Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Ivyo Mungasambira mu Baibolo

 SAMBIRO 92

Yesu Wakawonekera ku Ŵalovi

Yesu Wakawonekera ku Ŵalovi

Pakati pajumpha kanyengo kufuma apo Yesu wakawonekera ku ŵapositole ŵake, Petrosi wakaluta kukaloŵa mu Nyanja ya Galileya. Tomasi, Yakobe, Yohane, na ŵasambiri ŵanyake ŵakaluta nayo. Ŵakaloŵa usiku wose, kweni ŵakawerapo waka.

Mulenji kukati kwacha, ŵasambiri ŵakawona munthu wimilira mumphepete mwa nyanja. Munthu yura wakachemerezga kuti: ‘Kasi mwakorapo somba yiliyose?’ Iwo ŵakati: ‘Yayi, tawerapo waka!’ Munthu yura wakati: “Ponyani mukwawu kumalyero kwa boti.” Ŵasambiri ŵakaponya mukwawu, ndipo ŵakakora somba zinandi chomene mwakuti ŵakatondeka kuguzira mukwawu mu boti. Nyengo yeneyiyo, Yohane wakamanya kuti munthu yura wakaŵa Yesu, ndipo wakati: “Ni Fumu!” Nyengo yeneyiyo, Petrosi wakadukira mu maji na kwamba kushuwa (kuskamba) kulazga uko kukaŵa Yesu. Ŵasambiri ŵanyake ŵakamulondezga mu boti.

Ŵakati ŵafika pa mtunda, ŵakasanga chingwa kweniso somba pa moto. Yesu wakaŵaphalira kuti ŵasazgirepo somba zinyake izo ŵakakora. Kufuma apo, wakati: ‘Zani, murye chakurya.’

Ŵakati ŵarya, Yesu wakafumba Petrosi kuti: ‘Kasi ukunitemwa chomene ine kuluska kuloŵa somba?’ Petrosi wakati: ‘Enya, Fumu, imwe mukumanya kuti nkhumutemwani.’ Yesu wakati: ‘Mbwe liskanga twanamberere twane.’ Yesu wakafumbaso kuti: ‘Petrosi, kasi ukunitemwa ine?’ Petrosi wakati: ‘Fumu, mukumanya kuti nkhumutemwani.’ Yesu wakati: “Liskanga tumberere twane.” Yesu wakafumbaso kachitatu. Petrosi chitima chikamukora chomene. Ntheura wakati: “Fumu, imwe mukumanya vinthu vyose, mukumanya kuti nkhumutemwani.” Yesu wakati: “Liskanga tumberere twane.” Penepapo wakaphalira Petrosi kuti: “Lutilira kunilondezga.”

““[Yesu] wakati kwa iwo: ‘Nilondezgani, ndipo nimuzgoraninge ŵalovi ŵa ŵanthu.’ Nyengo yeneyiyo, ŵakasida mikwawu yawo na kumulondezga.”​—Mateyu 4:​19, 20