Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 111: Msepuka uyo Wakasiwanga

Nkhani Nambara 111: Msepuka uyo Wakasiwanga

O! O! Nchivici cikucitika apa? Kasi msepuka uyo wagona pasi wajipweteka comene? Awona! Yumoza mwa ŵanalume awo ŵakufumira kuwaro kwa nyumba ni Paulosi! Kasi wamuwona Timote apa? Kasi msepuka uyu wanguwa kufuma pa windo?

Paulosi wakwiza kuzakawuska Yutuko

Enya, ici ndico cacitika. Paulosi wakayowoyanga nkhani ku ŵasambiri mu Tirowa. Wakamanya kuti wawonanenge nawo yayi kwa nyengo yitali cifukwa namacero ghake wakeneranga kuluta ku malo ghanyake. Antheura wakalutizga kuyowoya nkhani mupaka pakati pa usiku.

Msepuka uyu, uyo zina lake ni Yutuko, wakakhala pafupi na windo ndipo wakasiwanga. Wakasondomoka kufuma pa windo la nyumba yakudikanya yacitatu ndipo wakawa pasi dweku! Nawe ungawona kuti ndico cifukwa cake ŵanthu mbacitima comene apa. Apo ŵanalume ŵakamunyamura msepuka uyu, ŵakamusanga nadi umo ŵakaghanaghaniranga. Wakafwa!

Apo Paulosi wakawona kuti msepuka wafwa, wakasindama pa iyo na kumukumbatira. Pamanyuma pake wakati: ‘Kudandaura yayi. Wali makora!’ Ndimo viliri nadi! Cakuziziswa cacitika! Paulosi wakawukiska msepuka ku nyifwa! Ŵanthu wose awo ŵalipo mbacimwemwe comene.

Pamanyuma pake ŵakalutaso pa nyumba yapacanya iyo ŵanguŵamo kuti ŵakarye cakurya. Paulosi wakalutizga kuyowoya nkhani mupaka kukaca. Nchakuwonekerathu kuti Yutuko wakasiwangaso yayi! Pamanyuma pake Paulosi, Timote na awo ŵakaŵa nawo pa ulendo ŵakakwera ngaraŵa. Kasi ukumanya uko ŵakaluta?

Paulosi wakamalizga ulendo wake wacitatu wa kupharazga ndipo wakaŵa pa ulendo kuwelera kukwake. Pa ulendo uwu, Paulosi wakakhala vilimika vitatu mu msumba wa Efeso. Ulendo uwu ukaŵa utali comene kuluska waciŵiri.

Ngaraŵa yikati yanyamuka ku Tirowa, yikima kwa nyengo yicoko waka pa Mileto. Pakuti msumba wa Efeso ukaŵa kutari yayi na Mileto, Paulosi wakatuma uthenga kuti ŵalara ŵa mpingo wa mu Efeso ŵize ku Mileto kuti wazakayowoye nawo kwaumaliro. Nyengo yikati yalutapo, ngaraŵa yikanyamuka, ndipo ŵakaŵa na citima comene kuwona Paulosi wakuluta!

Paumaliro pake ngaraŵa yikafika ku Kesareya. Peneapo Paulosi wakakhalanga mu nyumba ya musambiri Filipu, nchimi Agabo yikacenjezga Paulosi. Yikayowoya kuti Paulosi wazamukakika para wangaluta ku Yerusalemu. Vinthu vikacitika ndendende umo nchimi yikayowoyera. Pamanyuma pake, wati wakhala mu jere vilimika viŵiri mu Kesareya, Paulosi wakatumizgika ku Roma kuti wakeruzgike na Kesare, muwusi wa Roma. Tiye tiwone ico cikacitika apo wakalutanga ku Roma.

Milimo cipaturo 19 mupaka 26.



Mafumbo

  • Pa cithuzithuzi apa, kasi musepuka uyo wagona pasi ni njani, ndipo nchivici ico camucitikira?
  • Kasi Petrosi wakacitaci apo wakawona kuti msepuka wafwa?
  • Kasi Paulosi, Timote, na awo ŵakaŵa nawo ŵakalutanga nkhu, ndipo nchivici ico cikacitika apo ŵakapumura pa Mileto?
  • Kasi nchimi Agabo yikamucenjezgaci Paulosi, ndipo ni vici ivyo vikacitika nga ni umo nchimi yikayowoyera?

Mafumbo ghanyake

  • Ŵazgani Milimo 20:7-38.

    Kasi tingacita wuli kuti tilutilire kuŵa ‘ŵambura cifukwa ca ndopa za wose,’ mwakuyana na mazgu gha Paulosi agho ghali kulembeka pa Milimo 20:26.27? (Ezek. 33:8; Mil. 18:6, 7)

    Cifukwa wuli ŵalara ŵa mpingo ŵakwenera ‘kukoreska mazgu ghakugomezgeka’ para ŵakusambizga? (Mil. 20:17, 29, 30; Tito 1:7-9; 2 Tim. 1:13)

  • Ŵazgani Milimo 26:24-32.

    Pakuŵa Muroma, kasi Paulosi wakacita wuli kuti wafiske nchito yake ya kupharazga makani ghawemi iyo wakapika na Yesu? (Mil. 9:15; 16:37, 38; 25:11, 12; 26:32; Luka 21:12, 13)