pa iyo.” (Yohane 3:31, 35, 36) Uwu ukaŵa unenesko wakuzirwa nadi wakuti ŵanthu ŵawumanye!

Nyengo yichoko waka Yohane wakati wayowoya kuti mulimo wake ukwenera kuchepa, Themba Herode likamukaka. Chikachitika ntchakuti Herode wakatora Herodiya, muwoli wa mukuru wake Filipu. Ntheura Yohane wakati wamususka pa nkhani iyi, Herode wakamujalira mu jele. Yesu wakati wapulika kuti Yohane wajalirika mu jele, wakafumako ku Yudeya pamoza na ŵasambiri ŵake, ‘ŵakaluta ku Galileya.’—Mateyu 4:12; Mariko 1:14.