Lutani apo pali nkhani

Lutani apo pali mitu ya nkhani

 VINYAKE IVYO VIKACHITIKA CHAKA CHAJUMPHA

Ungano Uphya Uwo Ukutovwira pa Uteŵeti na Umoyo Wachikhristu

Ungano Uphya Uwo Ukutovwira pa Uteŵeti na Umoyo Wachikhristu

PA UNGANO wapachaka wa Watch Tower Bible and Tract Society of Pennsylvania uwo ukaŵako pa Okutobala 3, 2015, Mubali Anthony Morris wa mu Wupu Wakulongozga wakapharazga kuti tiŵenge na ungano uphya wakuchemeka Uteŵeti na Umoyo Wachikhristu, ndipo unjirenge mu malo mwa Sukulu ya Uteŵeti wa Chiuta, Ungano wa Uteŵeti, na Sambiro la Baibolo la Mpingo. Mubali Morris wakalongosoraso kuti kabuku ka mapeji 8 ka Uteŵeti na Umoyo Wachikhristu ndiko kanjirenge mu malo mwa Uteŵeti Withu wa Ufumu. Mu kabuku aka muli ndondomeko ya maungano ya sabata yiliyose na vithuzithuzi vyakovwira kupulikiska Baibolo pakusambira patekha.

Ungano uphya uwu uli na vigaŵa vikuruvikuru vitatu:

  1. Mazgu gha Chiuta Mbusambazi. Chigaŵa ichi  chikwamba na nkhani ya maminiti 10. Nkhani iyi yikufuma mu machaputara gha mu Baibolo agho tikuŵerenga sabata iyo kweniso vithuzithuzi ivyo vili mu kabuku ka maungano. Kufuma apo, pali chigaŵa chakuti “Ivyo Tasambira” cha maminiti 8. Pa chigaŵa ichi pakuŵa kudumbiskana mwa mafumbo na mazgoro kufuma pa ivyo tasambira mu machaputara gha sabata iyo. Paumaliro pakuŵa nkhani yakuŵerenga Baibolo ya maminiti 4.

  2. Pharazgani Mwaluso. Pa chigaŵa ichi, ŵana ŵa sukulu ŵatatu ŵakuyezgelera umo ŵangasambizgira paulendo wakwamba, ulendo wakuwelerako, na pa sambiro la Baibolo.

  3. Umoyo Wachikhristu. Pa chigaŵa ichi tikuwona umo tingalondezgera fundo za mu Baibolo pa umoyo withu wa zuŵa na zuŵa. Chinyake chakuzirwa chomene pa chigaŵa ichi ni Sambiro la Baibolo la Mpingo.

Ŵabali na ŵadumbu ŵanandi pa charu chose ŵakuwonga chomene masambiro agho ŵakupokera pa ungano uphya uwu. Mubali munyake ku Australia wakalemba kuti: “Ungano wa Uteŵeti na Umoyo Wachikhristu nguwemi chomene. Nkhani zake ni zakovwira chomene pa umoyo withu, ndipo zikulongosoreka munthowa yipusu. Nyengo yikukaŵa yayi kumara, chifukwa nkhani zikuŵa zifupi, zikulongosora waka fundo, ndipo zikunozga nkhanira. Chinyakeso icho chikovwira chomene ni mavidiyo na kufumba ŵana.”

Wupu wa ŵalara ku Italy ukalemba kuti: “Tawona kuti ungano uphya uwu ukutichiska tose kuti tinozgekerenge mwakukwana, ndipo ivi vyatovwira kuti sono tisambizgenge mwaluso. Ungano wamukati mwa sabata uwu ni nthowa yiwemi iyo Yehova wanozga pakukhumba kusambizga ŵanthu ŵake. Mupharazgi munyake wa vyaka 15 wakati: ‘Pakwamba, vikanisuzganga kutegherezga m’paka paumaliro wa ungano. Kweni ungano uphya uwu wanovwira kuti nitegherezgenge  chomene kweniso kuti ninozgekerenge mwakukwana ku nyumba.’”

Mbumba yinyake ya ku Austria yikalemba kuti: “Pakwamba vikatisuzganga chomene kuŵazga Baibolo sabata yiliyose pamoza na mwana withu msungwana wa vyaka 10. Kweni chigaŵa cha ‘Mazgu gha Chiuta Mbusambazi’ chatovwira chomene kuti tizgorengepo mwakufwatuka. Sono, tose ŵatatu tikutemwa kunozgekera pakulondezga ndondomeko ya kuŵerenga Baibolo sabata yiliyose. Chakukondweska chomene ntchakuti sono tikuwona kuti mwana withu wakutemwa chomene vinthu vyauzimu.”

Ines wa ku Germany wakuti: “Sono nkhuchiskika kunozgekera na kughanaghanirapo chomene pa nkhani iyo nkhusambira. Nkhakwamba kuti nisambire nthena. Pasono nili paubwezi uwemi na Yehova. Charu cha Satana chikunivuska chomene. Kweni maungano ghakunipa nkhongono na kunovwira kuti nilutilire kuteŵetera Yehova.”

Mipingo ya ku Solomon Islands nayo yikukondwa chomene na ungano uphya uwu, ndipo yikuyezgayezga kuti yipindule nawo chomene. Mipingo yinandi yili mu mizi iyo kulije magesi panji Intaneti, ndipo ŵabali ŵali pakati pa nyanja, kutali na mtunda. Kasi ŵakuchita wuli kuti ŵasange vyakuwoneskerapo mavidiyo kweniso mavidiyo gha mwezi na mwezi gha maungano? Ŵapharazgi ŵanyake ŵa mpingo uwo uli pa chirwa cha Malaita ŵakaghanaghana kuti ŵawovwirane kuguliska mbuto zakuchemeka coconut. Ŵakati ŵaguliska, ŵakapeleka ndalama ku mpingo kuti ŵagure chakuwoneskerapo mavidiyo chichoko waka icho ŵangatchaja na sola. Kuti ŵasange mavidiyo mwezi uliwose, ŵabali ŵakuluta ku chigaŵa chinyake chakufupiko icho kukusangika Intaneti kuti ŵakachite dawunilodi mavidiyo. Para ŵachita dawunilodi ŵakugaŵirako ŵanyawo mu mpingo.

 Mubali munyake ku United States wakalemba kuti: “Ine nkhuwona kuti nkhusambira luŵiro vinthu para nkhuviwona na maso. Kwa vyaka vyakujumpha 40, vyanisuzganga chomene kuti nipulikiske vinthu vinyake. Kuti nimulongosolere munthu chinthu nkhaŵerenganga dankha mwakuwerezgawerezga kuti nichipulikiske. Ntheura nkhuwonga chomene Wupu Wakulongozga chifukwa cha mavidiyo na vithuzithuzi. Mavidiyo agho ghakulongosora mabuku gha mu Baibolo ngawemi chomene, ndipo viyelezgero ivyo vikuŵa mu kabuku ka maungano ndivyo nkhakhumbanga nadi! Nkhuwona kuti Yehova watumbika kuyezgayezga kwinu na chilato chakuti muwovwire ŵanthu ŵake. Yewo chomene.”

Malawi