Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Yesu ni Nthowa, Unenesko, na Umoyo

 MUTU 10

Yesu Pamoza na Mbumba Yakwake Ŵakaluta ku Yerusalemu

Yesu Pamoza na Mbumba Yakwake Ŵakaluta ku Yerusalemu

LUKA 2:40-52

  • YESU WAKAŴA NA VYAKA 12 APO WAKAFUMBANGA ŴASAMBIZGI

  • YESU WAKACHEMANGA YEHOVA KUTI “ADADA”

Nyengo yikakwana yakuti Yosefe na mbumba yake, pamoza na ŵabwezi kweniso ŵabali ŵawo, ŵanyamuke ulendo wa ku Yerusalemu. Ulendo uwu ukaŵangako chaka chilichose. Ŵakalutanga ku Yerusalemu kukachita Paska, nga umo Dango likakhumbiranga. (Dotoronome 16:16) Ukaŵa mtunda wa makilomita pafupifupi 120 kufuma ku Nazarete kukafika ku Yerusalemu. Pa nyengo iyi waliyose mtima ukaŵanga muchanya. Yesu wakaŵa na vyaka 12, ndipo wakaŵa wakunweka chomene kukaŵapo pa chiphikiro kweniso kukafikaso pa tempile.

Paska likaŵa la zuŵa limoza pera yayi kwa Yesu na mbumba yakwake. Para Paska lachitika, zuŵa lakulondezgapo likaŵanga “zuŵa lakwamba la Vingwa Vyambura Nthukumusi.” Ntheura ŵakaŵangaso na Chiphikiro cha Vingwa Vyambura Nthukumusi cha mazuŵa 7. (Mariko 14:12) Ichi nacho chikaŵa chigaŵa cha nyengo ya Paska. Ntheura ukaŵanga ulendo wa sabata ziŵiri, ndiko kuti, nyengo yakunyamukira ku Nazarete, yakukhalira mu Yerusalemu na kuwelera kukwawo. Kweni chaka chira, ulendo wura ukatora nyengo yitaliko chifukwa cha ivyo vikachitikira Yesu. Suzgo ili likasangika apo ŵakaweranga kufuma ku Yerusalemu.

Apo ŵakendanga, Yosefe na Mariya ŵakaghanaghananga kuti Yesu wali pakati pa ŵabali na ŵabwezi ŵawo awo ŵakenderanga lumoza. Kweni ŵakati ŵapumura pa nthowa kuti ŵagone, ŵakasanga Yesu wakuwoneka yayi. Ntheura ŵakamba kumupenja pakati pa ŵanyawo, kweni ŵakamusanga yayi. Kufuma apo, Yosefe na Mariya ŵakawelera ku Yerusalemu kuti ŵakamupenje.

Ŵakapenja zuŵa lose, kweni ŵakamusanga yayi. Zuŵa lachiŵiri nalo ŵakamusangaso yayi. Paumaliro, pa zuŵa lachitatu, ndipo ŵakamusanga mwana wawo mu chimoza cha vipinda vya mu tempile. Ŵakasanga kuti Yesu wakhala pakati pa ŵasambizgi Ŵachiyuda. Wakapulikizganga, kufumba mafumbo, na kuzizika ŵanthu pa umo wakapulikiskiranga vinthu.

Mariya wakafumba kuti: “Wamwana, wachitirachi nthena? Awuso na ine tasuzgika chomene kukupenja.”—Luka 2:48.

Yesu wakazizwa kuwona kuti ŵakamanyanga yayi uko ŵangamusanga. Wakati: “Mwanipenjerangachi? Kasi mwamanyanga chara kuti nkhwenera kuŵa mu nyumba ya Adada?”—Luka 2:49.

Sono ŵakati ŵamusanga, Yesu pamoza na Yosefe na Mariya ŵakawelera ku Nazarete, ndipo Yesu wakalutilira kuŵapulikira. Wakalutilira kuŵa wavinjeru ndipo wakakuranga makora. Nangauli wakaŵa wachali muchoko, wakatemwekanga na Chiuta kweniso ŵanthu. Nadi, kufuma waka pa wanichi wake, Yesu wakatemwanga vya Chiuta kweniso wakachindikanga ŵapapi ŵake. Apa tikusambirako vinandi kwa iyo.