Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 108: Pa Msewu Wakuya ku Damaseko

Nkhani Nambara 108: Pa Msewu Wakuya ku Damaseko

Kasi ukumumanya munthu uyo wagona pasi? Zina lake ni Saulosi. Kumbukira kuti, ndiyo wakasunga mikhanjo ya ŵanalume awo ŵakadinyanga Stefano na malibwe. Wona ungweru wakunyezimira comene uwu! Kasi nchivici ico cikucitika?

Pamanyuma pakuti Stefano wakomeka, Saulosi ndiyo wakalongozganga ŵanthu kupenja na kukoma ŵalondezgi ŵa Yesu. Wakalutanga ku nyumba na nyumba kuŵakora na kukaŵaŵika mu jere. Ŵasambiri ŵanandi ŵakacimbilira ku misumba yinyake ndipo ŵakamba kupharazga “makani ghawemi” kwenekuko. Kweni Saulosi wakalutanga ku misumba yinyake kuti wakapenje ŵasambiri ŵa Yesu. Apa wakaŵa pa ulendo wakuya ku Damaseko. Kweni wacali mu nthowa, cinthu cakuziziswa ici cikacitika:

Mwamabuci ungweru wakufuma kucanya ukamuŵalira Saulosi. Wakawa pasi, nga ni umo ukuwonera apa. Pamanyuma pake kukapulikikwa mazgu kuyowoya kuti: ‘Saulosi, Saulosi! Kasi ukunisuzgiraci?’ Ŵanalume awo ŵakaŵa na Saulosi ŵakawuwona ungweru ndiposo ŵakaghapulika mazgu, kweni ŵakapulikiska yayi ivyo vikayowoyekanga.

Paulosi wakutondeka kulaŵiska cifukwa ca ungweru

‘Ndimwe njani, Fumu?’ Wakafumba ntheura Saulosi.

‘Ndine Yesu, uyo ukumusuzga,’ ghakapulikikwa ntheura mazgu. Yesu wakayowoya nthena cifukwa cakuti apo Saulosi wakasuzganga ŵalondezgi ŵake, Yesu wakajipulikanga nga kuti ndiyo wakusuzgika.

Saulosi wakafumba kuti: ‘Kasi niciteci, Fumu?’

‘Wuka ndipo ulute ku Damaseko,’ wakayowoya ntheura Yesu. ‘Para wafika wamuphalirika cakuti ucite.’ Peneapo Saulosi wakati wawuka na kujura maso ghake, wakawonanga kalikose cara. Wakaŵa munthu wambura kuwona! Mwantheura ŵanalume awo ŵakaŵa nayo ŵakamukora pa woko na kuluta nayo ku Damaseko.

Yesu wakayowoya na yumoza wa ŵasambiri ŵake uyo wakakhalanga ku Damaseko, wakati: ‘Hananiya wuka. Uye ku nthowa yakuzunurika Yakunyoroka, ndipo mu nyumba ya Yuda ukafumbilire munthu zina lake Saulosi. Namusankha kuti waŵe muteŵeti wane wapadera.’

Hananiya wakapulikira. Wakati wakumana nayo Saulosi, wakaŵika mawoko ghake pa iyo, wakati: ‘Fumu yandituma mwakuti uwoneso, ndipo uzure na mzimu utuŵa.’ Ndipo penepapo mu maso gha Saulosi mukafuma vinthu ivyo vikawonekanga nga ni mamba, ndipo wakambaso kuwona.

Saulosi wakagwiliskirika nchito mu nthowa yapadera pa kupharazga ku ŵanthu ŵa mitundu yakupambanapambana. Wakamanyikwa na zina lakuti mpositole Paulosi, mweneuyo tisambirenge vinandi vyakukhwaskana na iyo. Kweni cakwamba, tiye tiwone ivyo Ciuta wakatuma Petrosi kuti wacite.

Milimo 8:1-4; 9:1-20; 22:6-16; 26:8-20.



Mafumbo

  • Pamanyuma pakuti Stefano wakomeka, kasi Saulosi wakacita vici?
  • Peneapo Saulosi wakaŵa pa ulendo wakuya ku Damaseko, nchinthu wuli cakuziziswa ico cikacitika?
  • Kasi Yesu wakaphalira Saulosi kuti wacite vici?
  • Kasi Yesu wakamuphalira vici Hananiya, ndipo nchivici cikacitika kuti Saulosi wambe kuwona?
  • Kasi Saulosi wakamba kumanyikwa na zina wuli, ndipo wakapika mulimo wuli?

Mafumbo ghanyake

  • Ŵazgani Milimo 8:1-4.

    Nthambuzgo iyo yikawira mpingo uphya wa Cikhristu yikawovwira wuli kuti Cikhristu cithandazgike, ndipo nchinthu wuli cakuyana na ici ico cikucitika mu nyengo yithu? (Mil. 8:4; Yes. 54:17)

  • Ŵazgani Milimo 9:1-20.

    Kasi Yesu wakavumbura milimo yitatu nji iyo wakakhumbanga kuti Saulosi wacite? (Mil. 9:15; 13:5; 26:1; 27:24; Rom. 11:13)

  • Ŵazgani Milimo 22:6-16.

    Kasi tingacita wuli kuti tiŵe nga ni Hananiya, ndipo nchifukwa wuli kucita nthena nkhwakuzirwa? (Mil. 22:12; 1 Tim. 3:7; 1 Pet. 1:14-16; 2:12)

  • Ŵazgani Milimo 26:8-20.

    Kasi kuphendukira ku Cikhristu uko Paulosi wakacita kukukhozga wuli awo mufumu wawo panji muwoli wawo ni Kaboni yayi? (Mil. 26:11; 1 Tim. 1:14-16; 2 Tim. 4:2; 1 Pet. 3:1-3)