Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Chiuta Wakutiphalira Uthenga Uwemi!

 SAMBIRO 8

Chifukwa Wuli Chiuta Walekelera Uheni na Suzgo?

Chifukwa Wuli Chiuta Walekelera Uheni na Suzgo?

1. Kasi uheni ukamba wuli?

Chiuta walekelera ŵanthu kuti ŵawuse mwakuti ŵajiwonere ŵekha kuti mbakutondeka

Uheni ukanjira mu charu chifukwa cha utesi wa Satana. Pakwamba Satana wakaŵa mungelo muwemi chomene, kweni “wakima mu unenesko chara.” (Yohane 8:44) Wakamba kudokera kuti ŵanji ŵasopenge iyo m’malo mwa Chiuta. Satana wakapusika Eva na kumunyengelera kuti wapulikire iyo m’malo mwa Chiuta. Adamu nayo wakagaluka, wakalondezga muwoli wake. Ivyo Adamu wakachita ndivyo vili kunjizga suzgo na nyifwa.—Ŵazgani Genesis 3:1-6, 19.

Satana wakanyengelera Eva kuti waleke kupulikira Chiuta. Ntheura kwamba pa nyengo yira, wakugalukira mazaza gha Chiuta, uyo Ngwapachanya Nkhanira. Ŵanthu ŵanandi ŵali ku chigaŵa cha Satana. Iwo ŵakukana mazaza gha Chiuta. Ntheura Satana wazgoka “muwusi wa charu.”—Ŵazgani Yohane 14:30; 1 Yohane 5:19.

2. Kasi ivyo Chiuta wakalenga vikaŵa na kafukwa?

Yayi. Vyose ivyo Chiuta wakuchita ni vyakufikapo. Ŵanthu na ŵangelo awo Chiuta wakalenga ŵakaŵa ŵakuti ŵangamupulikira makora chomene. (Duteronome 32:4, 5) Chiuta wali kutilenga na wanangwa wakuti tisankhenge pakati pa kuchita chiwemi na chiheni. Ichi chikutipa mwaŵi kuti timutemwenge na mtima wose.—Ŵazgani Yakobe 1:13-15; 1 Yohane 5:3.

3. Chifukwa wuli Chiuta walekelera suzgo mpaka sono?

Yehova waŵaleka dankha awo ŵakumugalukira. Chifukwa? Kuti ŵanthu ŵamanye kuti kwambura iyo, palije chakovwira icho ŵangachita. (Mupharazgi 7:29; 8:9) Vilimika vyose 6,000 ivyo ŵanthu ŵakhala pa charu, ŵajiwonera ŵekha kuti  fundo iyi njaunenesko. Ŵalongozgi ŵatondeka kumazga nkhondo, kuswa malango, kulyerana masuku pa mutu, na matenda.—Ŵazgani Yeremiya 10:23; Ŵaroma 9:17.

Kweni ufumu wa Chiuta ukupambana na ufumu wa ŵanthu. Iwo ukovwira ŵanthu awo ŵakuwuzomera. (Yesaya 48:17, 18) Sonosono apa, Yehova waparanyenge maboma ghose gha ŵanthu. Awo ŵakuzomera kuwusika na Chiuta ndiwo ŵekha ŵazamukhalapo pa charu chapasi.—Yesaya 11:9.—Ŵazgani Daniel 2:44.

4. Pakuti Chiuta wazikira, ise tili na mwaŵi wuli?

Satana wakati palije uyo wangateŵetera Yehova chifukwa cha chitemwa. Kasi mukukhumba yayi kususka utesi uwu? Namwe mungawovwirapo. Pakuti Chiuta wazikira, tili na mwaŵi wakuti tisankhepo boma ilo tikukhumba, la Chiuta panji la ŵanthu. Ivyo tikuchita ndivyo vikulongora boma ilo tasankha.—Ŵazgani Job 1:8-12; Zintharika 27:11.

5. Kasi tingasankha wuli Chiuta kuŵa Fumu yithu?

Ivyo tikuchita ndivyo vikulongora usange tasankha Chiuta kuŵa Fumu yithu

Tisambire vya iyo mu Mazgu ghake na kumusopa umo mwenecho wakukhumbira. (Yohane 4:23) Nase tichite nga ni Yesu. Tileke kunjilirapo pa nkhani za ndyali panji nkhondo. Ichi chilongorenge kuti tikukana kuti Satana ndiyo waŵe Fumu yithu.—Ŵazgani Yohane 17:14.

Satana ngwankhongono, ndipo wakupuluska ŵanthu kuti ŵawonenge nkharo zaukazuzi nga ndizo ziwemi. Para takana kuchitako vinthu ivi, ŵabwezi na ŵabali ŵithu ŵanyake ŵangatinena. (1 Petrosi 4:3, 4) Ise tikwenera kusorapo chimoza. Kasi tendenge na ŵanthu awo ŵakutemwa Chiuta? Kasi tipulikirenge malango ghake? Para tikupulikira, tikulongora kuti Satana ni mutesi. Iyo wakuti palije munthu uyo wangapulikira Chiuta para vyamufyenya.—Ŵazgani 1 Ŵakorinte 6:9, 10; 15:33.

Pakuti Chiuta wakutemwa ŵanthu, wawoneseskenge kuti uheni na masuzgo vyamara. Awo ŵakugomezga fundo iyi ŵazamukhala pa charu chapasi kwamuyirayira.—Ŵazgani Yohane 3:16.

 

Manyani Vinandi

Chifukwa Wuli Chiuta Wakughalaŵiska Waka Masuzgo?

Ŵanthu ŵanandi ŵakughanaghana kuti Chiuta ndiyo wakupangiska masuzgo mu charu. Imwe mukughanaghana wuli? Sambirani ivyo Chiuta wakuyowoya pa nkhani ya masuzgo agho tikusangana nagho.