Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Ivyo Mungasambira mu Baibolo

 SAMBIRO 95

Pakaŵavya Chakuŵatondeska

Pakaŵavya Chakuŵatondeska

Mwanalume munyake wakupendera wakapempheskanga pa chipata cha tempile zuŵa lililose. Zuŵa linyake kumise, wakawona Petrosi na Yohane ŵakuluta ku tempile. Munthu yura wakati kwa iwo: ‘Chonde nipaniko chilichose icho mungaŵa nacho.’ Petrosi wakati: ‘Nili na chinthu chinyake chakuzirwa chomene chakuti nikupe kuluska ndalama. Mu zina la Yesu wuka na kwamba kwenda.’ Petrosi wakamukora pa woko mwanalume yura ndipo wakanyamuka na kwamba kwenda. Wumba wose uwo ukawona ivi ukakondwa chomene na munthondwe uwu, ndipo ŵanthu ŵanandi ŵakagomezga mwa Yesu.

Kweni ŵasembe na Ŵasaduki ŵakakwiya chomene. Ŵakakora ŵapositole aŵa na kuluta nawo ku khoti. Ŵakati kwa iwo: ‘Ni njani wamupani nkhongono zakuchizgira munthu uyu?’ Petrosi wakazgora kuti: ‘Ni Yesu Khristu, uyo mukamukoma.’ Ŵalongozgi ŵara ŵakakalipa kuti: ‘Lekani kuyowoya vya Yesu muno!’ Kweni ŵapositole ŵakati: ‘Tikwenera kuyowoya vya iyo. Nakuti tingaleka chara kuyowoya.’

Ŵakati ŵafwatulika, Petrosi na Yohane ŵakaluta ku ŵasambiri ŵanyawo, ŵakaŵaphalira vyose ivyo vikachitika. Wose ŵakalombera pamoza ndipo ŵakapempha Yehova kuti: ‘Chonde tovwirani kuti tiŵe na chikanga mwakuti tilutilire kuchita ntchito yinu.’ Yehova wakaŵapa mzimu wake utuŵa, ndipo ŵakalutilira kupharazga na kuchizga. Ŵanthu ŵanandi chomene ŵakazgoka ŵasambiri. Ŵasaduki ŵakachita sanji chomene mwakuti ŵakakaka ŵapositole na kuŵajalira mu jele. Kweni usiku, Yehova wakatuma mungelo. Mungelo uyu wakajura milyango ya jele, wakaphalira ŵapositole kuti: ‘Lutaniso ku tempile, mukalutilire kusambizga.’

Mulenji, munthu munyake wakaphalira Sanihedirini, ilo likaŵa khoti likuru chomene la Ŵayuda, kuti: ‘Jele ndakujalika nga umo likaŵira, kweni ŵanalume awo mukaŵajalira mulije. Ŵali mu tempile, ŵakusambizga ŵanthu.’ Ŵakaŵakakaso ŵapositole na kuluta nawo ku Sanihedirini. Wasembe mukuru wakati: ‘Tikamuphalirani kuti muleke kuyowoyaso vya Yesu.’ Kweni Petrosi wakazgora kuti: “Tikwenera kupulikira Chiuta nga muwusi m’malo mwa ŵanthu.”

Ŵalongozgi ŵara ŵakakwiya chomene ndipo ŵakakhumbanga kukoma ŵapositole. Kweni Mufarisi munyake zina lake Gamaliyeli wakawuka, ndipo wakati: ‘Chenjerani! Panyake Chiuta wali nawo ŵanthu aŵa. Kasi mukukhumba nadi kulimbana na Chiuta?’ Ŵakapulikira ulongozgi wake. Ŵakati ŵaŵathyapura ŵapositole, ŵakaŵaphaliraso kuti ŵaleke kupharazga ndipo ŵakaŵafwatura. Kweni ŵapositole ŵakaleka yayi kupharazga. Ŵakalutilira kupharazga makani ghawemi, mu tempile na ku nyumba na nyumba.

“Tikwenera kupulikira Chiuta nga muwusi m’malo mwa ŵanthu.”​—Milimo 5:29