Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Ufumu wa Chiuta Ukuwusa!

 MUTU 16

Kuwungana Kuti Tisope

Kuwungana Kuti Tisope

FUNDO YIKURU MU MUTU UWU

Umo maungano ghakambira na kuzirwa kwake

1. Kasi ŵasambiri ŵakawovwirika wuli pa ungano? Chifukwa wuli chikaŵa chakuzirwa?

YESU wakati wawuka ku ŵakufwa, ŵasambiri ŵake ŵakawungana kuti ŵakhwimiskane. Ŵakakiya vijaro chifukwa cha kopa ŵalwani. Kweni ŵakaleka kopa, chifukwa Yesu wakabamuka pakati pawo na kuŵaphalira kuti: “Pokerani mzimu utuŵa.” (Ŵerengani Yohane 20:19-22.) Nyengo yinyake ŵasambiri ŵakawunganaso, ndipo Yehova wakaŵapungulira mzimu utuŵa. Ichi chikaŵapa nkhongono, chifukwa ŵakaŵa na ntchito yikuru yakuti ŵachite, yakupharazga.—Mil. 2:1-7.

2. (a) Kasi Yehova wakutipa wuli nkhongono? Chifukwa wuli Yehova wakutipa nkhongongo? (b) Chifukwa wuli ntchakuzirwa kupatura Nyengo Yakusopera ya Mbumba? (Wonani mazgu ghamusi na bokosi la mutu wakuti “ Nyengo Yakusopera ya Mbumba.”)

2 Ise tikupambana yayi na ŵabali ŵithu awo ŵakaŵako kale. (1 Pet. 5:9) Nyengo zinyake nase tikopa ŵanthu. Nase tikuthemba Yehova kuti watipe nkhongono mwakuti tilutilire kupharazga. (Efe. 6:10) Yehova wakutipa nkhongono izi para tawungana. Tili na mwaŵi kuŵapo pa maungano ghose ghaŵiri sabata yiliyose. Apa tikunena Ungano Wachisanisani na Sambiro la Gongwe la Mulinda, kweniso ungano wa Uteŵeti na Umoyo Wachikhristu. * Kweniso chaka chilichose tikuŵa na maungano ghanayi ghakuru, ungano wa chigaŵa, maungano gha dera ghaŵiri, na Chikumbusko cha nyifwa ya Khristu. Chifukwa wuli tikwenera kuŵapo pa maungano ghose agha? Kasi maungano agha ghakamba wuli? Kasi tikughawona wuli maungano agha, ndipo ichi chikutiphalira vichi?

Chifukwa Wuli Tikuwungana?

3, 4. Kasi Yehova wakukhumba kuti ŵanthu ŵake ŵachitenge vichi? Yowoyani viyelezgero.

3 Kwamba kale, Yehova wakukhumba kuti tiwunganenge na kumusopa. Mu 1513 B.C.E., Yehova wakaŵapa Dango Ŵaisrayeli. Dango ili likatenge ŵasungenge Sabata, mwakuti pa zuŵa ili ŵasopenge pamoza na mbumba zawo, kweniso kusambira Dango. (Doto. 5:12; 6:4-9) Para Ŵaisrayeli ŵapulikira dango ili, mbumba zikakhoranga, ndipo mtundu wose ukaŵanga utuŵa na wankhongono. Kweni para ŵaleka Dango, na kuzerezga waka ivyo likayowoyanga, Yehova nayo wakaŵatayanga.—Lev. 10:11; 26:31-35; 2 Mid. 36:20, 21.

 4 Kweniso tikusambirako kwa Yesu. Mwakuyana na kaluso kake, pa zuŵa la sabata wakalutanga ku sunagoge. (Luka 4:16) Yesu wakati wafwa na kuwuka, ŵasambiri wake nawo ŵakalutilira kuwungana, nangauli ŵakachitanga ivi chifukwa cha dango la Sabata yayi. (Mil. 1:6, 12-14; 2:1-4; Rom. 14:5; Kol. 2:13, 14) Para ŵawungana, ŵakasambiranga na kukhwimiskana. Kweni chinyake ntchakuti ŵakapelekanga sembe yamalumbo kwa Chiuta pakulomba, kuyowoyapo, na kwimba sumu.—Kol. 3:16; Heb. 13:15.

Ŵasambiri ŵa Yesu ŵakawungananga na kukhwimiskana

5. Chifukwa wuli tikuŵapo pa maungano gha mpingo, gha dera kweniso gha chigaŵa? (Wonaniso bokosi la mutu wakuti “ Maungano Agho Ghakukhozga Umoza Pakati pa Ŵanthu ŵa Chiuta.”)

5 Nase para tikuŵapo pa maungano sabata yiliyose, pa maungano gha dera, kweniso gha chigaŵa, tikulongora kuti tikutemwa Ufumu wa Chiuta. Kweniso pa maungano agha tikukhozgeka na nkhongono ya mzimu utuŵa na kukhwimiskana mu chipulikano para tikuyowoyapo. Kweni chakuzirwa chomene ntchakuti para tikulomba, kuyowoyapo, na kwimba sumu, ndikuti tikusopa Yehova. Maungano mazuŵa ghano ghakuchitika nga umo ghakachitikiranga na Ŵaisrayeli panji Ŵakhristu ŵakale yayi. Ndipouli, maungano ghithu ngakuzirwa chomene. Kasi maungano agha ghakamba wuli?

Maungano Agho Ghakutikhozga kuti “Titemwanenge na Kuchita Milimo Yiwemi”

6, 7. (a) Chifukwa wuli tikuwungana? (b) Kasi ndondomeko ya maungano yikaŵa wuli?

6 Mubali Charles Taze Russell wakati wamba kupenja unenesko mu Mazgu gha Chiuta, wakawona kuti ntchakuzirwa kuŵa pamoza na ŵanyake awo ŵakaŵa na chilato ichi. Mu 1879, Russell wakati: “Ine pamoza na ŵanyane mu  Pittsburgh, tikakumananga pa Sabata nga ni kilasi na kusambira Malemba.” Wose awo ŵakaŵazganga Zion’s Watch Tower ŵakachiskika kuti ŵawunganenge ndipo mu 1881, maungano ghakaŵangako mu Pittsburgh, Pennsylvania, pa Sabata na pa Chitatu. Gongwe la Mulinda Lachingelezi la Novembala 1895 likati chilato cha maungano agha chikaŵa chakuti tikhozge “ubali pakuŵa Ŵakhristu, chitemwa, kweniso kuti awo ŵizapo ŵakhozganenge.”—Ŵerengani Ŵahebere 10:24, 25.

7 Ŵasambiri ŵa Baibolo ŵakachitanga mwakupambana maungano agha, ndipo ivi vikachitika nyengo yitali. Kalata yakufuma ku gulu linyake mu United States mu 1911 yikati: “Tikuwungana kankhondi mu sabata.” Maungano agha ghakaŵangako pa Mande, Chitatu, Chinkhondi, ndiposo pa Sabata kaŵiri. Kalata yinyake yakufuma ku Africa, iyo yikathandazgika mu 1914, yikati: “Tikuwungana kaŵiri pa mwezi, ndipo maungano ghakuŵako pa Chinkhondi m’paka pa Sabata.” Kweni pamanyuma, maungano ghakamba kuchitika nga umo vikuŵira mazuŵa ghano. Pachoko waka, tiwonenge umo ungano uliwose ukambira.

8. Kasi mitu yinyake ya nkhani zachisanisani yikaŵa yakuti wuli?

8 Ungano Wachisanisani. Mu 1880, chaka chimoza kufuma apo Mubali Russell wakambira kulemba magazini ya Zion’s Watch Tower, nayo wakamba kupharazga malo na malo, umo wakachitiranga Yesu. (Luka 4:43) Umu ndimo ukambira Ungano Wachisanisani. Magazini ya Watch Tower yikapharazga ulendo uwu, yikati Russell “ngwakunweka kuyowoya namwe pa ungano wachisanisani, uwo mutu wake ngwakuti “Vinthu vyakukhwaskana na ufumu wa Chiuta” (Things pertaining to the kingdom of God”). Mu 1911, mu vyaru na vyaru mukaŵa makilasi, panji kuti mipingo yinandi yakukhazikika. Kilasi lililose likachiskika kutumizga ŵabali ŵaluso kuti ŵakayowoye nkhani 6 pa mitu nga ni cheruzgo na sembe. Para nkhani yiliyose yamara, ŵakapharazganga zina la uyo wazamuyowoya nkhani sabata yakulondezgapo na mutu wake.

9. Ni vinthu wuli vyasintha pa Ungano Wachisanisani? Kasi mungawovwira wuli pa ungano uwu?

9 Mu 1945, Gongwe la Mulinda likapharazga kuti pa charu chose pachitikenge Maungano Ghachisanisani. Likati pa maungano agha, nkhani 8 ziyowoyenge vya “masuzgo agho ghatora malo.” Kwa vyaka vinandi, awo ŵakasankhika ŵakalongosoranga nkhani izo muzga wakugomezgeka wakasora. Kweniso nawo ŵakasoranga nkhani zinyake. Kweni mu 1981, wose ŵakaphalirika kuti ŵayowoyenge nkhani izo mipingo yikapokera. * Pambere chindafike chaka cha 1990, pa nkhani zinyake ŵategherezgi ŵakapikanga mwaŵi kuyowoyapo panji kuyezgelera fundo zinyake. Kweni mu chaka chenechicho, ulongozgi ukati visinthe. Ndipo kufuma apo, munthu  wakuyowoya yekha nkhani yachisanisani. Mu 2008, ŵakachepeskako nyengo yakuyowoyera nkhani yachisanisani, kufuma pa maminiti 45 kufika pa 30. Nangauli nkhani zachisanisani zasintha, kweni para uyo wamuyowoya wanozgekera makora, vikovwira ŵategherezgi kuti ŵagomezgenge chomene Mazgu gha Chiuta, kweniso kumanya vinandi pa nkhani ya Ufumu wa Chiuta. (1 Tim. 4:13, 16) Kasi imwe mukuŵachemerako awo mukuŵapharazgira kweniso ŵanthu ŵanyake awo Mbakaboni yayi? Ntchakuzirwa kuti nawo ŵapulikengeko fundo zakufuma mu Baibolo.

10-12. (a) Kasi ni vinthu wuli vyasintha pa Sambiro la Gongwe la Mulinda? (b) Kasi tikwenera kujifumba mafumbo wuli?

10 Sambiro la Gongwe la Mulinda. Mu 1922, ŵabali awo ŵakatumikanga na Watch Tower Society kukasambizga mu mipingo na kudangilira pakupharazga, (pilgrims, mu Chingelezi) ŵakasachizga kuti chingaŵa chiwemi kuti paŵe ungano unyake wa sambiro la Gongwe la Mulinda. Sachizgo likazomerezgeka, ndipo pakwamba sambiro la Gongwe la Mulinda likaŵangako mukati mwa sabata panji pa Sabata.

Ŵakusambira Watch Tower, ku Ghana, 1931

11 Gongwe la Mulinda Lachingelezi la Juni 15, 1932, likalongosora umo ŵangachitira ungano uwu. Likati ukwenera kuchitika nga umo vikuŵira ku Beteli. Nkhani ya mu Gongwe la Mulinda ili yikati mubali ndiyo wakwenera kulongozga. Ŵabali ŵatatu ŵangakhala kunthazi na kupokerana pakuŵazga ndime. Nyengo iyo ndime mu Gongwe la Mulinda zikaŵavyanga mafumbo, ndipo uyo wakulongozga wakaphalirika kuti wapemphenge ŵategherezgi kuti ŵafumbenge mafumbo. Kufuma apo, wakapemphanga ŵanyake kuti ŵazgore mafumbo agho ghafumbika. Kweni para fundo yindapulikikwe makora, wakeneranga kulongosorapo mwakudumura.

 12 Pakwamba mpingo ukazomerezgekanga kusambira magazini iyo ŵanandi ŵatemwa. Kweni Gongwe Mulinda Lachingelezi la Epulero 15, 1933, likasachizga kuti mipingo yose yisambirenge magazini yasono. Mu 1937, mipingo yikaphalirika kuti sambiro liŵengeko pa Sabata. Kufuma apo, mu Gongwe la Mulinda Lachingelezi la Okutobala 1, 1942, mukaŵa ulongozgi uwo tichali kwendera mazuŵa ghano. Magazini iyi yikati nkhani yakusambira yiŵenge na mafumbo musi mwa peji, agho wakulongozga wafumbenge. Kweniso likati ungano uwu ukwenera kutora ora limoza. Mwakusazgirapo, likachiska awo ŵakuzgora kuti ŵayowoyenge “mazgu ghawo na ghawo” kuluska kuŵazga waka pa ndime. Sambiro la Gongwe la Mulinda yichali nthowa yakuzirwa chomene iyo muzga wakugomezgeka na wavinjeru wakutipira chakurya pa nyengo yakwenelera. (Mat. 24:45) Ntheura ntchakuzirwa kujifumba kuti: ‘Kasi nkhunozgekera sambiro la Gongwe la Mulinda sabata yiliyose? Kasi nane nkhuzgorapo, usange palije chifukwa chakulekera?’

13, 14. Yowoyani mbiri ya Sambiro la Baibolo la Mpingo. Imwe mukuwutemwerachi ungano uwu?

13 Sambiro la Baibolo la Mpingo. M’ma 1890, mavoliyumu ghanandi gha Millenial Dawn ghakati ghafuma, Msambiri wa Baibolo H. N. Rahn, uyo wakakhalanga mu msumba wa Baltimore, Maryland, U.S.A., wakasachizga kuti chingaŵa makora kusambira Baibolo mu magulu, agho ghakachemekanga Dawn Circles. Pakwamba, maungano agha, agho ŵakachitiranga mu nyumba za ŵanthu, ghakaŵa ghakuwonerapo waka. Kweni kufika mu Seputembala 1895, vikawoneka kuti magulu agha ghakwenda makora mu misumba yinandi ku United States. Ntheura Watch Tower ya mwezi uwo yikasachizga kuti wose awo ŵakusambira unenesko ŵasambirenge mu magulu. Yikati uyo wakulongozga waŵenge waluso pakuŵazga. Wakeneranga kuŵazga sentesi na kulindilira kuti ŵanthu ŵayowoyepo. Para waŵazga masentesi ghose mu ndime, ndipo ŵadumbirana, wakeneranga kuŵazga malemba. Paumaliro wa chipaturo, waliyose wakenera kuyowoyapo ivyo wapulika.

14 Zina la ungano uwu lasintha kanandi waka. Pakwamba ŵakatenge Berean Circles for Bible Study. Pakupanga zina ili, ŵakatolera ivyo ŵakachitanga Ŵabereya, pakuti ŵakasandanga Malemba mwakupwelelera. (Mil. 17:11) Kufuma apo, likasintha na kuŵa Sambiro la Buku la Mpingo. Sono likuchemeka Sambiro la Baibolo la Mpingo. Mazuŵa ghano tili kuleka kuchitira mu magulu ku nyumba, kweni mpingo wose ukukumana pamoza mu Nyumba ya Ufumu. Mu vyaka vyose ivi, tasambira mabuku, maburosha, kweniso nkhani zakufuma mu Watch Tower. Kwamba kale, wose awo ŵakwiza pa ungano uwu ŵakuchiskika kuyowoyapo. Ungano uwu  watovwira chomene kuti tipulikiske Baibolo. Kasi mukunozgekera ungano uwu na kuyowoyapo usange palije chakulekera?

15. Kasi chilato cha Sukulu ya Uteŵeti wa Chiuta chikaŵa chakuti wuli?

15 Sukulu ya Uteŵeti wa Chiuta. Carey Barber, uyo wakateŵeteranga pa ofesi yikuru ku Brooklyn, New York, wakati: “Pa Mande, Febuluwale 16, 1942, namise, ŵanalume wose pa Beteli ŵakapempheka kuti ŵanjire sukulu iyo pasono tikuti Sukulu ya Uteŵeti wa Chiuta.” Mubali Barber, uyo wakazakaŵa mu Wupu Wakulongozga, wakati ichi “ntchimoza cha vinthu vyapadera chomene ivyo Yehova wachitira ŵanthu ŵake mazuŵa ghano.” Sukulu iyi yikawovwira chomene kuti ŵabali ŵasambizgenge na kupharazga mwaluso. Pa chifukwa ichi, kwamba mu 1943, buku lakusambizgira sukulu iyi, la Course in Theocratic Ministry likamba kusangika mu mipingo pa charu chose. Gongwe la Mulinda Lachingelezi la Juni 1, 1943,  likati Sukulu ya Uteŵeti wa Chiuta yikanozgeka kuti yovwire ŵanthu ŵa Chiuta “kujisambizga mwakuti ŵaŵe ŵaluso pakupharazga vya Ufumu.”—2 Tim. 2:15.

16, 17. Kasi Sukulu ya Uteŵeti wa Chiuta yikatisambizganga waka kuyowoya mwaluso? Longosorani.

16 Pakwamba, ŵanandi vikaŵasuzganga kuyowoya pa wumba. Clayton Woodworth, Jr., uyo adada ŵake na ŵabali ŵanji ŵakagwira jele lumoza na Mubali Rutherford kwambura mulandu, wakayowoya umo vikaŵira kwa iyo, wakati: “Vikanisuzganga chomene kuyowoya nkhani. Para nkhuyowoya, vikaŵanga nga lulimi ndutali, mbwe mata nagho ghakamaranga. Mazgu ghakachitanga mangwalala.” Kweni mubali Clayton wakati wamba kuyowoya makora, ŵakamba kumupa mwaŵi kuyowoya nkhani. Sukulu iyi yikamovwira kuyowoya mwaluso, kweni chikuru chomene ntchakuti yikamusambizga kujiyuyura na kugomezga Yehova. Wakati: “Nkhasambira kuti uyo wakusambizga nkhanthu yayi. Ndipouli,  usange wanozgekera makora, ndipo wakugomezga Yehova, ŵanthu ŵakutegherezga na kusambirapo kanthu.”

17 Mu 1959, ŵadumbu nawo ŵakapika mwaŵi kunjira sukulu iyi. Mudumbu Edna Bauer wakayowoya umo vikaŵira pakupulika chipharazgo ichi pa ungano wa dera, wakati: “Ŵadumbu ŵakakondwa chomene. Nawo mwaŵi ukaŵajulikira.” Ŵabali na ŵadumbu ŵakalembeskanga mu Sukulu ya Uteŵeti wa Chiuta mwakuti Yehova waŵasambizge. Lero napo, Yehova wakutisambizga kwizira mu kabuku ka Uteŵeti na Umoyo Wachikhristu.Ŵerengani Yesaya 54:13.

18, 19. (a) Kasi mu kabuku ka Uteŵeti na Umoyo Wachikhristu tikusambiramo vichi? (b) Chifukwa wuli tikwimba pa maungano? (Wonani bokosi la mutu wakuti “ Kwimba Unenesko.”)

18 Ungano wa Uteŵeti. Kwamba mu 1919, ŵanyithu nawo ŵakakumananga dankha pambere ŵandalute kukapharazga. Nyengo iyo, ni waliyose yayi wakizanga ku ungano uwu, kweni ŵekha awo ŵakachitangako ntchito ya kugaŵa mabuku. Mu 1923, ŵakachitanga ungano uwu kamoza pa mwezi, ndipo kilasi lose, panji kuti mpingo ukaŵangapo. Mu 1928, mipingo yikaphalirika kuti ungano uwu uŵengeko sabata yiliyose. Mu 1935, Gongwe la Mulinda likachiska mipingo kuti pa ungano uwu, fundo zifumenge mu Director (pamanyuma ukazakaŵa Informant, kufuma pa Informant ukazakaŵa Uteŵeti Withu wa Ufumu). Nyengo yichoko waka, mipingo yose yikamba kuŵa na ungano uwu nyengo zose.

19 Pa ungano wa Uteŵeti na Umoyo Wachikhristu tikusambira umo tingapharazgira. (Mat. 10:5-13) Usange namwe ŵakumupaniko kabuku ka Uteŵeti na Umoyo Wachikhristu, kasi mukusambira nkhani zose na kulondezga masachizgo agho ghakuŵamo para mukupharazga?

Ungano Wakuzirwa Chomene pa Chaka

Kale Ŵakhristu ŵanyithu nawo ŵakakumbukiranga nyifwa ya Khristu chaka chilichose (Wonani ndime 20)

20-22. (a) Chifukwa wuli tikukumbukira nyifwa ya Yesu? (b) Kasi kukumbukira nyifwa ya Yesu kukumovwirani wuli?

20 Yesu wakaphalira ŵalondezgi ŵake kuti ŵakumbukirenge nyifwa yake m’paka iyo wize. Chikumbusko cha nyifwa ya Khristu chikuŵako kamoza pa chaka, nga umo vikaŵiranga na Paska. (1 Kor. 11:23-26) Chaka chilichose pa ungano uwu pakwiza ŵanthu ŵanandi chomene. Pa ungano uwu, Ŵakhristu ŵakuphakazgika ŵakukumbuskika kuti mbahaliri ŵa Ufumu. (Rom. 8:17) Kweni awo ŵali mu gulu la mberere zinyake ŵakukumbuskika kuti ŵachindikenge Themba la Ufumu wa Chiuta, na kulutilira kugomezgeka.—Yoh. 10:16.

21 Mubali Russell na ŵanyake ŵakamanya kuti ntchakuzirwa kukumbukira Mugonero wa Fumu, kweniso kuti ŵakwenera kuchita ntheura kamoza pera pa chaka. Magazini ya Watch Tower ya Epulero 1880 yikati: “Kuno ku Pittsburgh taŵanandi tili kuzgoŵera kukumbukira Paska [Chikumbusko] na kurya ivyo vikwimira thupi na ndopa za Fumu yithu.” Nyengo yichoko waka, ŵakamba kuŵa na maungano gha chigaŵa pa nyengo ya Chikumbusko. Mu 1889, kakaŵa  kakwamba kulemba lipoti la maungano ghanthena apo pakiza ŵanthu 225, ndipo 22 ŵakabatizika.

22 Tili kuleka kusazga Chikumbusko na ungano wa chigaŵa. Ndipouli, tikuchema ŵanthu wose mu chigaŵa chithu kuti ŵaŵenge nase pa Chikumbusko. Nyengo zinyake tikuwungana mu Nyumba ya Ufumu, kweni nyengo zinyake tikuchita lenti malo ghanyake. Mu 2013, ŵanthu ŵakujumpha 19 miliyoni ŵakakumbukira nyifwa ya Yesu. Ni mwaŵi ukuru kuŵapo pa Chikumbusko na kuchemerako ŵanyithu ku ungano wapadera uwu. Kasi namwe mukuchemerako ŵanthu ku Chikumbusko chaka chilichose?

Kasi Tikughawona Wuli Maungano, Ndipo ichi Chikutiphalira Vichi vya Ise?

23. Kasi imwe mukughawona wuli maungano?

23 Ŵateŵeti ŵa Yehova ŵakuwona kuti ni mphingo yayi kuwungana pamoza na kusambira. (Heb. 10:24, 25; 1 Yoh. 5:3) Themba Davide likatemwanga kuluta ku nyumba ya Yehova kukasopa. (Sal. 27:4) Ndipo Themba ili likatemwanga chomene kusopera lumoza na ŵanyake awo nawo ŵakatemwanga Chiuta. (Sal. 35:18) Yesu ke? Nanga ni apo wakaŵa muchoko, wakatemwanga chomene kuŵa mu nyumba ya Adada ŵake.—Luka 2:41-49.

Para tikutemwa chomene kuwungana ndikuti tikugomezga kuti Ufumu wa Chiuta uliko

24. Kasi para tawungana tikuŵa na mwaŵi wuli?

24 Para tikuwungana, tikulongora kuti tikumutemwa Yehova, kweniso kuti tikukhumba kukhwimiska Ŵakhristu ŵanyithu. Tikulongoraso kuti tikukhumba kusambira makhaliro ghawemi pakuŵa ŵenekaya ŵa Ufumu wa Chiuta. Nthowa yikuru iyo tikusambilira ni maungano agho ghakuchitika pa mpingo, maungano gha dera, na gha chigaŵa. Chinyake ntchakuti pa maungano agha tikusambira umo tingaŵira ŵaluso pa ntchito yithu yakuzirwa chomene. Ntchito iyi nkhuzgora ŵanthu kuŵa ŵasambiri ŵa Themba Yesu Khristu, na kulutilira kuŵawovwira. (Ŵerengani Mateyu 28:19, 20.) Munthu uyo wakutemwa chomene kuwungana wakugomezga kuti Ufumu wa Chiuta uliko nadi. Ipo tiwunganenge nyengo zose!

^ ndime 2 Nangauli tikuwungana sabata yiliyose, kweni munthu waliyose wapaturenge nyengo kuti wasambire na kusopa payekha, panji pamoza na mbumba.

^ ndime 9 Mu 2013 tikaŵa na maautilayini gha nkhani zachisanisani ghakujumpha 180.

Manyani Vinandi

Kasi Mungacita Wuli Kuti Nyengo Yakusopera ya Mbumba Yiŵenge Yakukondweska?

Wonani ivyo mbumba za mu vyaru vinyake zikucita pa Nyengo Yakusopera ya Mbumba kuti mumanye ivyo namwe mungacita.