Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Mungaŵa Ŵakukondwa mu Mbumba Yinu

 CIGAŴA 5

Ivyo Mungacita Kuti Muŵe pa Mtende na Ŵabali Ŵinu

Ivyo Mungacita Kuti Muŵe pa Mtende na Ŵabali Ŵinu

“Jivwalikani mtima wa ciwuravi, lusungu, kujicefya, kuzika na kukhomezga.”—Ŵakolose 3:12

Para ŵanthu ŵatorana ŵakupanga mbumba yiphya. Nangauli mukwenera kutemwa na kucindika ŵapapi ŵinu, kweni muwoli panji mfumu winu ndiyo ngwakuzirwa comene kwa imwe pa caru capasi. Ici cingaŵa cakusuzga kuti ŵabali ŵinu ŵacipulikiske. Kweni fundo za mu Baibolo zingamovwirani kuti mucite vinthu makora, mwakuti muŵe pa mtende na ŵabali ŵinu na kuleka kusulako mbumba yinu yiphya.

 1 MUWONENGE ŴABALI ŴINU MWAKWENELERA

IVYO BAIBOLO LIKUYOWOYA: “Cindika ŵawuso na ŵanyoko.” (Ŵaefeso 6:2) Nanga mungakura wuli, mukwenera kucindika ŵapapi ŵinu. Mukweneraso kumanya kuti mfumu panji muwoli winu nayo wakwenera kupwelera ŵapapi ŵake. “Citemwa cilije sanji.” Ntheura kucita sanji yayi para muwoli panji mfumu winu wakutemwa ŵapapi ŵake.—1 Ŵakorinte 13:4; Ŵagalatiya 5:26.

IVYO MUNGACITA:

  • Lekani kuyowoya mazgu ghakutalulira, nga “Ŵapapi ŵako ŵakuninena nyengo zose” panji “Amama ŵako ŵandanitemwepo.

  • Pulikiskani ivyo muwoli panji mfumu winu wakuyowoya

 2 ŴANI NA CIKANGA APO MPHAKWENELERA

IVYO BAIBOLO LIKUYOWOYA: ‘Mwanalume wasidenge wiske na nyina na kubatikana na muwoli wake ndipo ŵaŵenge thupi limoza.’ (Genesis 2:24) Para mwatora panji kutengwa, ŵapapi ŵangawona nga ŵacali na udindo kumupwelelerani, ndipo ŵanganjilirapo comene pa nthengwa yinu.

Vili kwa imwe na munyinu kuŵaŵikira mphaka na kuŵaphalira mwacitemwa. Mungaŵaphalira mwambura kubisa kweni mwanchindi. (Zintharika 15:1) Kujicefya, kuzika, na kukhomezga vimovwiraninge kuti muŵe pa mtende na ŵabali ŵinu na “kuzizipizgirana yumoza na munyake mu citemwa.”—Ŵaefeso 4:2.

IVYO MUNGACITA:

  • Usange mukuwona kuti ŵabali ŵinu ŵakunjilirapo comene pa nthengwa yinu, dumbiskanani na muwoli panji mfumu winu

  • Koleranani cimoza umo mungacitira para ŵabali ŵinu ŵakunjilirapo comene pa nthengwa yinu