Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Ivyo Mungasambira mu Baibolo

 SAMBIRO 2

Chiuta Wakapanga Mwanalume na Mwanakazi Wakwamba

Chiuta Wakapanga Mwanalume na Mwanakazi Wakwamba

Yehova wakapanda munda wakuchemeka Edeni. Mu munda uwu mukaŵa maluŵa ghanandi, makuni, na vinyama. Pamanyuma Chiuta wakapanga munthu wakwamba. Munthu uyu wakaŵa Adamu. Wakamuwumba na dongo ndipo wakathutiramo mvuchi mu mphuno zake. Kasi ukumanya icho chikachitika? Adamu wakazgoka wamoyo. Yehova wakamupa ntchito yakuti wapwelelerenge munda. Chiuta wakatuma Adamu kuti wathye mazina vinyama vyose.

Yehova wakamupa dango Adamu. Wakamuphalira kuti: ‘Vipasi vya mu makuni ghose uryenge kuwuskako vya mu khuni limoza pera. Para wazakarya vya mu khuni ili, uzamufwa.’

Pamanyuma Yehova wakati: ‘Nipangenge munthu munyake kuti wawovwirenge Adamu. Chiuta wakagoneka Adamu tulo tukuru ndipo wakatora mbambo yimoza ya Adamu na kupanga mwanakazi. Zina la mwanakazi uyu likaŵa Eva. Mbumba ya Adamu na Eva ndiyo yikaŵa yakwamba. Kasi Adamu wakajipulika wuli Chiuta wati wamupangira mwanakazi? Adamu wakakondwa chomene. Wakayowoya kuti: ‘Yehova wanipangira mwanakazi muwemi kufuma ku mbambo yane! Uyu wakuyana na ine.’

Yehova wakaphalira Adamu na Eva kuti ŵababe ŵana na kuzuzga charu chapasi. Yehova wakakhumbanga kuti Adamu na Eva na ŵana ŵawo, ŵagwilire lumoza ntchito ya kunozga charu chapasi kuti chiŵe paradiso panji kuti munda wakutowa. Wakakhumbanga kuti charu chose chiŵe nga ni munda wa Edeni. Kweni ivi ndivyo vikachitika yayi. Chifukwa wuli? Tisambirenge vinandi mu mutu 3.

“Uyo wakaŵalenga pakwamba wakaŵalenga iwo mwanalume na mwanakazi.”​—Mateyu 19:​4-6