Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Ufumu wa Chiuta Ukuwusa!

 MUTU 17

Kusambizga Ŵateŵeti ŵa Ufumu

Kusambizga Ŵateŵeti ŵa Ufumu

FUNDO YIKURU MU MUTU UWU

Umo masambiro ghakufuma kwa Chiuta ghakovwilira ŵateŵeti ŵa Ufumu kufiska milimo yawo

1-3. Kasi Yesu wakachita wuli kuti ntchito ya kupharazga yikafike patali? Kweni kasi pangaŵa mafumbo wuli?

KWA vyaka viŵiri, Yesu wakapharazga mu chigaŵa chose cha Galileya. (Ŵerengani Mateyu 9:35-38.) Wakendera misumba na mizi yinandi, kusambizga mu masunagoge, na kupharazga makani ghawemi gha Ufumu. Kose uko wakapharazganga, mizinda yikathilimukiranga kwenekuko. Iyo wakati “vuna njinandi,” ndipo ŵantchito ŵanandi ŵakukhumbikwa.

2 Yesu wakanozga vyakuti ntchito iyi yikafike patali. Wakachita vichi? Wakatuma ŵapositole 12 “kukapharazga Ufumu wa Chiuta.” (Luka 9:1, 2) Panji ŵapositole ŵakakayikanga kuti ŵangafiska ntchito iyi. Ntheura pambere wandaŵatume, wakachita ivyo Awiske ŵakachita na iyo. Wakaŵasambizga.

3 Nase tingaŵa na mafumbo pa nkhani iyi: Kasi Awiske ŵakamusambizga vichi Yesu? Kasi Yesu wakaŵasambizga vichi ŵapositole ŵake? Kasi Themba ili lasambizga wuli ŵalondezgi ŵake mazuŵa ghano kuti ŵafiske milimo yawo? Usange laŵasambizga nadi, laŵasambizga mbu?

“Umo Adada Ŵali Kunisambizgira Ndimo Nkhuyowoyera”

4. Kasi Awiske ŵakamusambizga pawuli Yesu, ndipo wakasambilira nkhu?

4 Yesu wakati wakasambizgika na Awiske. Apo wakateŵetanga pano pasi, wakati: “Umo Adada ŵali kunisambizgira ndimo nkhuyowoyera vinthu ivi.” (Yoh. 8:28) Kasi wakasambira pawuli, ndipo wakasambilira nkhu? Panyake Mwana wakwamba kubabika wa Chiuta uyu wakamba kusambira wati walengeka waka. (Kol. 1:15) Pakuti wakakhala na Awiske kuchanya vyaka vyambura mapendeko, ndikuti nyengo yose iyi wakategherezganga na kuwona ivyo “Msambizgi Mukuru” wakachitanga. (Yes. 30:20) Pa chifukwa ichi, Mwana uyu ndiyo wakumanya makora chomene makhaliro, milimo, na khumbo la Awiske.

5. Kasi Awiske ŵakamusambizga vichi Mwana vya uteŵeti uwo wakenera kuzakachita pano pasi?

 5 Pakati pajumpha nyengo, Yehova wakaphalira Mwana wake ntchito iyo wazamuchita pa charu chapasi. Pali uchimi uwo ukutiphalira umo vinthu vikaŵira pakati pa Msambizgi Mukuru na Mwana wake wakwamba kubabika. (Ŵerengani Yesaya 50:4, 5.) Uchimi uwu ukuti Yehova wakawuskanga Mwana uyu “mulenji na mulenji.” Mazgu agha ghakulongora kuti wakachitanga nga ni msambizgi uyo wakuwuska mwana wake wa sukulu mulenjilenji kuti wamusambizge. Buku linyake lakulongosora vya Baibolo likuti: “Yehova wakamutoranga nga ni mwana wa sukulu, na kumuphalira icho wamupharazga, kweniso umo wamupharazgira.” Ku “sukulu” yakuchanya iyi, Yehova wakasambizga Mwana wake ‘icho wakenera kuphara na kuyowoya.’ (Yoh. 12:49) Awiske ŵakamuphalira chakuti wasambizge. * Apo Yesu wakaŵa pano pasi, wakachita nadi ivyo wakasambira. Wakachita uteŵeti uwo iyo wakatumika, kweniso wakasambizga awo ŵakamulondezganga umo ŵangachitira uteŵeti wawo.

6, 7. (a) Kasi Yesu wakaŵasambizga vinthu wuli ŵapositole? Kasi masambiro agha ghakaŵawovwira wuli? (b) Kasi Yesu wakuŵasambizga vichi awo ŵakumulondezga?

6 Kasi Yesu wakaŵasambizga vichi ŵapositole ŵake? Mu Mateyu chaputara 10 tikusanga ivyo wakaphalira ŵapositole ŵake kuti ŵachite pa uteŵeti uwu. Pakaŵa vinthu ivi: uko ŵamupharazga (vesi 5 na 6), mutu wa nkhani (vesi 7), kugomezga Yehova (vesi 9, 10), umo ŵangayowoyera na ŵanthu (vesi 11-13), umo ŵangachitira na awo ŵakana (vesi 14, 15), na umo ŵangachitira para ŵanthu ŵamba kuŵasuzga (vesi 16-23). * Pakuti Yesu wakaŵasambizga makora ŵapositole, ŵakanozgeka ndipo ŵakapharazga nadi makani ghawemi.

7 Mazuŵa ghano ke? Yesu, Themba la Ufumu wa Chiuta, waŵapa ntchito yikuru chomene awo ŵakumulondezga, nga nkhupharazga ‘makani ghawemi gha Ufumu mu charu chose kuti uŵe ukaboni ku mitundu yose.’ (Mat. 24:14) Kasi watisambizga umo tingachitira ntchito yakuzirwa iyi? Enya, watisambizga. Kuchanya uko wali, Yesu, Themba lithu, wakuwoneseska kuti awo ŵakumulondezga ŵasambizgika umo ŵangapharazgira, na umo ŵangachitira milimo yapadera iyo ŵali nayo mukati mu gulu.

Kusambizga Ŵateŵeti Kuti Ŵaŵe Ŵapharazgi

8, 9. (a) Kasi chilato chikuru cha Sukulu ya Uteŵeti wa Chiuta chikaŵa chakuti wuli? (b) Kasi imwe Sukulu iyi yamovwirani wuli kuŵa ŵaluso pakupharazga?

8 Kwamba kale, gulu la Yehova likusambizga ŵanthu ŵake pa ungano wa dera, na wa chigaŵa. Kweniso mu mpingo tikusambizgika kupharazga, pa Ungano wa Uteŵeti. Ndipouli, kwamba mu 1940, ŵabali awo ŵakudangilira pa ntchito ku maofesi ghithu ghakuru ŵakamba kunozga masukulu.

9 Sukulu ya Uteŵeti wa Chiuta. Nga umo tasambilira,  sukulu iyi yikamba mu 1943. Kasi chilato cha sukulu iyi chikaŵa chakuti chovwire waka ŵasambiri kuti ŵasambizgenge mwaluso mu mpingo? Yayi. Fundo yikuru ya sukulu iyi yikaŵa yakuti yisambizge ŵanthu ŵa Chiuta kuti ŵalumbenge makora Yehova para ŵakupharazga. (Sal. 150:6) Yikawovwiranga wose awo ŵakanjira sukulu iyi kuti ŵaŵe ŵaluso pakuŵa ŵateŵeti ŵa Ufumu.

10, 11. Kasi mazuŵa ghano mbanjani ŵakusambirako sukulu ya Giliyadi? Kasi chilato cha sukulu iyi ntchivichi?

10 Sukulu Yakusambizga Baibolo ya Giliyadi. Iyo mazuŵa ghano tikuti Sukulu Yakusambizga Baibolo ya Giliyadi, yikamba pa Mande, Febuluwale 1, 1943. Chilato chikaŵa chakuti ŵasambizgenge ŵapayiniya na ŵateŵeti ŵanyake ŵanyengozose kuti ŵakaŵe ŵamishonale mu vyaru vinyake. Kweni kwamba mu Okutobala 2011, awo ŵakuluta ku sukulu iyi ni awo ŵakuchita kale uteŵeti wapadera wanyengozose. Aŵa mbapayiniya ŵapadera, ŵalaŵiliri ŵakwendakwenda na ŵawoli ŵawo, awo ŵakuteŵetera pa Beteli, na awo mbamishonale kweni ŵakasambira yayi sukulu iyi.

11 Kasi chilato cha sukulu ya Giliyadi ntchivichi? Mubali uyo wasambizga sukulu iyi vyaka vinandi wakuti chilato chake “nkhukhozga chipulikano cha ŵasambiri apo ŵakusambira Mazgu gha Chiuta, na kuŵasambizga makhaliro agho ghangaŵawovwira kuti ŵachite makora uteŵeti wawo. Kweniso chinyake nkhovwira ŵasambiri kuti ŵatemwenge chomene kupharazga.”—Efe. 4:11.

12, 13. Kasi sukulu ya Giliyadi yawovwira wuli pa ntchito ya kupharazga? Yowoyani ukaboni.

12 Kasi sukulu ya Giliyadi yawovwira wuli pa ntchito ya kupharazga? Kwamba mu 1943, ŵanthu ŵakujumpha 8,500 ŵali kusambira sukulu iyi. * Ŵanthu aŵa ŵatumizgika kukapharazga mu vyaru vyakujumpha 170. Iwo ŵakuchita nadi ivyo ŵali kusambira, ŵakulimbikira kupharazga na kovwira ŵanyawo kuti ndimo nawo ŵachitirenge. Kanandi ŵamishonale ndiwo ŵakuŵa ŵakwamba kupharazga mu vigaŵa ivyo ŵapharazgi mbachoko panji kulijirethu.

13 Ndivyo vikachitika ku Japan, uko ŵakaleka kupharazga pagulu chifukwa cha Nkhondo Yachiŵiri ya Charu Chose. Mu Ogasiti 1949, ŵapharazgi ŵakakwananga yayi 10 mu Japan. Kweni kuumaliro wa chaka ichi, ku Japan kukaluta ŵamishonale 13 ndipo ŵakamba kupharazga. Mbwenu ŵanyake ŵakalutaso. Ŵakamba kupharazga mu misumba yikuruyikuru, ndipo pamanyuma ŵakalutaso mu misumba yinyake. Ŵamishonale aŵa ŵakachiskanga awo ŵakasambiranga nawo na ŵanji wose kuti ŵambe upayiniya. Ŵamishonale aŵa ŵali kovwira chomene. Sono mu Japan muli ŵapharazgi ŵa Ufumu ŵakujumpha 216,000. Mu charu ichi, 40 peresenti ya ŵapharazgi mbapayiniya. *

14. Kasi masukulu ghose agha ghakutipa ukaboni wuli? (Wonaniso bokosi la mutu wakuti “ Masukulu Agho Ghakusambizga Ŵateŵeti ŵa Ufumu.”)

 14 Masukulu ghanyake ghakusambizga uteŵeti. Sukulu ya Uteŵeti wa Upayiniya, Sukulu Yakusambizga Baibolo ya Ŵakhristu Ŵakutorana, na Sukulu Yakusambizga Baibolo ya Ŵabali Ŵambura Kutora ni masukulu agho ghawovwira kuti ŵasambiri ŵakure mwauzimu, na kuŵawovwira kudangilira pakupharazga. * Masukulu ghose agha ghakutipa ukaboni wakuti Themba likusambizga awo ŵakulilondezga kuti ŵafiske uteŵeti wawo mwakukwana.—2 Tim. 4:5.

Kusambizga Ŵabali Kuti Ŵachitenge Makora Milimo Yapadera

15. Kasi awo ŵali na maudindo ŵakumuyezga wuli Yesu?

15 Mwakumbuka ivyo uchimi wa Yesaya ukuyowoya? Ukuti Yesu wakasambizgika na Chiuta. Ku “sukulu” iyi, kuchanya, Mwana wakasambira “kuzgora wakuvuka na mazgu ghakwenelera.” (Yes. 50:4) Nakuti ndivyo wakachitanga pano pasi; iyo wakapumuzganga wose awo ŵakaŵa ‘ŵakuphyoka na kunyekezgeka.’ (Mat. 11:28-30) Ŵanalume awo  ŵali na maudindo ŵakuyezga Yesu. Ŵakupumuzga ŵabali na ŵadumbu ŵawo. Kuti ŵachite makora ivi, gulu lanozga masukulu ghanandi kuti ghaŵawovwire kuteŵetera makora Ŵakhristu ŵanyawo.

16, 17. Kasi chilato cha Sukulu ya Uteŵeti wa Ufumu ntchivichi? (Wonaniso mazgu ghamusi.)

16 Sukulu ya Uteŵeti wa Ufumu. Kilasi lakwamba la sukulu iyi likamba pa Malichi 9, 1959, ku South Lansing, New York. Awo ŵakasambirako mbalaŵiliri ŵakwendakwenda na ŵateŵeti ŵa mpingo, ndipo sukulu iyi yikaŵa ya mwezi umoza. Pamanyuma, ŵakamba kusambizga sukulu iyi mu viyowoyero vinandi, ndipo pachoko na pachoko ŵakamba kusambizga ŵabali pa charu chose. *

Mubali Lloyd Barry wakusambizga pa Sukulu ya Uteŵeti wa Ufumu ku Japan, 1970

17 Buku Lapachaka Lachingelezi mu 1962, likayowoya chilato cha sukulu iyi, likati: “Pakuti nthangwanika n’zinandi, mulaŵiliri wakwenera kuŵa munthu uyo wangakwaniska vyose makoraghene, kuti wawovwirenge waliyose mu mpingo. Kweni pakovwira mpingo wangaluwanga mbumba yake yayi. Mahara ghakukhumbikwa. Ŵateŵeti ŵa mpingo  pa charu chose ŵapika mwaŵi wapadera, kuti ŵize pamoza pa Sukulu ya Uteŵeti wa Ufumu na kusambira umo ŵangachitira ivyo Baibolo likuti mulaŵiliri wachitenge.”—1 Tim. 3:1-7; Tito 1:5-9.

18. Kasi ŵanthu wose ŵa Chiuta ŵakovwirika wuli na Sukulu ya Uteŵeti wa Ufumu?

18 Ŵanthu wose ŵa Chiuta ŵakovwirika na Sukulu ya Uteŵeti wa Ufumu. Ŵakovwirika mbu? Para ŵalara na ŵateŵeti ŵakovwira ŵakuchita ivyo ŵakusambira ku sukulu iyi, nawo ŵakupumuzgika na kupumuzga Ŵakhristu ŵanyawo, nga umo wakachitiranga Yesu. Asi tikukondwa para mulara panji muteŵeti wakovwira wakutipembuzga, kutitegherezga, panji kuchezga nase? (1 Tes. 5:11) Ŵanalume aŵa ni thumbiko nadi ku mipingo.

19. Kasi Komiti Yakusambizga yikunozgaso masukulu wuli? Kasi chilato chake ntchakuti wuli?

19 Masukulu ghanyake. Wupu Wakulongozga ukunozga masukulu ghanyake kwendera mu Komiti Yakusambizga. Chilato cha masukulu agha nkhovwira ŵabali awo ŵali na maudindo kuti ŵachitenge makora milimo yawo. Ghakovwira ŵalara ŵa mpingo, ŵalaŵiliri ŵakwendakwenda, na awo ŵali mu Komiti ya Munthavi. Masambiro agha ghakufuma mu Baibolo ndipo ghakuŵakhozga mwauzimu, na kuŵawovwira kuti ŵenderenge fundo za mu Baibolo pakulaŵilira mberere zakuzirwa izo Yehova waŵaŵikizga.—1 Pet. 5:1-3.

Kilasi lakwamba la Sukulu Yakusambizga Uteŵeti mu Malawi, 2007

20. Chifukwa wuli Yesu wakuti tose ‘tikusambizgika na Yehova’? Kasi imwe muchitenge wuli na masambiro agha?

20 Tawona kuti Themba, Khristu, likuwoneseska kuti wose awo ŵakulilondezga ŵasambizgika makora. Masambiro ghose agha ghakambira kuchanya: Yehova wakasambizga Mwana wake, Mwana wakasambizga awo ŵakamulondezga. Lekani Yesu wakuti tose ‘tikusambizgika na Yehova.’ (Yoh. 6:45; Yes. 54:13) Ipo tiŵikengeko mahara para Themba likutisambizga. Ndipo tingaluwanga yayi kuti masambiro ghose agha, chilato chake ntchakuti ghatikhozge mwauzimu kuti tifiske uteŵeti withu mwakukwana.

^ ndime 5 Tikumanya wuli kuti Mwana wakasambizgika na Awiske umo wangasambizgira? Pali ukaboni: Yesu wakatemwanga kuyowoya ntharika pakusambizga, ndipo pali uchimi uwo ukayowoyerathu kuti ndivyo wazamuchita. (Sal. 78:2; Mat. 13:34, 35) Ntheura mwenecho wa uchimi uwu, uyo ni Yehova, wakamanya kuti Mwana wake wazamuyowoyanga ntharika pakusambizga.—2 Tim. 3:16, 17.

^ ndime 6 Pamanyuma, Yesu ‘wakasora ŵanyakeso 70 na kuŵatuma ŵaŵiriŵaŵiri’ kuti ŵakapharazge. Aŵa nawo wakaŵasambizga dankha.—Luka 10:1-16.

^ ndime 12 Ŵanyake kakuŵa kakwamba yayi kusambira sukulu ya Giliyadi.

^ ndime 13 Vinyake mungaŵazga mu buku la Jehovah’s Witnesses—Proclaimers of God’s Kingdom, mutu 23. Likulongosora vinandi ivyo ŵamishonale ŵachita.

^ ndime 14 Ŵali kusazga masukulu ghaŵiri agho ghazunulika paumaliro, ndipo yikuchemeka Sukulu ya Ŵapharazgi ŵa Ufumu.

^ ndime 16 Mazuŵa ghano ŵalara wose ŵakusambirako Sukulu ya Uteŵeti wa Ufumu. Yikuŵako para pajumpha vyaka vichoko waka, ndipo nyengo yakusambilira yikusintha. Kwamba mu 1984 ŵateŵeti ŵakovwira nawo ŵakusambirako sukulu iyi.

Manyani Vinandi

“Ghanaghana Makora na Mendero gha Malundi Ghako” Kuti Ucite Makora

Kasi mungawuskamo wuli vyakujandizga mu nthowa na kufiska vilato vinu vyauzimu?

Wovwirani Ŵanji Kuti Ŵacite Vinandi

Kasi ŵawukirano panji awo ŵabapatizika sonosono tingaŵawovwira wuli kuti ŵakure mwauzimu?