Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova la 2017

 GEORGIA

Chitemwa cha Ŵakhristu Ŵaunenesko Chikutondeka Yayi

Chitemwa cha Ŵakhristu Ŵaunenesko Chikutondeka Yayi

Igor: Ine na Gizo tose tikawungananga na kagulu ka mu tawuni ya Tkvarcheli, Abkhazia. Gulu lithu likawungananga na mpingo uwo ukaŵa ku Jvari, mtunda wa makilomita pafupifupi 85. Mwezi uliwose, nkhalutanga ku Jvari kukatora mabuku ghakulongosora Baibolo gha gulu lithu. Nyengo yichoko waka wupu wa Soviet Union ukati wamara, mu 1992, chigaŵa cha Abkhazia chikakhumbanga kuŵa pachekha. Ntheura pakawuka nkhondo pakati pa ŵasilikari ŵa boma la Georgia na ŵakugalukira boma, ndipo vinthu vikasuzga chomene.

Gizo Narmania na Igor Ochigava

Ŵabali ŵaŵiri aŵa ŵakawovwira chomene Ŵakhristu ŵanyawo mu nyengo ya nkhondo ku Abkhazia.

Gizo: Nkhabatizika na vyaka 21, chaka chimoza pambere nkhondo yindayambe. Nkhondo yikati yayamba, ŵabali ŵakatimbanizgika pachoko chifukwa cha wofi. Kweni Mubali Igor pakuŵa muliska muwemi, wakatikhozganga chomene. Iyo wakatenge: “Sono ndipo ŵanthu ŵakukhumbikwira kupembuzgika. Nakuti para tikulutilira kupharazga ndipo tiŵenge  ŵakukhora mwauzimu.” Ntheura zuŵa lililose tikaphalirangako ŵazengezgani ŵithu uthenga wakupembuzga wa mu Baibolo. Kweni tikachitanga mwakuchenjera chomene.

Igor: Chifukwa cha nkhondo, chikaŵanga chakusuzga chomene kuti tende nthowa iyo tikendanga kale pakukatora mabuku ku Jvari. Pakuti nkhakulira mu chigaŵa ichi, nkhasanga nthowa yinyake yiwemi iyo yikajumphanga mu minda ya tiyi na mu mapiri. Kweni nipera pakaŵa suzgo lakuti ungasangana na vigeŵenga panji kukanda mabomba agho ŵakaghawundiranga pasi. Pakuti nkhakhumbanga yayi kuŵika umoyo wa ŵabali pangozi, nkhalutanga nekha kamoza pamwezi. Yehova wakanovwiranga, ntheura nyengo zose nkhakwaniskanga kukatora chakurya chauzimu icho chikatovwira kuti tilutilire kukhora mwauzimu.

Nangauli mu tawuni yithu ya Tkvarcheli mukaŵavya nkhondo, kweni ŵakakanizga ŵanthu kunjiramo na kufumamo. Ntheura nase tikamba kusuzgika chifukwa cha nkhondo. Apo nyengo yakuzizima yikambanga, chakurya chikamba kusoŵa, ndipo tose tikafipanga mtima usange tiponenge. Tikakondwa chomene apo tikapulika kuti ŵabali ku Jvari ŵanozga vyakuti ŵatitumizgire wovwiri.

Gizo: Zuŵa linyake, Igor wakatipempha usange mu nyumba yithu ŵangazakasungamo na kugaŵiramo chakurya icho ŵabali ŵakatinozgera. Mubali Igor ndiyo wakaluta kukatora chakurya ichi ku Jvari. Pakuti mu nthowa izo wakendanga mukaŵanga ŵapolisi kweniso vigeŵenga na ŵankhungu, tikamufipiranga mtima chomene mubali withu.—Yoh. 15:13.

Pakati pajumpha mazuŵa ghachoko waka, tikakondwa chomene kuwona mubali Igor wakuwerako. Wakiza na galimoto yakuzura na vyakurya vyakuti tingarya mu myezi yose yakuzizima. Mu nyengo yakusuzga iyi, tikajiwonera tekha kuti chitemwa cha Ŵakhristu ŵaunenesko chikutondeka yayi.—1 Kor. 13:8.