Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Ufumu wa Chiuta Ukuwusa!

 MUTU 6

Awo Ŵakupharazga—Ŵateŵeti Ŵakujipeleka na Mtima Wose

Awo Ŵakupharazga—Ŵateŵeti Ŵakujipeleka na Mtima Wose

FUNDO YIKURU MU MUTU UWU

Themba lanozga chiwuru cha ŵapharazgi

1, 2. Kasi ni mulimo wuli wakuzirwa uwo Yesu wakayowoyerathu, ndipo ni fumbo wuli lakuzirwa ilo lilipo?

KANANDI ŵandyali ŵakulayizga waka vinthu, kweni ŵakutondeka kufiska. Nanga ni awo ŵangaŵa na vilato viwemi, nyengo zinyake ŵakutondeka kufiska ivyo ŵalayizga. Kweni Yesu Khristu, Themba lithu, nyengo zose wakufiska ivyo walayizga.

2 Yesu wakati waŵa Themba mu 1914, wakanozgeka kufiska uchimi uwo wakayowoya vyaka 1,900 kumasinda. Pambere wandakomeke, iyo wakati: “Makani ghawemi agha gha Ufumu, ghazamupharazgika mu charu chose chapasi.” (Mat. 24:14) Uchimi uwu ukufiskika, ndipo mbukaboni wakuti Yesu wakuwusa kuchanya. Kweni pali fumbo lakuzirwa lakuti: Kasi Themba ili liŵasangenge nkhu ŵanthu awo ŵangajipeleka na mtima wose kupharazga mu mazuŵa ghaumaliro, apo ŵanthu ŵanandi mbakujighanaghanira ŵekha, ŵambura chitemwa, kweniso ŵambura kutemwa Chiuta? (Mat. 24:12; 2 Tim. 3:1-5) Tikwenera kumanya zgoro la fumbo ili, chifukwa likukhwaska Ŵakhristu wose ŵaunenesko.

3. Kasi Yesu wakaŵa na chigomezgo wuli, ndipo chigomezgo ichi wakachitora nkhu?

3 Tiyeni tighanaghanireso mazgu ghauchimi agho Yesu wakayowoya. Kasi mazgu ghakuti “ghazamupharazgika,” ghakulongora kuti Yesu wakaŵa na chigomezgo? Enya. Yesu wakamanya kuti mu mazuŵa ghaumaliro, wazamuŵa na ŵanthu ŵakugomezgeka. Kasi chigomezgo ichi wakachitora nkhu? Wakasambira kwa Awiske. (Yoh. 12:45; 14:9) Pambere wandize pa charu chapasi, Yesu wakawona kuti Yehova wali na chigomezgo mu ŵateŵeti ŵake awo ŵakujipeleka na mtima wose. Tiyeni tiwone umo Yehova wakalongolera chigomezgo ichi.

“Ŵanthu Ŵako Ŵajipelekenge na Mtima Wose”

4. Kasi Yehova wakapempha Ŵaisrayeli kuti ŵawovwirepo pa mulimo wuli, ndipo ŵakachita wuli?

4 Kumbukani ivyo vikachitika apo Yehova wakatuma Mozesi kuzenga chihema icho Ŵaisrayeli ŵakasoperangamo. Yehova wakapempha ŵanthu kwizira mwa Mozesi kuti ŵawovwirepo pa mulimo uwu. Mozesi wakati: “Waliyose uyo wakhumba mu mtima wake wize na chakupeleka kwa Yehova.” Kasi ntchivichi icho chikachitika? Ŵanthu “ŵakalutilira kwiza na vyawanangwa mulenji uliwose.” Vinthu ivyo ŵakizanga navyo vikaŵa vinandi chomene, mwakuti “ŵakakanizgika kwiza na vinyake.” (Eks. 35:5; 36:3, 6) Ivyo Ŵaisrayeli ŵakachita apa vikalongora kuti Yehova wakachita makora kuŵagomezga.

5, 6. Mwakuyana na Salimo 110:1-3, kasi Yehova na Yesu ŵakukhazga kuti Ŵakhristu ŵaunenesko ŵachitenge wuli mu mazuŵa ghaumaliro?

5 Kasi Yehova wakamanya kuti mu mazuŵa ghaumaliro wazamuŵa na ŵateŵeti ŵakujipeleka? Nkhanira kwali! Vyaka vyakujumpha 1,000 pambere Yesu wandababike pa charu chapasi, Yehova wakaphalira Davide kuti walembe ivyo vizamuchitika nyengo iyo Mesiya wazamwambira kuwusa. (Ŵerengani Salimo 110:1-3.) Yehova wakamanya kuti Themba liphya ili, lizamuŵa na ŵalwani awo ŵazamulimbana nalo. Ndipouli, wakamanya kuti Themba ili, lizamuŵa na chiwuru cha ŵanthu awo ŵazamuliwovwira. Ŵanthu aŵa kuti ŵazamuchita kuchichizgika yayi kuti ŵaliteŵetere. Pa ŵanthu aŵa, ŵanandi mbawukirano awo ŵakujipeleka na mtima wose, ndipo ŵachali kusazgikira. Lekani Baibolo likuŵayelezgera na jumi la mulenji mu nyengo yakotcha. *

Awo ŵakujipeleka kukhozgera Ufumu, mbanandi nga jumi (Wonani ndime 5)

6 Yesu wakamanyanga kuti uchimi uwo uli pa Masalimo 110, ukuyowoya vya iyo. (Mat. 22:42-45) Ntheura wakaŵa na chigomezgo chose kuti wazamuŵa na ŵalondezgi ŵakugomezgeka. Iwo ŵazamujipeleka na mtima wose kupharazga makani ghawemi pa charu chose chapasi. Kasi mbiri yikuti wuli pa nkhani iyi? Kasi Themba lili nacho nadi chiwuru cha ŵateŵeti ŵakujipeleka mu mazuŵa ghaumaliro agha?

“Ni Mwaŵi Wapadera Kupharazga Uthenga Uwu”

7. Kasi Yesu wakachita vichi wati waŵa Themba?

7 Yesu wati waŵa Themba, mwaluŵiro wakachitapo kanthu kuti wawovwire ŵasambiri ŵake kunozgekera mulimo. Nga umo tikasambilira mu Mutu 2, iyo wakendera na kutozga tempile kwamba mu 1914 m’paka kukwambilira kwa 1919. (Mal. 3:1-4) Mu 1919, wakimika muzga wakugomezgeka kuti walongozgenge ŵalondezgi ŵake. (Mat. 24:45) Nyengo iyi ndiyo muzga wakambira kupeleka chakurya chauzimu kwizira mu maungano ghakuru, kweniso mabuku. Ndipo wakadidimizga chomene fundo yakuti Mkhristu waliyose wakwenera kupharazga.

8-10. Kasi maungano ghakachiska ŵanthu kuti ŵayiwonenge wuli ntchito yakupharazga? Yowoyani chiyelezgero. (Wonaniso bokosi la mutu wakuti “ Maungano Ghakawovwira Chomene pa Mulimo wa Kupharazga.”)

8 Maungano Ghakuru. Ŵasambiri ŵa Baibolo ŵakawungana ku Cedar Point, Ohio, U.S.A, kwamba pa Seputembala 1 m’paka 8, 1919. Uwu ukaŵa ungano wakwamba, Nkhondo Yakwamba ya Charu Chose yati yamara. Ŵasambiri ŵa Baibolo aŵa ŵakaŵa ŵakukhumbisiska kupokera ulongozgi. Pa zuŵa lachiŵiri, Mubali Rutherford wakayowoya nkhani, ndipo wakaphalira ŵategherezgi kuti: “Mulimo wa Mkhristu . . . nkhupharazga uthenga wa Ufumu wa Chiuta.”

9 Ungano ukati wafikapo, pa zuŵa lachinayi, Mubali Rutherford wakayowoya nkhani ya mutu wakuti, “Uthenga ku Ŵateŵeti Ŵanyithu.” Nkhani iyi yikalembeka mu Gongwe la Mulinda pa kamutu kakuti “Kupharazga Ufumu.” Iyo wakati: “Nyengo zinyake Mkhristu wangajifumba kuti, ‘Chifukwa wuli niliko?’ Ndipo zgoro lake likwenera kuŵa lakuti, ‘Mwalusungu, Fumu yanisora kuŵa mwimiliri wake kuti nipharazge uthenga wakovwira ŵanthu kuti ŵaŵeso ŵabwezi ŵake. Ntheura ni mwaŵi wapadera kupharazga uthenga uwu.’ ”

10 Apo wakayowoyanga nkhani iyi, Mubali Rutherford wakati, magazini yiphya ya The Golden Age (Wukani!), yiwovwirenge ŵanthu kuti ŵamanye makora Ufumu wa Chiuta. Pamasinda, wakafumba usange ŵalipo awo ŵangatemwa kugaŵira ŵanthu magazini iyi. Lipoti la ungano uwu likati: “Chikaŵa chakukondweska kuwona kuti ŵanthu wose 6,000 awo ŵakaŵa pa ungano uwu ŵakayimilira kulongora kuti ŵakukhumba.” * Apa chikalongora kuti Themba Yesu likaŵa na ŵanthu ŵakujipeleka na mtima wose kupharazga vya Ufumu.

11, 12. Kasi mu 1920 Gongwe la Mulinda likati mulimo wa kupharazga ukwenera kuchitika pa nyengo wuli?

11 Magazini. Mu nkhani za mu Gongwe la Mulinda, ŵanthu ŵakapulikiska kuti mulimo wa kupharazga uwo Yesu wakayowoya ngwakuzirwa. Wonani ivyo vikachitika m’ma 1920.

12 Kasi ni uthenga wuli uwo ukeneranga kupharazgika mwakuyana na uchimi wa pa Mateyu 24:14? Kasi mulimo uwu ukeneranga kuchitika pawuli? Mu Gongwe la Mulinda la Julayi 1, 1920, mukaŵa nkhani yakuti: “Makani Ghawemi gha Ufumu.” Nkhani iyi yikati: “Makani ghawemi agha, ghakuyowoya vya umaliro wa nyengo yiheni iyi, na kubabika kwa Ufumu wa Mesiya.” Nkhani iyi yikalongora nyengo iyo uthenga uwu ukwenera kupharazgikira. Yikati: “Uthenga uwu ukwenera kupharazgika kwamba pa nyengo ya nkhondo yikuru [Nkhondo Yakwamba ya Charu Chose] m’paka pa ‘suzgo yikuru.’” Magazini iyi yikati: “Sono ndiyo ni nyengo . . . yakupharazgira uthenga uwu pa charu chose.”

13. Kasi mu 1921 Gongwe la Mulinda likaŵachiska vichi Ŵakhristu ŵakuphakazgika?

13 Kasi ŵateŵeti ŵa Chiuta ŵakeneranga kuchichizgika kuchita mulimo uwo Yesu wakayowoyerathu? Yayi. Nkhani ya mutu wakuti “Ŵani Ŵachikanga,” iyo yikaŵa mu Gongwe la Mulinda Lachingelezi la Malichi 15, 1921, yikachiska Ŵakhristu ŵakuphakazgika kuti ŵajipelekenge. Yikati wakuphakazgika waliyose wajifumbe kuti: “Asi ni mwaŵi wapadera kweniso mulimo wane kuchita ntchito iyi?” Nkhani iyi yikatiso: “Para mwawona kuti uwu ni mwaŵi wapadera, muchitenge nga ni Yeremiya uyo mu mtima wake, Mazgu gha Chiuta ghakaŵa nga ni ‘moto wakunyeka uwo wajalirika mu viwangwa vyake,’ mwakuti wakaleka yayi kuyowoya.” (Yer. 20:9) Mazgu agha ghakulongora kuti Yehova na Yesu ŵali na chigomezgo mu ŵanthu awo ŵakupharazga Ufumu.

14, 15. Kasi mu 1922 Gongwe la Mulinda likati Ŵakhristu ŵakuphakazgika ŵakwenera kuchita wuli kuti ŵapharazgire ŵanji?

14 Kasi Ŵakhristu ŵaunenesko ŵakwenera kuchita wuli kuti ŵapharazgire ŵanthu uthenga wa Ufumu? Mu Gongwe la Mulinda Lachingelezi la Ogasiti 15, 1922, mukaŵa nkhani ya mutu wakuti “Uteŵeti Ngwakuzirwa.” Nkhani iyi yikachiska Ŵakhristu ŵakuphakazgika “kutora mabuku na kuluta nagho ku nyumba za ŵanthu kukadumbirana nawo, kuchitira ukaboni kuti ufumu wakuchanya waneng’enera.”

15 Ntheura, kwamba mu 1919, Khristu, kwizira mwa muzga wake wavinjeru, wakuchiska Mkhristu waliyose kuti wapharazgenge uthenga wa Ufumu chifukwa ndiyo ntchito yake. Kasi Ŵasambiri ŵa Baibolo ŵakachita wuli ŵati ŵachiskika kupharazga Ufumu?

“Ŵakugomezgeka Ŵajipelekenge”

16. Kasi ŵalara ŵanyake ŵakachita wuli na fundo yakuti waliyose wakwenera kupharazga?

16 M’ma 1920 na m’ma 1930, ŵanji ŵakakolerana nayo yayi fundo yakuti Ŵakhristu wose ŵakuphakazgika ŵapharazgenge. Pakulongosora ivyo vikachitika, Gongwe la Mulinda Lachingelezi la Novembala 1, 1927, likati: “Mazuŵa ghano mu mpingo muli ŵalara ŵanji . . . awo ŵakukana kuchiska ŵanyawo kuti ŵapharazgenge, ndipo iwoŵene ŵakukana kupharazga. . . . Ŵakuyuyura fundo yakuti tikwenera kupharazga nyumba na nyumba.” Nkhani iyi yikalutilira, yikati: “Kweni sono nyengo yakwana kuti awo mbakugomezgeka ŵaleke kwenda nawo ŵanthu aŵa. Ŵakwenera kuŵaphalira kuti sono muli ŵalara yayi.” *

17, 18. Kasi mipingo yinandi yikachita wuli yati yapokera ulongozgi kufuma ku ofesi, ndipo ŵanandi ŵachita wuli mu vyaka 100 ivi?

17 Mu mipingo yinandi ŵabali ŵakakondwa na ulongozgi wakufuma ku ofesi uwu. Ŵakawona kuti ni mwaŵi wapadera kupharazga vya Ufumu wa Chiuta. Gongwe la Mulinda Lachingelezi la Malichi 15, 1926, likati: “Ŵakugomezgeka ŵajipelekenge, . . . kuphalira ŵanthu uthenga wa Chiuta.” Ŵateŵeti ŵakugomezgeka ŵakachita kuyana na Masalimo 110:3, ndipo ŵakalongora kuti ŵajipeleka na mtima wose kukhozgera Ufumu.

18 Mu vyaka 100 ivi, ŵanthu mamiliyoni ghanandi ŵajipeleka na mtima wose kupharazga uthenga wa Ufumu. Mu Mitu yapanthazi tiwonenge umo ŵakapharazgiranga na ivyo ŵakagwiliskiranga ntchito, kweniso ivyo vikachitika. Kweni sono tiyeni tidumbiskane chifukwa icho ŵanthu mamiliyoni ghanandi ŵakuchitira mulimo uwu na mtima wose nangauli mu charu ichi ŵanandi ŵakujighanaghanira ŵekha. Apo tikuwona chifukwa chake, waliyose wajifumbe kuti, ‘Chifukwa wuli nkhupharazgira ŵanthu makani ghawemi?’

“Lutilirani Kupenja Dankha Ufumu”

19. Chifukwa wuli tikupulikira ulongozgi wa Yesu wakuti, “Lutilirani kupenja dankha Ufumu”?

19 Yesu wakaphalira ŵalondezgi ŵake kuti: ‘Lutilirani kupenja dankha Ufumu wake.’ (Mat. 6:33) Chifukwa wuli tikupulikira ulongozgi uwu? Chifukwa chikuru ntchakuti, tikumanya kuzirwa kwa Ufumu. Ufumu uwu, ndiwo uzamufiska khumbo la Chiuta. Nga umo tawonera mu Mitu iyo yajumpha, Yehova wavumbura vinandi vya Ufumu. Usange tapulikiska unenesko uwu, tipenjenge dankha Ufumu.

Munthu uyo wasanga usambazi wakubisika wakukondwa, ndipo Ŵakhristu nawo ŵakukondwa para ŵabowozga unenesko wakukhwaskana na Ufumu (Wonani ndime 20)

20. Kasi ntharika ya Yesu ya usambazi wakubisika yikutovwira wuli kupulikira ulongozgi wakuti tipenje dankha Ufumu?

20 Yesu wakamanya umo ŵalondezgi ŵake ŵachitirenge na ulongozgi wakuti ŵapenje dankha Ufumu. Wonani ntharika ya usambazi wakubisika iyo wakayowoya. (Ŵerengani Mateyu 13:44.) Mu ntharika iyi, apo munthu wakagwiranga ntchito yake wakasanga usambazi wakubisika, ndipo nyengo yeneyiyo wakamanya kuzirwa kwake. Kasi wakachita vichi? Baibolo likuti: “Chifukwa cha chimwemwe icho wakaŵa nacho, wakaluta na kuguliska vinthu ivyo wakaŵa navyo na kugura munda wura.” Kasi apa tikusambirapo vichi? Para tabowozga unenesko wakuyowoya vya Ufumu, na kumanya kuzirwa kwake, tilekenge dankha vinyake na kudangizga vya Ufumu. *

21, 22. Kasi ŵateŵeti ŵakugomezgeka ŵakulongora wuli kuti ŵakudangizga vya Ufumu? Yowoyani chiyelezgero.

21 Awo ŵakukhozgera Ufumu uwu, ŵakuyowoya waka yayi, kweni milimo yawo nayo yikulongora. Iwo ŵakupharazga Ufumu wa Chiuta. Ŵanandi ŵajipata na kwamba uteŵeti wanyengozose. Ŵateŵeti wose ŵakujipeleka aŵa, ŵakujiwonera ŵekha umo Yehova wakuŵatumbikira chifukwa cha kudangizga vya Ufumu. Wonani umo ŵakachitira Ŵakhristu aŵa.

22 Avery na Lovenia Bristow, ŵakachitiranga lumoza upayiniya ku United States kwamba m’ma 1920. Vyaka vikati vyajumphapo, Lovenia wakati: “Kwamba apo tikambira upayiniya, ine na Avery tikaŵanga ŵakukondwa chomene. Nyengo zinyake tikamanyanga yayi uko kufumenge ndalama yakuti yitovwire. Kweni nyengo zose Yehova wakatovwiranga. Ntheura, ise tikalutiliranga waka na upayiniya. Tikasoŵanga pakukora yayi.” Lovenia wakati nyengo yinyake apo ŵakateŵeteranga ku Pensacola, Florida, ndalama zikaŵamalira. Kweni ŵati ŵafika ku nyumba kufuma mu uteŵeti, ŵakasanga vimathumba viŵiri ivyo mukaŵa vinthu ivyo ŵakakhumbanga. Mukaŵa kapepara ako pakalembeka kuti: “Vyafuma ku mpingo, ndipo tikumutemwani chomene.” Pakukumbuka nyengo yose iyo ŵakaŵa ŵateŵeti ŵanyengozose, Lovenia wakati: “Yehova wandatilekepo, nyengo zose watovwiranga pakuti tamugomezganga.”

23. Kasi mukujipulika wuli pakumanya kuti muli kubowozga unenesko, ndipo mwaŵikapo mtima kuchitachi?

23 Ni tose yayi tingakwaniska kuchita upayiniya. Kweni tose tikwenera kuwona kuti ni mwaŵi wapadera kupharazga makani ghawemi, ndipo tikwenera kupharazga na mtima wose. (Kol. 3:23) Pakuti tamanya kuzirwa kwa unenesko wa Ufumu uwo tabowozga, tikujipeleka na kujipata mu vinandi kuti tipharazge mwakukwana mwakuyana na nkhongono zithu. Kasi namwe mwaŵikapo mtima?

24. Kasi ntchivichi chikuru icho Ufumu wa Chiuta wafiska mu mazuŵa ghaumaliro agha?

24 Mu vyaka 100 ivyo vyajumpha, Themba lafiska uchimi uwo wuli pa Mateyu 24:14. Likuchita ivi kwambura kuchichizga munthu panji kumunyengelera. Para ŵanthu ŵamanya unenesko na kulondezga Yesu, ŵakujipeleka na mtima wose kupharazga. Mulimo wa kupharazga uwo ukuchitika pa charu chose, ntchimoza cha vimanyikwiro vya kuŵapo kwa Yesu. Ndipo ichi ntchimoza cha vinthu vikuru ivyo Ufumu wafiska mu mazuŵa ghaumaliro.

^ ndime 5 Mu Baibolo lizgu lakuti jumi, kanandi likwendera lumoza na unandi.Gen. 27:28; Mika 5:7.

^ ndime 10 Kabuku ka mutu wakuti: To Whom the Work Is Entrusted (Awo Ŵali Kupika Mulimo) kakati: “Magazini ya Golden Age yili na uthenga wa Ufumu ndipo njakugaŵira nyumba na nyumba. . . . Kweniso para tayowoya uthenga pa nyumba yiliyose tikwenera kulekapo kope limoza kwali ŵapeleka ndalama kwali yayi.” Pamasinda ŵabali ŵakachiskika kuti pakugaŵira magazini ya The Golden Age na Gongwe la Mulinda ŵanthu ŵapelekenge ndalama. Kwamba pa Febuluwale 1, 1940, ŵateŵeti ŵa Chiuta ŵakachiskika kulemba magazini agho ŵagaŵira.

^ ndime 16 Pa nyengo iyo, mpingo ukachitanga kuvota pakusora ŵalara. Ntheura mpingo ukaŵasoranga yayi awo ŵakakananga kupharazga nyumba na nyumba. Mu Mutu 12 tizamusambira umo vikasinthira kuti ŵaleke kuvota pakusora ŵalara.

^ ndime 20 Yesu wakayowoya fundo yakuyana waka mu ntharika ya wamalonda wakwendakwenda uyo wakaluta kukapenja ngale yiwemi chomene. Wamalonda uyu wati wayisanga, wakaguliska vinthu vyose ivyo wakaŵa navyo na kuyigura. (Mat. 13:45, 46) Ntharika ziŵiri izi zikutisambizgaso kuti tingasambira unenesko munthowa zakupambana. Ŵanji ŵakuwusanga mwamwaŵi, kweni ŵanji ŵakuchita kuwupenja. Kweni fundo njakuti tili ŵakunozgeka kujipata na kuchita dankha vya Ufumu.

Manyani Vinandi

GONGWE LA MULINDA—LAKUSAMBIRA PA MPINGO

Teŵeterani Yehova Pambere Mazuŵa Ghaheni Ghandafike

Kasi ni mwaŵi wuli wapadera uwo Ŵakhristu ŵalara mu vyaka ŵali nawo kuti ŵasazgireko uteŵeti wawo?