Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Yesu ni Nthowa, Unenesko, na Umoyo

 MUTU 72

Yesu Wakatuma Ŵasambiri 70 Kukapharazga

Yesu Wakatuma Ŵasambiri 70 Kukapharazga

LUKA 10:1-24

  • YESU WAKASORA ŴASAMBIRI 70, WAKAŴATUMA KUKAPHARAZGA

Kukaŵa kuumaliro wa 32 C.E., ndipo pakajumpha vyaka vitatu kufuma apo Yesu wakabatizikira. Iyo na ŵasambiri ŵake ŵakaŵapo pa Chiphikiro cha Mahema ku Yerusalemu. Ŵakwenera kuti ŵakaŵa ŵachali kufupi na Yerusalemu. (Luka 10:38; Yohane 11:1) Nakuti mu myezi 6 iyo yikakhalako kuti wafwe, Yesu wakapharazganga mu Yudeya panji ku sirya linyake la Mlonga wa Yorodani mu chigaŵa cha Pereya. Mu vigaŵa ivi namo wakakhumbanga kupharazgamo.

Kumasinda, Paska la mu 30 C.E. likati lajumpha, Yesu wakamara myezi yinandiko kupharazga mu Yudeya na kwenda mu Samariya. Kufuma apo, Ŵayuda ku Yerusalemu ŵakakhumbanga kumukoma pa Paska mu 31 C.E. Pakati pajumpha chaka chimoza na hafu, Yesu wakapharazga chomene kumpoto kwa Galileya. Pa nyengo yira, ŵanthu ŵanandi ŵakazgoka ŵasambiri ŵake. Mu Galileya, Yesu wakasambizga ŵapositole ŵake na kuŵatuma kuti ŵakapharazgenge. Wakaŵaphalira kuti, “Mupharazgenge kuti: ‘Ufumu wakuchanya waneng’enera.’” (Mateyu 10:5-7) Sono Yesu wakanozga upharazgi wapadera mu Yudeya.

Apo wakambanga upharazgi wapadera uwu, Yesu wakasora ŵasambiri 70 na kuŵatuma ŵaŵiriŵaŵiri. Ntheura pakaŵa magulu 35 gha ŵapharazgi ŵa Ufumu mu chigaŵa ichi. ‘Vuna yikaŵa yinandi chomene, kweni ŵantchito ŵakaŵa ŵachoko.’ (Luka 10:2) Ŵapharazgi aŵa ŵakadangira mu malo agho Yesu wakakhumbanga kuyako. Ŵasambiri 70 aŵa ŵakapika mazaza kuchizga ŵalwari na kupharazgira ŵanthu uthenga uwo Yesu wakapharazganga.

Ŵasambiri aŵa ŵakeneranga kusambizga mu masunagoge pera yayi. Yesu wakaŵaphalira kuti ŵalutenge mu nyumba za ŵanthu. Wakati: “Nyumba yiliyose iyo mwamunjiramo, pakwamba mukati: ‘Mtende uŵe mu nyumba iyi.’ Ndipo usange muli munthu wakutemwa mtende, mtende winu wamuŵa pa iyo.” Kasi uthenga wawo ukaŵa wakuti wuli? Yesu wakati: ‘Mukaŵaphalire kuti: “Ufumu wa Chiuta waneng’enera.”’—Luka 10:5-9.

Ivyo Yesu wakaphalira ŵasambiri 70 aŵa vikayananga waka na ivyo wakaphalira ŵapositole 12 apo wakaŵatuma kukapharazga mu Galileya chaka chimoza kumasinda. Wakaŵaphalira kuti ni wose yayi awo ŵamuŵapokelera makora. Kweni ivyo ŵamuchita, vyamovwira awo ŵapokelera uthenga wawo kuti para kunthazi Yesu wazakiza, ŵazakaŵe ŵakunozgeka kukumana nayo na kusambira kwa iyo.

Nyengo yichoko waka, magulu 35 gha ŵapharazgi ŵa Ufumu ghakawelera kwa Yesu. Ŵakaphalira Yesu mwakukondwa kuti: “Fumu, na viŵanda wuwo vikatipulikira mu zina linu.” Nkhani iyi yikamukondweska chomene Yesu, ntheura wakati: “Nkhuwona Satana wawa kale nga ni leza kufuma kuchanya. Wonani, namupani mazaza ghakukandira pasi njoka na ŵakalizga.”—Luka 10:17-19.

Apa Yesu wakasimikizgira ŵasambiri ŵake kuti ŵazamuchita vinthu vikuru. Ŵazamuŵa nga ŵakukandira pasi njoka na ŵakalizga. Kweniso ivyo wakayowoya vikaŵawovwira kugomezga kuti munthazi Satana wazamuwa kufuma kuchanya. Yesu wakaŵawovwiraso ŵasambiri 70 ŵara kumanya icho ntchakuzirwa chomene. Wakati: “Lekani kusekelera chifukwa chakuti mizimu yikumupulikirani, kweni sekelerani chifukwa chakuti mazina ghinu ghalembeka kuchanya.”—Luka 10:20.

Yesu wakakondwa chomene ndipo wakalumba Ŵadada ŵake pakweru chifukwa cha kuzomerezga ŵateŵeti ŵake ŵakujiyuyura aŵa kuchita milimo yankhongono. Yesu wakang’anamukira ku ŵasambiri ŵake, wakaŵaphalira kuti: “Ŵakukondwa mbanthu awo maso ghawo ghakuwona vinthu ivyo imwe mukuwona. Pakuti nkhumuphalirani kuti, ntchimi zinandi na mathemba ŵakakhumbanga kuwona vinthu ivyo imwe mukuwona kweni ŵakaviwona chara. Ŵakakhumbanga kupulika vinthu ivyo imwe mukupulika kweni ŵakavipulika chara.”—Luka 10:23, 24.

Manyani Vinandi

Chifukwa Wuli Yesu Wakatemwanga Kuyowoya vya Ufumu wa Chiuta?

Yesu wakatemwanga chomene kuyowoya vya Ufumu wa Chiuta kuluska chilichose.