Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Sambizgani Ŵana Ŵinu

 SAMBIRO 3

Rahabi Wakagomezga Yehova

Rahabi Wakagomezga Yehova

Tiye tiwelere kumasinda. Tiŵe nga tili mu msumba wa Yeriko. Msumba uwu wuli mu Kenani, uko ŵanthu ŵakugomezga Yehova yayi. Ndimo mukukhala mwanakazi yunji zina lake Rahabi.

Apo Rahabi wakaŵa msungwana, wakapulika umo Mozesi wakawomizgira maji pa Nyanja Yiswesi na kufumiska Ŵaisrayeli mu Eguputo. Wakapulikaso umo Yehova wakaŵawovwilira pa nkhondo izo ŵakarwanga na ŵalwani ŵawo. Sono wapulika kuti Ŵaisrayeli ŵazenga misasa pafupi na Yeriko.

Rahabi wakabisa Ŵaisrayeli ŵaŵiri cifukwa wakagomezga Yehova

Zuŵa linyake namise Ŵaisrayeli ŵaŵiri ŵakiza ku Yeriko kuti ŵawone caru. Ŵakiza kunyumba ya Rahabi. Wakaŵapokelera ndipo ŵakagona. Nausiku, fumu ya Yeriko yikapulika kuti Ŵaisrayeli ŵanjira mu msumba kuti ŵazakawone caru ndipo ŵaluta kunyumba ya Rahabi. Fumu yikatuma ŵanthu kuti ŵakaŵatore. Rahabi wakaŵabisa Ŵaisrayeli ŵaŵiri aŵa kucanya kwa nyumba yake. Wakaphalira ŵanthu awo ŵakatumika na fumu kuti, ‘Ŵanalume ŵanyake ŵakiza nadi kwa ine, kweni ŵafuma. Mungaŵasanga usange mungaŵacimbilira!’ Cifukwa wuli Rahabi wakabisa Ŵaisrayeli awo ŵakiza kuzakawona caru?— Cifukwa wakagomezga kuti Yehova wapelekenge caru ca Kenani ku Ŵaisrayeli.

Ŵaisrayeli ŵaŵiri awo ŵakiza kuzakawona caru ŵakaphalira Rahabi kuti wazamupona pamoza na ŵapapi ŵake na ŵabali ŵake panyengo iyo msumba wa Yeriko uzamuparanyika. Kasi ukumanya ico ŵakamuphalira kuti wacite kuti wazakapone?— Ŵakati: ‘Utore cingwe ciswesi ici ucikake pawindo. Para ucitenge nthena, wose awo ŵazamuŵa munyumba yako ŵazamupona.’ Rahabi wakacita ivyo ŵakamuphalira. Kasi ukumanya ico cikacitika?—

Yehova wakaponoska Rahabi, ŵapapi ŵake na ŵabali ŵake

Pati pajumpha mazuŵa ghacoko waka, Ŵaisrayeli ŵakenda kuzingilira Msumba wa Yeriko. Waliyose wakaŵa cete apo ŵakazingiliranga. Ŵakacita nthena kamoza pa zuŵa kwa mazuŵa 6. Kweni pa zuŵa la 7, ŵakazingilira msumba kankhondi na kaŵiri. Ndipo ŵati ŵazingilira kaumaliro, waliyose wakacemerezga comene. Yehova wakapangiska kuti mpanda wa msumba uwe.  Kweni nyumba iyo yikaŵa na cingwe ciswesi pawindo yikawa yayi. Kasi wayiwona pa cithuzithuzi apa?— Rahabi na ŵabali ŵake ŵakapona.

Kasi ungasambirako vici kwa Rahabi?— Rahabi wakagomezga Yehova cifukwa wakasambira vinthu vinandi vya iyo. Nawe ukusambira vinthu vinandi vya Yehova. Kasi nawe ukugomezga Yehova nga Rahabi?— Tikumanya kuti ukugomezga!