Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lapachaka la Ŵakaboni ŵa Yehova la 2017

 GEORGIA

Afumu Ŵane Ŵakaleka Yayi Kuŵazga!

Marina Kopaliani

Afumu Ŵane Ŵakaleka Yayi Kuŵazga!
  • WAKABABIKA MU 1957

  • WAKABATIZIKA MU 1990

  • MBIRI YAKE Marina na mfumu wake Badri, ŵakapharazganga kwambura kuvuka, nangauli ŵakaŵaso na ntchito ya kulera ŵana ŵawo ŵaŵiri. Pamanyuma, Badri wakaŵa mu Komiti ya Charu, ndipo wakagomezgeka m’paka apo wakafwira mu 2010.

Mu 1989, ine na afumu ŵane tikakumana na Ŵakaboni ŵa Yehova pa nyumba ya mzengezgani withu. Mubali Givi Barnadze, uyo wakasambiranga Baibolo na mzengezgani withu, wakaŵavya Baibolo, chifukwa nyengo yira chikaŵa chakusuzga kuti munthu wasange Baibolo mu Georgia.

Tikakondwa chomene na ivyo tikapulika, ndipo tikakhumbisiska chomene kuti tisange Baibolo. Afumu ŵane ŵakati ŵakumana na mubali wawo, ŵakamuphalira kuti ŵakupenja Baibolo. Ŵakazizwa chomene apo mubali wawo wakaŵaphalira kuti wagura waka Baibolo la Chigeorgia, ndipo waŵapenge nga ntchawanangwa.

Badri wakati wafika pa nyumba, wakakhala pasi na kwamba kuŵazga Baibolo m’paka usiku. Machero ghake kukati kwacha, ŵakalutizga kuŵazga. Nkhati nawera ku ntchito, nkhasanga kuti ŵachali kuŵazga Baibolo. Ŵakaleka yayi  kuŵazga! Ntheura nkhaŵaphalira kuti ŵatore holide ya mazuŵa ghachoko waka kuti ŵamalizge kuŵazga Baibolo. Nakuti pakatora nyengo yayi, mbwenu ŵakamalizga kuŵazga lose.

Pamanyuma tikamba kusambira buku la Unenesko Weneuwo Ukulongozgera ku Umoyo wa Muyirayira na Mubali Givi Barnadze. Tikaŵa ŵakukondwa chomene chifukwa cha kuŵa na Baibolo lithu na lithu. Apa vikaŵa makora chomene, chifukwa ise tikaŵavya buku la Unenesko ndipo msambizgi withu nayo wakaŵavya Baibolo. Pakati pajumpha chaka chimoza, Badri na ine tikabatizika.