Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Sambizgani Ŵana Ŵinu

 SAMBIRO 10

Yesu Wakapulikiranga Nyengo Zose

Yesu Wakapulikiranga Nyengo Zose

Kasi nyengo zose nchipusu kupulikira ŵapapi ŵako?— Nyengo zinyake vikusuzga nadi. Kasi ukumanya kuti Yesu wakapulikiranga Yehova na ŵapapi ŵake ŵa pano pasi?— Ivyo Yesu wakacita vingakovwira kuti nawe upulikirenge taŵapapi ŵako, nanga ni apo nchakusuzga kucita nthena. Tiye tisambire vinandi pa nkhani iyi.

Pambere Yesu wandize pa caru capasi, wakakhalanga kucanya na Yehova Adada ŵake. Kweni Yesu wakaŵaso na ŵapapi pano pasi. Ŵapapi ŵake ŵa pano pasi ŵakaŵa Yosefe na Mariya. Kasi ukumanya ivyo vikacitika kuti Yosefe na Mariya ŵaŵe ŵapapi ŵa Yesu?—

Yehova wakatora umoyo wa Yesu kucanya na kuwuŵika mu nthumbo ya Mariya. Wakacita nthena mwakuti Yesu wababike na kukhala pa caru capasi. Ici cikaŵa cakuzizwiska! Yesu wakakuranga mu nthumbo ya Mariya nga umo ŵana wose ŵakukulira mu nthumbo za amama ŵawo. Yesu wakababika pati pajumpha myezi 9. Ivi ndivyo vikacitika kuti Yosefe na Mariya ŵaŵe ŵapapi ŵa Yesu.

Apo Yesu wakaŵa na vyaka 12, wakacita cinthu cinyake ico cikalongora kuti wakatemwanga comene Yehova. Ivi vikacitika apo Yesu na ŵapapi ŵake ŵakaluta ku Yerusalemu kukacita Paska (Paska cikaŵa cikondwelero ico Ŵaisrayeli ŵakacitanga kukumbukira zuŵa ilo Yehova wakaŵaponoska mu Eguputo). Uwu ukaŵa ulendo utali comene. Pakuwera, Yosefe na Mariya ŵakamuwona yayi Yesu. Kasi ukumanya uko wakaŵa?—

Cifukwa wuli Yesu wakaŵa pa tempele?

Yosefe na Mariya ŵakawelera ku Yerusalemu kukapenja Yesu. Ŵakafipa mtima cifukwa ŵakamusanga yayi. Kweni pati pajumpha mazuŵa ghatatu, ŵakamusanga mu tempele (Tempele yikaŵa nyumba iyo ŵanthu ŵakasoperangamo Yehova). Kasi ukumanya cifukwa ico Yesu wakaŵira mu tempele?— Cifukwa wakamanya kuti ndiko wangasambirako vya Yehova Adada ŵake. Wakatemwanga Yehova ndipo wakakhumbanga kusambira ivyo wangacita kuti wamukondweske. Nanga ni apo wakaŵa mulara, Yesu wakapulikiranga Yehova. Wakapulikiranga Yehova nanga ni apo vikaŵa vyakusuzga kucita nthena. Kasi Yesu wakapulikirangaso Yosefe na Mariya?— Enya, Baibolo likuti wakaŵapulikiranga.

Kasi ungasambirako vici kwa Yesu?— Ukwenera kupulikira ŵapapi ŵako, nanga ni para nchakusuzga kucita nthena. Kasi ndivyo ucitenge?—