Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Ivyo Mungasambira mu Baibolo

Kalata Yakufuma ku Wupu Wakulongozga

Kalata Yakufuma ku Wupu Wakulongozga

Ŵakutemweka Ŵakhristu Ŵanyithu:

Pakuŵa ŵanthu ŵakusopa Yehova, tikughatemwa Mazgu ghake, Baibolo. Tikukhorwa kuti likutiphalira vinthu ivyo vikachitika nadi, ulongozgi wakovwira pa umoyo, kweniso ukaboni wakuti Yehova wakutemwa ŵanthu. (Salimo 119:105; Luka 1:3; 1 Yohane 4:​19) Tikukhumba chomene kovwira ŵanthu ŵanyake kuti ŵamanye unenesko wakuzirwa uwo uli mu Mazgu gha Chiuta. Ntheura, tili ŵakukondwa kufumiska buku ili lakuti “Ivyo Mungasambira mu Baibolo.” Lekani timuphaliraniko pachoko waka vya buku ili.

Chomene buku ili tanozgera ŵana. Kweni tingawovwiliraso ŵanthu ŵalara msinkhu awo ŵakukhumba kumanya vinandi vya Baibolo. Pakuti Baibolo ni buku la waliyose, tikugomezga kuti tose tisangenge chandulo na visambizgo ivyo vingatovwira kuti tiŵe ŵakukondwa nadi.

Pakutolera ivyo vikuyowoyeka mu Baibolo, buku ili likutiphalira nkhani za ŵanthu kwambira pa kulenga kuya munthazi. Tayezgeska kulongosora nkhani za mu Baibolo mwakupulikikwa makora kweniso munthowa yipusu, kuyana na umo zikachitikira.

Kweni buku ili likulongosora waka nkhani za mu Baibolo yayi, lili na vinandi. Kalembero na vithuzithuzi vyanozgeka munthowa yakuti tiŵenge nga tikuwona ivyo vikachitikanga kweniso kujipulika nga mbanthu awo ŵakuzunulika.

Buku ili litovwirenge kuwona kuti Baibolo ni buku ilo likuyowoya vya ŵanthu awo ŵakapulikiranga Yehova kweniso awo ŵakamupulikira yayi. Likutovwira kuti tisambirepo kanthu ku ŵanthu aŵa. (Ŵaroma 15:4; 1 Ŵakorinte 10:6) Buku ili lagaŵika mu vigaŵa 14. Pakwambilira pa chigaŵa chilichose pali fundo zakudumura za ivyo tisambirenge.

 Usange ndimwe mupapi, mungamuŵazgira mwana winu sambiro limoza na kudumbiskana nayo vithuzithuzi ivyo vilipo. Kufuma apo, mose mungaŵazgira lumoza mavesi agho pafuma sambiro ilo. Movwirani mwana winu kuti wamanyenge kukolerana kwa ivyo mwaŵazga mu Baibolo na sambiro la mu buku ili. Nthowa iyi njiwemiso para mukovwira munthu mulara kuti wamanye uthenga uwo uli mu Baibolo.

Tikugomezga kuti buku ili liwovwirenge ŵanthu ŵa mitima yakwenelera, ŵana na ŵalara wuwo, kusambira Baibolo na kulondezga ivyo ŵakusambira pa umoyo wawo. Nawo ŵangamba kusopa Yehova na kuŵa mu mbumba yake.

Ndise ŵabali ŵinu,

Wupu Wakulongozga wa Ŵakaboni ŵa Yehova