Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Ufumu wa Chiuta Ukuwusa!

 MUTU 14

Tikugomezgeka ku Boma la Chiuta Pera

Tikugomezgeka ku Boma la Chiuta Pera

FUNDO YIKURU MU MUTU UWU

Ŵanthu ŵa Chiuta mbakugomezgeka ku boma lake pera. Ntheura mba charu chara

1, 2. (a) Kasi Ŵakhristu ŵachali kulondezga fundo wuli? (b) Kasi ŵalwani ŵayezga nthowa wuli kuti tithere, ndipo ntchivichi chachitika?

YESU wakaŵa panthazi pa Pilato, uyo wakaŵa mweruzgi wankhongono chomene mu charu cha Yuda. Pa nyengo iyi, Yesu wakayowoya fundo iyo Ŵakhristu ŵenecho ŵachali kulondezga, wakati: “Ufumu wane ngwa charu chino chara. Ufumu wane uŵenge wa charu chino mphanyi ŵateŵeti ŵane ŵarwa nkhondo kuti nileke kupelekeka ku Ŵayuda. Kweni Ufumu wane ngwakufuma ku charu chino chara.” (Yoh. 18:36) Pilato wakapeleka Yesu kuti wakomeke, kweni wakajisuzga waka. Yesu wakawuskika. Mathemba ghanyake mu ufumu wa Roma ghakayezga kuŵaparanya Ŵakhristu, kweni ghakatondeka. Ŵakhristu ŵakapharazga uthenga wa Ufumu mu charu chose.—Kol. 1:23.

2 Ufumu ukati wamba kuwusa mu 1914, ŵasilikari ŵankhongono chomene ŵakayezga kumara ŵanthu ŵa Chiuta, kweni tichalipo. Maboma ghanandi na ŵandyali ŵayezga kutichichizga kuti tinjilirepo pa mphindano zawo. Ndipouli, tichali lungalunga. Mazuŵa ghano, awo ŵali ku chigaŵa cha Ufumu wa Chiuta ŵakukhala mu vyaru vinandi. Nangauli vili nthena, tili ŵamoza. Tose tili ŵabali ndipo tikukolerana chimoza, tikunjilirapo yayi pa ndyali. Umoza withu uwu mbukaboni wakukwana wakuti Ufumu wa Chiuta ukuwusa, ndiposo kuti Yesu Khristu uyo ni Themba, wachali kulongozga, kutozga, na kuvikilira ŵanthu awo iyo wakulamulira. Tiyeni tiwone umo wachitira, ndipo tikhwimenge mu chipulikano para tawona umo watovwilira kutonda pa milandu uku tikuyezgayezga kuti tileke kuŵa “ku chigaŵa cha charu.”—Yoh. 17:14.

Pakawuka Nkhani Yikuru

3, 4. (a) Ntchivichi chikachitika kuchanya Ufumu ukati wamba kuwusa? (b) Kasi Ŵakhristu ŵakayipulikiska fundo yakuti ŵaleke kuŵa ku chigaŵa cha charu? Longosorani.

3 Ufumu ukati wamba kuwusa, kukaŵa nkhondo kuchanya, ndipo Satana wakaponyeka pa charu chapasi. (Ŵerengani Chivumbuzi 12:7-10, 12.) Pa charu napo nkhondo yikawuka, ndipo ichi chikaŵa chiyezgo ku ŵanthu ŵa Chiuta. Kweni nga ni Yesu, ŵakakana kunjilirapo pa vyacharu.  Ndipouli, pakwamba ŵakapulikiskanga yayi ng’anamuro la kulekerathu kunjilirapo pa ndyali.

4 Pa fundo iyi, mu buku 6 la Millennial Dawn, * la 1904, Ŵakhristu ŵakachenjezgeka kuti ŵaleke kunjilirapo pa nkhondo. Ndipouli, buku ili likati para munthu wachichizgika kunjira usilikari, wapemphe ntchito yambura kukora futi. Para vyatondeka, ndipo ŵamutuma kukarwa, mbwenu wawoneseske kuti waleke kukoma. Herbert Senior, uyo wakakhalanga ku Britain, ndipo wakabatizika mu 1905, wakalongosora umo vikaŵira, wakati: “Ŵabali ŵakapulikiskanga yayi. Iwo ŵakakhumbanga kumanya usange chikaŵa nadi chakwenelera kunjira usilikari chikuru ukuleka kugwira ntchito ya futi.”

5. Kasi Gongwe la Mulinda Lachingelezi la Seputembala 1, 1915, likawovwira wuli kuti ŵambe kupulikiska?

5 Kweni Gongwe la Mulinda Lachingelezi la Seputembala 1, 1915, likawovwira kuti tambe kupulikiska fundo iyi. Pa ulongozgi uwo ukaŵa mu Studies in the Scriptures, likati: “Para ndivyo tingachita, asi ndikuti tathera?” Kweni wuli usange ŵakuti ŵatilasenge na futi chifukwa cha kukana yunifomu na kurwa nkhondo? Gongwe la Mulinda ili likati: “Chiheni chomene chingaŵa ntchi: kukomeka chifukwa cha kupulikira Karonga Wamtende na dango ilo wali kutipa, panji kulasika chifukwa chakuti taluta kukawonekera waka ku nkhondo mwakuti tikondweske mafumu gha charu ichi, uku tatondekaso kupulikira visambizgo vya Themba Lakuchanya? Pa nyifwa ziŵiri izi, yakwamba yingaŵako makora. Ukufwa chifukwa cha kupulikira Themba Lakuchanya.” Nangauli Gongwe la Mulinda likayowoya fundo yakupulikikwa iyi, paumaliro likati: “Waliyose wakwenera kusankha yekha pa nkhani iyi. Ili ni sachizgo waka.”

6. Kasi mwasambirako vichi kwa Mubali Herbert Senior?

6 Ŵabali ŵanyake ŵakapulikiska fundo iyi, ndipo ŵakanozgeka kusuzgikirapo. Herbert Senior, uyo wazunulika pakwamba wakati: “Ine nkhawona kuti kugwira ntchito [yambura kukora futi] nga nkhukhizga vipolopolo mu sitima, vikuyana waka na kulonga mpholopolo mu futi kuti ŵalasire” ŵalwani. (Luka 16:10) Mubali Senior wakakana usilikari, ntheura ŵakamujalira mu jele. Iyo na ŵabali ŵanyake ŵanayi ŵakaŵa mu gulu la ŵanthu 16 awo ŵakakana usilikari. Ŵanyake ŵakaŵa ŵa visopa vinyake, ndipo wose ŵakagwira ukayidi mu jele la Richmond mu charu cha Britain. Ŵanthu aŵa ŵakamanyikwanga na zina lakuti Richmond 16. Nyengo yinyake Herbert na ŵanyake ŵakaŵatumizga ku France mwakubisa, uko nkhondo yikaŵa mukati. Ŵakaŵaphalira kuti ŵaŵakomenge na futi. Iyo na ŵanyake ŵakaŵandandika kuti ŵalasike, ndipouli, ŵakaŵakoma yayi. Kweni ŵakajalirika mu jele vyaka 10.

“Nkhapulikiska kuti ŵanthu ŵa Chiuta ŵakwenera kuŵa pa mtende na waliyose, nanga kuŵe nkhondo.”—Simon Kraker (Wonani ndime 7)

7. Kasi ŵanthu ŵa Chiuta ŵakapulikiska fundo wuli apo Nkhondo Yachiŵiri ya Charu Chose yikambanga?

 7 Apo Nkhondo Yachiŵiri ya Charu Chose yikambanga, ŵanthu ŵa Chiuta wose ŵakaŵa kuti ŵapulikiska ng’anamuro la kuleka kuŵa ku chigaŵa cha charu. Kweniso ŵakamanya umo ŵangachitira pakulondezga fundo ya Yesu. (Mat. 26:51-53; Yoh. 17:14-16; 1 Pet. 2:21) Mu Gongwe la Mulinda Lachingelezi la Novembala 1, 1939, mukaŵa nkhani yakuzirwa ya mutu wakuti “kuleka kuŵa ku chigaŵa cha charu.” (Neutrality) Nkhani iyi yikati: “Sono ŵanthu ŵa Yehova ŵakorengeko yayi nanga mphachoko para vyaru vikurwa nkhondo.” Mubali Simon Kraker, uyo pamanyuma wakazakateŵetera pa ofesi yikuru ku Brooklyn, New York, wakayowoyapo pa ivyo likayowoya Gongwe la Mulinda ili, wakati: “Nkhapulikiska kuti ŵanthu ŵa Chiuta ŵakwenera kuŵa pa mtende na waliyose, nanga kuŵe nkhondo.” Chakurya chauzimu ichi chikiza pa nyengo yake ndipo chikawovwira ŵanthu ŵa Chiuta kunozgekera nkhaza zikuru izo zikaŵasanga chifukwa cha kugomezgeka ku boma la Chiuta.

Suzgo Yikaŵizira nga ni “Mlonga”

8, 9. Kasi uchimi wa mpositole Yohane ukafiskika wuli?

8 Mpositole Yohane wakachima kuti para Ufumu wamba kuwusa mu 1914, chinjoka, panji kuti Satana Dyabulosi,  wazamuwukura mlonga kuti uyore wose awo ŵali ku chigaŵa cha boma la Chiuta. * (Ŵerengani Chivumbuzi 12:9, 15.) Kasi uchimi uwu ukafiskika wuli? Kwamba m’ma 1920, ŵanandi ŵakamba kuwukira ŵanthu ŵa Chiuta. Ku North America, ŵanandi ŵakajalirika mu jele chifukwa cha kudemelera ku Ufumu wa Chiuta. Yumoza wawo wakaŵa Mubali Kraker. Nakuti mu nyengo ya nkhondo, mu majele ghanandi mu United States, pa ŵakayidi ŵatatu, ŵaŵiri, panji wose ŵakaŵanga Ŵakaboni ŵa Yehova.

9 Dyabulosi na ŵanthu ŵake ŵakakhumbanga kuti ŵanthu ŵa Chiuta ŵaleke kugomezgeka. Mu chigaŵa chose cha Africa, Europe na United States, ŵanthu ŵa Chiuta ŵakaŵatoleranga panthazi pa makhoti. Pakuti ŵakakanirathu kunjilirapo pa nkhani za ndyali, ŵakaŵajalira mu majele, kuŵatimba na kuŵapundura. Ku Germany, ŵanthu ŵa Chiuta ŵakasuzgika chomene chifukwa ŵakakana kusopa Hitler na kumovwira pa nkhondo. Ŵanthu pafupifupi 6,000 ŵakajalirika mu majele apo chipani cha Nazi chikawusanga. Ŵanyake ŵakujumpha 1,600 ŵa mu Germany na vyaru vinyake ŵakakomeka na ŵanthu ŵa Hitler. Nangauli Dyabulosi wakaŵachitira nkhaza zose izi, ŵanthu ŵa Chiuta ŵakamara yayi.—Mrk. 8:34, 35.

“Charu Chapasi” Chikamira “Mlonga”

10. Kasi “charu chapasi” ni vichi? Kasi chawovwira wuli ŵanthu ŵa Chiuta?

10 Uchimi uwo wakalemba Yohane ukavumbura kuti “charu chapasi,” panji kuti ŵanthu ŵanyake ŵakupulikiska mu charu ichi, ŵazamumira “mlonga” kuti ŵapokeske ŵanthu ŵa Chiuta. “Mlonga” ni suzgo iyo yikuwira ŵanthu ŵa Chiuta. Kasi uchimi uwu wafiskika wuli? Kufuma apo Nkhondo Yachiŵiri ya Charu Chose yikamalira, kanandi “charu chapasi” chikukhalira kumanyuma awo ŵakudemelera ku Ufumu wa Khristu. (Ŵerengani Chivumbuzi 12:16.) Makhoti ghanandi ghakuvikilira Ŵakaboni ŵa Yehova para boma likuŵachichizga kunjira usilikari panji kusopera charu chawo. Tiyeni tiwonepo dankha milandu yinyake iyo Yehova wakanjilirapo apo ŵanthu ŵake ŵakachichizgikanga kunjira usilikari.—Sal. 68:20.

11, 12. Ntchivichi chikachitikira Mubali Sicurella na Mubali Thlimmenos? Kasi vikamara wuli?

11 United States. Anthony Sicurella, ŵapapi ŵake ŵakaŵa Ŵakaboni. Wakabatizika apo wakaŵa na vyaka 15. Wakati wakwaniska vyaka 21, nayo wakalembeska ku unduna wakuwona vya visopa kuti ŵamumanye. Pakati pajumpha vyaka viŵiri, mu 1950, wakapempha kuti ŵaleke kumupa ntchito ya usilikari. Nangauli wupu uwo ukapokelera pempho ili, wa Federal Bureau of Investigation, ukamusanga na chifukwa chilichose yayi,kweni dipatimenti yakuwona vya makhoti yikamukanira. Wakaluta ku khoti kanandi waka na  nkhani iyi, ndipo paumaliro wakadandawura ku Khoti Likuru Chomene mu United States. Khoti ili likasuska ivyo likadumura khoti lichoko na kuzomerezga pempho la Mubali Sicurella. Ichi chikawovwiraso ŵanthu ŵanandi awo ŵakayikhumbanga yayi ntchito ya usilikari mu charu ichi.

12 Greece. Mu 1983, Iakovos Thlimmenos ŵakamusanga na mulandu wa kuleka kupulikira ŵamazaza chifukwa chakuti wakakana kuvwara yunifomu ya usilikari. Pa chifukwa ichi, wakagwira jele. Wakati wafuma mu jele, wakalemba kalata kupempha ntchito, kuti waŵe akauntanti, kweni ŵakamukanira chifukwa wakakakikapo. Wakatolera nkhani iyi ku khoti mu charu chenechicho, kweni wakatondeka. Kufuma apo, wakadandawura ku khoti ilo likuvikilira wanangwa wa ŵanthu ku Europe, la European Court of Human Rights (ECHR). Mu 2000, mphara ya ŵeruzgi 17 yikadumura mulandu wake, ndipo yikamukhalira kumanyuma. Ichi chawovwira kuti sankho lanthena lichepe. Pambere khoti lindadumure mulandu wake, mu Greece, ŵabali 3,500 ŵakakakikapo chifukwa cha kukana usilikari. Mulandu ukati wadumulika, charu cha Greece chikaŵafwatura ŵabali wose aŵa, kuti ŵaleke kuŵawona nga mbanthu awo ŵakaswapo dango. Kweniso pakaŵa dango lakuzomerezga waliyose uyo wandakhumbe usilikari kuti wagwire ntchito yinyake. Dango ili likaŵapo, kweni sono ndipo likamba kugwira ntchito yake, pakuti ŵakasintha malango ghanyake gha charu cha Greece.

“Pambere nindanjire mu khoti nkhalomba kwa Yehova kufumira pasi pa mtima. Ichi chikanovwira kukhazika mtima pasi.”—Ivailo Stefanov (Wonani ndime 13)

13, 14. Kasi mukuwona kuti tingasambirapo vichi pa milandu ya Ivailo Stefanov na Vahan Bayatyan?

13 Bulgaria. Mu 1994, apo Ivailo Stefanov wakaŵa na vyaka 19, wakachemeka kuti wakambe usilikari. Wakakana kunjira usilikari panji kugwira ntchito zinyake ku dipatimenti ya ŵasilikari. Ŵakadumura kuti wakagwire jele myezi 18, kweni wakachita apilu chifukwa wakaŵa na vikalata vyakumufwatura ku ntchito ya usilikari. Nkhani iyi yikakafika ku ECHR. Mu 2001, pambere khoti lindambe kweruzga, boma likadumba nayo Mubali Stefanov na kumazga mulandu uwu mwamtende. Likamufwatura Mubali uyu, na wose awo ŵakapemphanga ntchito zinyake m’malo mwa usilikari. *

14 Armenia. Vahan Bayatyan wakachemeka kuti wakambe usilikari mu 2001. * Wakakana kunjira usilikari, ndipo wakamangara ku makhoti, kweni wakatondeka pa mulandu uwu. Mu Seputembala 2002, wakamba kugwira jele la vyaka viŵiri na hafu, kweni ŵakamufumiska wakati wagwirako myezi 10 na hafu. Pa nyengo iyi, wakadandawura ku ECHR, ndipo Khoti ili likawupokelera mulandu wake. Kweni pa Okutobala 27, 2009, Khoti ili nalo likati wakaŵa wakubuda.  Pa chifukwa ichi, ŵabali ŵanandi mu Armenia awo ŵakaŵa na suzgo ili, charu chikaŵagotera. Kweni ŵeruzgi mu Khoti la ECHR ŵakayiwonaso nkhani iyi. Pa Julayi 7, 2011 ŵakadumura kuti Mubali Bayatyan wakaŵavya mulandu. Aka kakaŵa kakwamba kuti Khoti ili liŵape wanangwa awo ŵakana usilikari chifukwa cha chisopa chawo. Khoti likachita ivi pakumanya kuti munthu waliyose ni mwanangwa kwendera maghanoghano ghake, njuŵi yake, na chisopa chake. Ntheura mwaŵi ukaŵajulikira Ŵakaboni ŵa Yehova na ŵanthu ŵanandi mu vyaru vinyake ku Europe. *

Ŵabali ŵa ku Armenia ŵakafuma mu jele, khoti la ECHR lati ladumura kuti ŵafume

Nkhani ya Kusopera Charu

15. Kasi ŵanthu ŵa Yehova ŵakukanirachi kusopera charu?

15 Ŵanthu ŵa Yehova mbakugomezgeka ku Ufumu wa Khristu. Ntheura ŵakukana usilikari pera yayi, iwo ŵakukanaso kusopera charu. Nkhondo Yachiŵiri ya Charu Chose yikati yamba, ŵanthu ŵakamba kutemwa chomene vyaru vyawo. Mu vyaru na vyaru, ŵanthu ŵakaphalirika kuti  ŵayowoyenge chilapo chakuti ŵagomezgekenge ku charu chawo, kwimba sumu ya fuko, na kusindamira ndembera. Kweni ise tikusopa Yehova pera. (Eks. 20:4, 5) Pa chifukwa ichi, ŵakutiwukira. Kweni Yehova wakulekapo waka yayi. Wakutuma “charu chapasi,” ndipo chikumira suzgo iyi. Wonani umo Yehova wakutovwilira kwizira mwa Khristu kuti titonde pa nkhani zinandi.—Sal. 3:8.

16, 17. Kasi Lillian na William Gobitas ŵakaŵa mu suzgo wuli? Kasi mwasambirako vichi?

16 United States. Mu 1940, Khoti Likuru Chomene mu United States likadumura mulandu pakati pa ŵalara ŵa sukulu na ŵana ŵa Ŵakaboni, wakuchemeka Minersville School District v. Gobitis. Pa ŵeruzgi 9, yumoza pera ndiyo wakakhalira kumanyuma Ŵakaboni. Lillian Gobitas, * wa vyaka 12, na mudumbu wake William, wa vyaka 10 ŵakakana kusindamira ndembera panji kuyowoya chilapo. Ŵakachita ivi chifukwa ŵakakhumba kugomezgeka kwa Yehova. Ntheura ŵakachimbizgika pa sukulu. Mulandu uwu ukafika ku Khoti Likuru Chomene, ndipo nalo likakolerana na ŵalara ŵa sukulu. Likati sukulu yikachita ivi kuti umoza ulutilire mu charu icho. Ntheura Khoti likaŵanjizga mu suzgo Ŵakaboni. Ŵana ŵanyakeso ŵa Ŵakaboni, sukulu yikaŵamalira. Ŵapapi nawo ntchito zikaŵamalira, ndipo ŵanthu ŵakamba kuŵawukira. Buku linyake likati “Ŵakaboni ŵa Yehova ŵakayuzgika mu 1941 m’paka 1943, ndipo izi zikaŵa nkhaza zikuru chomene izo charu cha America chachitirapo chisopa mu vyaka ivi.”—The Lustre of Our Country

17 Kweni nakalinga vinthu vikaŵazgokera ŵalwani ŵa Chiuta. Mu 1943, Khoti Likuru Chomene likeruzga mulandu wakuyanako na wa Gobitis. Uwu ukuchemeka West Virginia State Board of Education v. Barnette. Pa mulandu uwu, Khoti likakhalira kumanyuma Ŵakaboni ŵa Yehova. Aka kakaŵa kakwamba kuti Khoti Likuru Chomene lisinthe maghanoghano mwaluŵiro nthena. Mulandu uwu ukati wadumulika, ŵanthu ŵa Yehova mu United States ŵakapumurapo kuyuzgika. Kweniso chikawovwira kuti ŵanthu ŵanyake mu United States ŵaŵe ŵanangwa.

18, 19. Kasi Pablo Barros wakati ntchivichi chikamovwira kuti waleke kuthera, ndipo tikusambirako vichi?

18 Argentina. Mu 1976, Hugo wa vyaka 8 na Barros wa vyaka 7 ŵakachimbizgika pa sukulu chifukwa ŵakakana kuŵapo pa mutheto wa kukwezga ndembera. Zuŵa linyake, msambizgi mulara wakang’anuzga Pablo na kumukhowora pa mutu. Nyengo yikati yakwana kuti ŵawerenge, msambizgi wakaŵakanizga kuwera. Wakakhumbanga kuti m’paka nawo ŵachiteko mitheto iyi. Pablo wakati: “Yehova wakanovwira. Kwambura Yehova, mphanyi nkhathera pa suzgo iyi.”

19 Nkhani iyi yikafika ku khoti, ndipo mweruzgi wakati sukulu yikachita makora kuŵachimbizga ŵana aŵa. Kweni mu 1979, ŵakachita apilu ku Khoti Likuru Chomene mu  Argentina. Khoti likasuska ivyo khoti lichoko likadumura, likati: “Chilango [cha kuchimbizga] chikususkana na wanangwa wakuti munthu wasambire (Dango 14) kweniso ni udindo wa boma kuwoneseska kuti waliyose wasambireko sukulu ya pulayimare (Dango 5).” Ŵana ŵa Ŵakaboni pafupifupi 1,000 ŵakasangirako mwaŵi. Ŵanyake awo sukulu yikate yiŵamalirenge ŵakapona. Awo ŵakachimbizgika, nga ni Pablo na Hugo ŵakawelera ku sukulu.

Ŵakaboni ŵawukirano nawo ŵakuthera yayi para ŵakuyezgeka

20, 21. Kasi chipulikano chinu chakhozgeka wuli chifukwa cha umo ukendera mulandu wa Roel na Emily Embralinag?

20 Philippines. Mu 1990, Roel Embralinag, * wa vyaka 9, na mudumbu wake Emily, wa vyaka 10, pamoza na ŵana ŵanyake 66 ŵa Ŵakaboni ŵakachimbizgika pa sukulu chifukwa cha kukana kusindamira ndembera. Leonardo, dada wa Roel na Emily, wakayezga kuyowoya nawo ŵalaraŵalara pa sukulu, kweni vikawovwira yayi. Nkhani yikasuzga, ndipo Leonardo wakadandawulira Khoti Likuru Chomene. Wakaŵavya ndalama na loya kuti wamwimire. Iyo na mbumba  yake ŵakalomba kwa Yehova kuti waŵalongozge. Nyengo yose iyi, ŵana ŵake ŵakakhaliranga waka kuhoyeka. Leonardo wakakayikanga kuti vingenda makora pa mulandu uwu, chifukwa vyamilandu wakavimanyanga yayi.

21 Kweni chikachitika ntchakuti Felino Ganal, wakaŵayimira. Uyu wakaŵa loya uyo wakagwirapo ntchito ku kampani ya maloya yakumanyikwa chomene mu charu ichi. Apo mulandu uwu ukaŵa mukati, wakaŵa kuti waleka ntchito na kuŵa yumoza wa Ŵakaboni ŵa Yehova. Mulandu ukati wafika ku Khoti Likuru Chomene, ŵeruzgi ŵakakolerana chimoza: ŵakasuska ivyo khoti lichoko likadumura, ndipo ŵana ŵakaŵa ŵanangwa kuwelera ku sukulu. Apa ŵalwani ŵakatondekaso kuthereska ŵanthu ŵa Chiuta.

Tili ku Chigaŵa cha Charu Chara, Lekani Tikukolerana

22, 23. (a) Kasi vyenda wuli kuti titonde pa milandu iyi? (b) Kasi mtende uwo tili nawo na ŵabali ŵithu pa charu chose ukulongorachi?

22 Kasi ŵanthu ŵa Chiuta ŵatonda wuli pa milandu yose iyi? Tilije chigaŵa mu ndyali. Kweni mu vyaru vinandi, na makhoti ghanandi, ŵeruzgi ŵambura kutemwera ŵakutivikilira para ŵalwani ŵatiwukira, ndipo vyawovwira kuti malango ghanyake ghanyoloke. Tili na chigomezgo kuti ni Khristu uyo wakutovwira kutonda. (Ŵerengani Chivumbuzi 6:2.) Chifukwa wuli tikutolera milandu iyi ku khoti? Tikukhumba kuti ŵasinthe malango yayi. Khumbo lithu ndakuti tilutilire kuteŵetera Themba lithu Yesu Khristu kwambura chakujandizga.—Mil. 4:29.

23 Chifukwa cha ndyali, ŵanthu ŵakupulikana yayi mu charu, ndipo ŵanyake thinkho lili kujintha misisi mwa iwo. Ndipouli, Themba lithu Yesu Khristu, likuŵatumbika awo ŵakukana kuŵa ku chigaŵa cha charu. Satana watondeka kunanga umoza withu na kutithereska. Boma la Chiuta lawovwira ŵanthu ŵanandi, ndipo ŵakukana ‘kusambira nkhondo.’ Ntchinthu chapadera chomene kuti tili pa mtende na ŵabali ŵithu pa charu chose. Uwu mbukaboni wakuti Ufumu wa Chiuta ukuwusa!—Yes. 2:4.

^ ndime 4 Voliyumu iyi ndiyo yikumanyikwaso na mutu wakuti The New Creation. Pamanyuma, mavoliyumu gha Millennial Dawn ghakamba kuchemeka Studies in the Scriptures.

^ ndime 8 Vinandi vya uchimi uwu vili mu buku la Mapeto Osangalatsa a Masomphenya a M’buku la Chivumbulutso Ayandikira, mutu 27, peji 184-186.

^ ndime 13 Ŵakapulikana kuti boma la Bulgaria lipeleke mwaŵi kuti wose awo ŵandakhumbe usilikari ŵapikenge ntchito zinyake.

^ ndime 14 Nkhani yose yili mu Gongwe la Mulinda la Novembala 1, 2012, peji 29-31.

^ ndime 14 Mu vyaka 20, boma la Armenia likajalira mu jele Ŵakaboni ŵakujumpha 450. Mu Novembala 2013, likafumiska wose awo ŵakakhalira mu jele.

^ ndime 16 Khoti likabudiska sipeling’i ya zina ili.

^ ndime 20 Ku khoti chiwongo ŵakalemba Ebralinag, kweni ŵakabudiska waka.