Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Yesu ni Nthowa, Unenesko, na Umoyo

 MUTU 9

Wakakulira mu Nazarete

Wakakulira mu Nazarete

MATEYU 13:55, 56 MARIKO 6:3

  • MBUMBA YA YOSEFE NA MARIYA YIKAKURA

  • YESU WAKASAMBIRA NTCHITO YA MAWOKO

Yesu wakakulira mu Nazarete, uwo ukaŵa msumba uchoko kweniso wambura kuzirwa. Msumba uwu ukaŵa kumpoto, mu chigaŵa cha mapiri cha Galileya, kumanjiliro gha dazi kwa Nyanja ya Galileya.

Yosefe na Mariya ŵakiza ku malo agha kufuma ku Eguputo apo Yesu wakwenera kuti wakaŵa na vyaka viŵiri. Vikulongora kuti pa nyengo iyi ndiyo pera mwana uyo ŵakaŵa nayo. Kweni pamanyuma pakababikaso ŵanung’una ŵake: Yakobe, Yosefe, Simoni, na Yudasi. Yosefe na Mariya ŵakababaso ŵana ŵasungwana, awo ŵakaŵa ŵadumbu ŵa Yesu. Ntheura Yesu wakaŵa na ŵanung’una kweniso ŵadumbu 6.

Yesu wakaŵaso na ŵabali ŵanyake. Tikumanya kale vya Elizabeti na mwana wake, Yohane. Iwo ŵakakhalanga kutali chomene, ku Yudeya. Kweni mu Galileya mwenemura mukakhalanga Salome, uyo wakwenera kuti wakaŵa munung’una wa Mariya. Ntheura iyo wakaŵa nyina muchoko wa Yesu. Mfumu wa Salome wakaŵa Zebediya. Ntheura, ŵana ŵawo, Yakobe na Yohane, ŵakaŵa ŵabali ŵa Yesu. Tikumanya yayi usange Yesu wakachezganga nawo chomene ŵanyamata aŵa apo wakaŵa muchoko. Kweni paumaliro ŵakenderanga lumoza, ŵakaŵa ŵapositole ŵake.

Yosefe wakalimbikiranga chomene ntchito kuti wawovwire mbumba yake. Iyo wakaŵa kalipentara. Yosefe wakamuleranga Yesu nga ni mwana wakubaba yekha. Ntheura Yesu wakachemekanga “mwana wa kalipentara.” (Mateyu 13:55) Yosefe wakasambizga Yesu ntchito ya ukalipentara, ndipo wakayimanya nadi. Nakuti pamanyuma ŵanthu ŵakanenanga Yesu kuti: “Uyu ni kalipentara.”—Mariko 6:3.

Yosefe na mbumba yake ŵakatemwanga chomene kusopa Yehova. Pakulondezga Dango la Chiuta, Yosefe na Mariya ŵakasambizganga ŵana ŵawo vya Chiuta ‘para ŵakukhala pasi mu nyumba yawo, para ŵakwenda pa nthowa, para ŵakugona pasi, na para ŵakuwuka.’ (Dotoronome 6:6-9) Mu Nazarete mukaŵa sunagoge. Tikugomezga kuti nyengo zose Yosefe na mbumba yake ŵakalutanga kwenekura kukasopa. Tikuŵazga kuti Yesu “wakanjira mu sunagoge pa zuŵa la Sabata kuyana na kaluso kake.” (Luka 4:16) Mbumba iyi yikakondwangaso chomene kuluta ku tempile la Yehova ku Yerusalemu.

Manyani Vinandi

Yosefe Wakavikilira na Kupwelelera Mbumba Yake Kweniso Wakagongowa Yayi

Kasi Yosefe wakavikilira wuli mbumba yake? Chifukwa wuli wakatora Mariya na Yesu kuluta nawo ku Eguputo?