Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Mungaŵa Ŵakukondwa mu Mbumba Yinu

 CIGAŴA 4

Umo Mungacitira Kuti Muleke Kunanga Ndalama

Umo Mungacitira Kuti Muleke Kunanga Ndalama

“Fundo zose zikukhozgeka mu wupu.”— Zintharika 20:18

Tose tikukhumba ndalama kuti tipwelerere mbumba zithu. (Zintharika 30:8) Nakuti ‘ndalama nchivikiliro.’ (Mupharazgi 7:12) Nyengo zinyake cingaŵa cakusuzga kudumbiskana vya ndalama na muwoli panji mfumu winu, kweni ndalama zileke kwambiska masuzgo mu nthengwa yinu. (Ŵaefeso 4:32) Ŵakutorana ŵakwenera kugomezgana na kudumbiskana umo ŵacitirenge na ndalama.

 1 DUMBISKANANI UMO MUCITIRENGE NA NDALAMA

IVYO BAIBOLO LIKUYOWOYA: “Ni njani wa imwe uyo wakukhumba kuzenga cigongwe kwambura kukhala dankha pasi na kupendesera mtengo, kuti wawone usange wali nazo zakukwana kuti wacimalizge?” (Luka 14:28) Nchakuzirwa kukhala pasi kuti mudumbiskane umo mucitirenge na ndalama zinu. (Amosi 3:3) Dumbiskanani ivyo mukukhumba kugura mu mbumba yinu na ivyo mungakwaniska. (Zintharika 31:16) Lekani kugura cinthu cifukwa cakuti muli na ndalama. Gulani ivyo vikukhumbikwa pera. Gegani ngongoli. Gulani vinthu kuyana na ndalama izo muli nazo pera.—Zintharika 21:5; 22:7.

IVYO MUNGACITA:

  • Usange mwapanga bajeti ndipo ndalama zinyake zakhalako paumaliro wa mwezi, dumbiskanani ivyo mucitenge nazo

  • Usange ivyo mukukhumba kugura ni vinandi kuluska ndalama izo muli nazo, dumbiskanani ivyo mungacepeskako. Mwaciyelezgero, m’malo mwa kugura vyakuvwara mu sitoro mungagura pa kawunjika.

 2 FWATUKIRANANI

IVYO BAIBOLO LIKUYOWOYA: “Tikupwelelera cilicose mwakugomezgeka, pamaso pa Yehova pera cara, kweniso pamaso pa ŵanthu.” (2 Ŵakorinte 8:21) Muphalirani munyinu ndalama izo mukupokera panji kusanga kweniso izo mwagwiliskira nchito.

Nyengo zose mudumbiskanenge dankha para mukukhumba kucita cinthu cikuru na ndalama. (Zintharika 13:10) Usange mukudumbiskana vya ndalama, mu nthengwa yinu mulutilirenge kuŵa mtende. Ndalama izo mukusanga ni za mwekha yayi, kweni za mbumba.— 1 Timote 5:8.

IVYO MUNGACITA:

  • Dumbiskanani unandi wa ndalama izo waliyose wangagwiliskira nchito kwambura kufumba dankha munyake

  • Mupaturenge nyengo kuti mudumbiskanenge vya ndalama, kulindilira kuti paŵe dankha suzgo yayi