Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 116: Umo Tingasangira Umoyo Wamuyirayira

Nkhani Nambara 116: Umo Tingasangira Umoyo Wamuyirayira

Kasi kasungwana aka na mabwezi ghake ŵakuŵazga vici? Waneneska, ŵakuŵazga buku leneliri ilo nawe ukuŵazga, Buku Lane la Nkhani za mu Baibolo. Ndiposo ŵakuŵazga nkhani yeneyiyi iyo ukuŵazga, yakuti: “Umo Tingasangira Umoyo Wamuyirayira.”

Mwana wakuŵazga

Kasi ukumanya ivyo ŵakusambira? Kuti tizakasange umoyo wamuyirayira, cakwamba tikwenera kumumanya Yehova na Mwana wake Yesu. Baibolo likuti: ‘Umu ndimo munthu wangasangira umoyo wamuyirayira. Wamumanye Ciuta waunenesko yekha, na Yesu Khristu uyo wakatumika pa caru capasi.’

Kasi tingasambira wuli za Yehova Ciuta na Mwana wake Yesu? Nthowa yimoza ndiyo kuŵazga Buku Lane la Nkhani za mu Baibolo, kufuma kukwamba mupaka kuumaliro. Buku ili likutiphalira vinandi vya Yehova na Yesu, asi nthena? Likutiphaliraso vinthu vinandi ivyo iwo ŵacita na vinthu vinyakeso ivyo ŵazamucita kunthazi. Kweni tikwenera kucita vinandi kuluska kuŵazga waka buku ili.

Baibolo

Kasi waliwona buku linyake ilo liri pasi apo? Ni Baibolo. Upemphe munthu munyake kuti wakuŵazgirenge vigaŵa vinyake vya mu Baibolo umo mwafuma nkhani izo zili mu buku lino. Baibolo likutiphalira vinandi ivyo tikwenera kucita kuti titeŵetere makora Yehova mwakuti tizakasange umoyo wamuyirayira. Antheura, tikwenera kuŵa na khumbo la kusambira Baibolo nyengo zose.

Kweni pali vinandi ivyo vikukhumbikwa kuluska kusambira waka za Yehova Ciuta na Yesu Khristu. Tingamanya vinandi vyakukhwaskana na iwo na ivyo ŵakusambizga, kweni tingazakatondeka kusanga umoyo wamuyirayira. Kasi ukumanya cinthu cinyake ico tikwenera kucita?

Tikwenera kuŵa na nkharo yakuyana na vinthu ivyo tikusambira. Kasi ukumukumbuka Yuda Isikariyote? Wakaŵa yumoza wa ŵapositole 12 awo Yesu wakaŵasankha. Yuda wakamanyanga vinthu vinandi comene vyakukhwaskana na Yehova na Yesu. Kweni nchivici cikamucitikira? Kwa nyengo yicoko waka wakazgoka munthu wa mtima uheni, wakapeleka Yesu ku ŵalwani ŵake kumuguliska na ndarama 30 za siliva. Antheura Yuda wazamupokera yayi umoyo wamuyirayira.

Kasi Gehazi ukumukumbuka, mwanalume uyo tikamusambira mu Nkhani Nambara 69? Wakakhumbanga malaya na ndarama ivyo vikaŵa vyake yayi. Kuti watore vinthu ivi, wakayowoya utesi. Kweni Yehova wakamupa cilango. Wazamupelekaso cilango kwa ise usange tikuleka kupulikira malango ghake.

Kweni pali ŵanthu ŵanandi awo ŵakuteŵetera Yehova mwakugomezgeka. Tingatemwa kuti tiŵalondezge, asi nthena? Ciyelezgero ciwemi cakuti ticilondezge ni Samuyeli. Kumbukira kuti, nga ni umo tikasambilira mu Nkhani Nambara 55, Samuyeli wakaŵa na vilimika vinayi panji vinkhondi apo wakamba kuteŵetera Yehova pa hema lake. Antheura, mwambura kupwelerako msinkhu wako, ungatondeka yayi kuteŵetera Yehova.

Mbunenesko kuti munthu uyo tose tikukhumba kumulondezga ni Yesu Khristu. Nanga pangaŵa apo wakaŵa musepuka, nga ni umo tikasambilira mu Nkhani Nambara 87, wakaŵa mu tempele kudumbiskana na ŵanthu za Awiske ŵakucanya. Tiye tilondezge ciyelezgero cake. Tiye tiphalire ŵanthu za uwemi wa Yehova Ciuta na Yesu Khristu. Usange tingacita vinthu ivi, mbwenu tizamuŵa na mwaŵi wa kukhala mu paradiso muphya uyo Ciuta wizenge nayo pano pa caru capasi.

Yohane 17:3; Salmo 145:1-21.



Mafumbo

  • Kasi tikwenera kumanya vici usange tikukhumba umoyo wamuyirayira?
  • Kasi tingasambira wuli za Yehova Ciuta na Yesu, nga ni umo kakucitira kasungwana na ŵanyake awo ŵali pa cithuzithuzi?
  • Kasi ni buku wuli linyake ilo mukuliwona pa cithuzithuzi apa, ndipo cifukwa wuli nyengo zose tikwenera kulisambira?
  • Padera pa kusambira za Yehova na Yesu, kasi ni vici vinyake ivyo vikukhumbikwa kuti tisange umoyo wamuyirayira?
  • Kasi mu Nkhani Nambara 69 tikasambiraci?
  • Kasi ciyelezgero ciwemi ya Samuyeli ico tikasambira mu Nkhani Nambara 55 cikulongoraci?
  • Kasi tingalondezga wuli ciyelezgero ca Yesu Khristu, ndipo usange talondezga, tizamuŵa na mwaŵi wakucita vici munthazi?

Mafumbo ghanyake

  • Ŵazgani Yohane 17:3.

    Kasi Malemba ghakulongora wuli kuti kumumanya Yehova Ciuta na Yesu Khristu, kuti kukung’anamura kusungilira waka fundo pa mtima yayi? (Mat. 7:21; Yak. 2:18-20; 1 Yoh. 2:17)

  • Ŵazgani Salmo 145:1-21.

    Kasi pali vifukwa wuli vya kulumbira Yehova? (Sal. 145:8-11; Civ 4:11)

    Ni mwawuli umo Yehova waliri muwemi “ku wose” ndipo ici cikwenera kutiguzira wuli kwa iye? (Sal. 145:9; Mat. 5:43-45)

    Usange tikumutemwa Yehova na mtima wose, kasi ticiskikenge kucitaci? (Sal. 119:171, 172, 175; 145:11, 12, 21)

Manyani Vinandi

Nthowa, Unenesko, na Umoyo

Umoyo winu ungasintha chifukwa cha ivyo Yesu wakasambizga na kuchita.

Kasi Chiuta Wakukhumba Kuti Vinthu Viŵe Wuli pa Charu Chapasi? (Chigaŵa 1)

Kasi Chiuta wakakhumbanga kuti vinthu viŵe nthena pa charu nga umu viliri sono?