Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova la 2017

Ŵakupharazga pa siteji ya galimoto yakwenda pa mawaya

 GEORGIA

“Ichi Ntchiharo cha Ŵateŵeti ŵa Yehova.”—Yes. 54:17.

“Ichi Ntchiharo cha Ŵateŵeti ŵa Yehova.”—Yes. 54:17.

ŴATEŴETI ŵa Yehova mu Georgia ŵakulimbikira kupharazga makani ghawemi, ndipo Yehova waŵatumbika chomene. Ntheura makani ghawemi ghafika pafupifupi mu vigaŵa vyose vya charu ichi.

Pachanya: Ŵapharazgi ŵakunozgekera kukapharazga ku Ushguli, pachanya pa phiri

Mu vyaka ivyo vyajumpha, ŵapharazgi ŵamwamphu na ŵapayiniya ŵakamba kulimbikira kovwira ŵanthu ŵa mu vigaŵa ivyo ŵapharazgi ŵakufikako viŵi yayi. Kuti ŵapharazgi ŵakafike ku mizi yinyake ya mu mapiri ŵakwenda pa  magalimoto ghankhongono chomene panji pa kagalimoto kakwenda pa mawaya.

Ŵapharazgi mu chigaŵa cha Svaneti

Kwambira mu 2009, chaka chilichose ofesi ya munthavi ya Georgia yikutumizga ku mipingo yose mazina gha vigaŵa ivyo vilije mpingo uwo ukupharazgako, ndipo yikupempha ŵapharazgi kuti ŵaluteko ku vigaŵa ivi. Ŵapharazgi ŵanandi ŵasintha vinandi chomene pa umoyo wawo kuti ŵakawovwire mu vigaŵa ivi.

Ana na Temuri Bliadze

Temuri Bliadze na muwoli wake Ana ŵakaŵa kuti ŵatorana waka apo ŵakapulikanga kuti pakukhumbikwira ŵapharazgi kuti ŵalute ku chigaŵa chamapiri cha Ajaria. Pa nyengo iyi, ŵakaŵa kuti ŵagura waka malo ghakuzengapo nyumba. Kweni apa mwaŵi ukaŵajulikira wakuti ŵasazgireko uteŵeti wawo.

Ŵakaluta na kukhalako dankha sabata yimoza ku Ajaria. Temuri wakukumbuka ivyo wakawona pa nyengo iyi. Wakuti: “Ŵapharazgi ŵakendanga mitunda yitali chomene kuti ŵakafike ku mizi yichokoyichoko. Ise tikaŵa na galimoto, ndipo nkhawona kuti yitovwirenge nadi mu malo agha.”

Ana wakuti: “Tikasamuka nangauli chikaŵa chipusu yayi chifukwa tikazgoŵerana na mpingo withu kweniso mbumba yakwithu. Kweni Yehova watitumbika.” Temuri na Ana ŵakovwira kagulu ka mu tawuni ya Keda, mu chigaŵa cha Ajaria, ndipo ŵakhalako vyaka vyakujumpha vitatu.

Ŵapayiniya Ŵaluso

Ŵapayiniya ŵapadera ŵakanyengo awo ofesi yikaŵatuma mu vigaŵa vyakutali ivi nawo ŵakawovwira chomene. Nyengo iyo ofesi yikaŵapa yikati yamara, ŵapayiniya ŵanandi ŵakasankha kukhala mu vigaŵa ivyo ŵakapharazganga kuti ŵawovwire ŵanthu awo ŵakamba kusambira nawo Baibolo.

Ŵadumbu ŵaŵiri ŵapayiniya, wose ŵakuchemeka Khatuna, ŵakaŵatuma ku tawuni yakutowa ya Manglisi. Mu tawuni  iyi mukaŵavya Ŵakaboni, kweni ŵadumbu aŵa vinthu vikaŵayendera makora chomene. Mwezi wakwamba, ŵakaŵa na masambiro gha Baibolo 9, mwezi wachiŵiri masambiro 12, ndipo mwezi wachitatu masambiro 18. Iwo ŵakaghanaghana kuti ŵalutilire kukhala ku Manglisi kuti ŵawovwire ŵanthu awo ŵakasambiranga nawo Baibolo.

Pakukhumba kusanga ndalama zakujovwilira, ŵadumbu aŵa ŵakalongora luso chomene. Ŵanthu ŵanandi awo ŵakwiza ku Manglisi ŵakutemwa chomene juwisi wakufuma ku njere za mapayina, chifukwa ŵakuti wakovwira mu thupi. Ntheura pakwamba ŵadumbu aŵa ŵakatoranga njere ziŵisi za mapayina, ŵakapanganga juwisi uyu na kuguliska pa msika. Kweni pamanyuma pakasangika nthowa yinyake yakusangira ndalama, iyo ŵakaghanaghanangako yayi.

Zuŵa linyake, munthu uyo ŵakasambiranga nayo Baibolo wakiza na tunkhuku tunandi kwa iwo. Wakaŵaphalira kuti wakamanyanga yayi kuti nkhuku yake yinyake yikatayira masumbi  kuthondo, kweni wakasanga kuti yikwiza na twana pa nyumba. Ntheura mama uyu wakakhumbanga kuti nkhuku izi ziŵe za ŵasambizgi ŵake aŵa. Yumoza wa ŵadumbu aŵa wakaŵetapo nkhuku, ntheura ŵakayamba kuŵeta nkhuku na kusanga ndalama zakujovwilira.

Yumoza wa ŵadumbu aŵa wakalemba kuti: “Tikakwaniska kukhala ku Manglisi vilimika vinkhondi chifukwa chakuti Yehova wakatovwiranga, kweniso ŵabali pamoza na awo tikasambiranga nawo Baibolo ŵakatovwiranga.” Pasono ku Manglisi kuli ŵabali na ŵadumbu awo ŵakulimbikira kupharazga.

Khatuna Kharebashvili na Khatuna Tsulaia apo ŵakaŵa ku Manglisi

Kuchita Upayiniya mu Viyowoyero Vinyake

Mu vyaka vyasonosono apa, ŵanthu ŵanandi ŵa ku vyaru vinyake ŵasamukira ku Georgia. Ŵapayiniya ŵanandi ŵawona kuti mwaŵi waŵajulikira wa kupharazgira ŵanthu ŵa viyowoyero vinyake. Ŵamba kusambira viyowoyero vinyake nga Chiarabic, Chiazerbaijani, Chitchayina, Chingelezi, Chiperesiya, na Chiturkish.

Ŵapayiniya ŵanandi ŵali kwamba kuwungana na magulu panji mipingo ya viyowoyero vinyake. Ŵanyakeso ŵali kusamira ku vyaru vinyake uko kukukhumbikwira ŵapharazgi ŵanandi. Mubali Giorgi na Gela ŵakaŵa na vyaka vya m’ma 20 apo ŵakasamukiranga ku charu chinyake. Giorgi wakuti: “Tikakhumbanga kumupa Yehova vinthu viwemi chomene, ndipo tikawona kuti icho chingatovwira nkhuluta kukapharazga ku charu chinyake.”

Gela wakukumbuka umo vikaŵira apo ŵakaŵa ku charu ichi. Wakuti: “Nkhasambira vinandi chomene chifukwa cha kuteŵetera nga mulara mu charu chachilendo ichi. Wamunthu ukukondwa chomene para Yehova wakukugwiliskira ntchito kovwira ‘tumberere twake.’”—Yoh. 21:17.

Giorgi wakuti: “Nangauli tikakumananga na masuzgo, kweni tikaŵika mtima pa uteŵeti kwambura kwenjerwa chomene  na vinthu vinyake. Tikawona kuti ivyo tikachitanga ndivyo tikeneranga kuchita.”

Mubali munyake wakuchemekaso Gela, wakateŵeterapo ku Turkey vyaka vichoko waka. Iyo wakuti: “Pakwamba nkhakondwanga viŵi yayi, chifukwa nkhasuzgikanga kuyowoya chiyowoyero cha ku malo agha. Kweni nkhati nachimanya chiyowoyero, nkhaŵa wakukondwa chomene. Nkhamba kuchezga mwakufwatuka na ŵabali na ŵadumbu kweniso na ŵanthu mu uteŵeti.”

Mudumbu Nino wachita upayiniya vyaka vyakujumpha 10 mu Istanbul, Turkey, ndipo wakuti: “Kufuma waka pa zuŵa lakwamba ilo nkhasamukira, nkhuwona kuti Yehova wali nane. Para wamunthu ukuteŵetera mu charu chinyake, zuŵa lililose ukuwona kuti vinthu ivyo ukuŵazga mu Buku Lapachaka ndivyo nawe vikukuchitira nadi.”