Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 107: Stefano Wakadinyika na Malibwe

Nkhani Nambara 107: Stefano Wakadinyika na Malibwe

Mwanalume uyo wagwada pasi apa ni Stefano. Ni musambiri wakugomezgeka wa Yesu. Kweni wona ivyo vikumucitikira! Ŵanthu aŵa ŵakumudinya na malibwe ghakurughakuru. Cifukwa wuli ŵanthu aŵa ŵakumutinkha nthena Stefano mupaka kumucitira cinthu ciheni ici? Tiye tiwone.

Stefano ŵakumudinya na malibwe

Ciuta wakamovwiranga Stefano kucita vinthu vinandi vyakuziziswa. Ŵanthu aŵa ŵakakondwa navyo yayi, mwantheura ŵakamba kususkana nayo kuti waleke kusambizga ŵanthu unenesko. Kweni Ciuta wakamupa Stefano vinjeru vinandi, nakuti Stefano wakayowoya kuti ŵanthu aŵa ŵakasambizganga vinthu vyautesi. Ici cikaŵakwiyiska comene. Mwantheura ŵakamukora, na kucema ŵanthu kuti ŵamuyowoyere utesi.

Musofi mulara ŵakafumba Stefano kuti: ‘Kasi vinthu ivi ni vyaunenesko?’ Stefano wakazgora mwakuŵaphalira nkhani yiwemi iyo yikusangika mu Baibolo. Paumaliro wake, wakaŵaphalira umo ŵanthu ŵaheni ŵakatinkhira ŵateŵeti ŵa Yehova mu nyengo zakale. Pamanyuma pake wakati: ‘Imwe muli nga ŵanalume aŵa. Mukakoma Yesu muteŵeti wa Ciuta, ndipo mukupulikira cara malango gha Ciuta.’

Ici cikakwiyiska comene ŵalongozgi ŵa visopo! Ŵakathuthiranga mucanya cifukwa ca ukali. Kweni Stefano wakawuskira mucanya mutu wake, na kuyowoya kuti: ‘Wonani! Nkhuwona Yesu wimilira ku woko la maryero la Ciuta kucanya.’ Ŵakati ŵapulika ivi, ŵanalume aŵa ŵakajara makutu ghawo na mawoko na kucimbilira kwa Stefano. Ŵakamukora na kumukunkhuzgira kuwaro kwa msumba.

Ŵakavura mikhanjo yawo na kumupa mwanalume munyake muwukirano zina lake Saulosi kuti waŵasungire. Kasi wamuwona Saulosi? Pamanyuma pake ŵanalume ŵanyake ŵakamba kudinya Stefano na malibwe. Stefano wakagwada pasi, nga ni umo ukuwonera, ndipo wakalomba kwa Ciuta kuti: ‘Yehova mungaŵalanganga ŵanthu aŵa yayi cifukwa ca cinthu ciheni ici.’ Stefano wakamanya kuti ŵanji ŵa iwo ŵakapusikika waka na ŵalongozgi ŵa cisopo. Wakati wamara kuyowoya mazgu agha, Stefano wakafwa.

Para munthu munyake wakucitira cinthu ciheni, kasi ukuwezgera, panji ukupempha Ciuta kuti wamulange? Stefano panji Yesu ŵakacita nthena yayi. Ŵakalongoranga lusungu nanga nkhu ŵanthu awo ŵakaŵacitiranga nkhaza. Tiye tiyezgeyezge kulondezga ciyelezgero cawo.

Milimo 6:8-15; 7:1-60.



Mafumbo

  • Kasi Stefano wakaŵa njani, ndipo Ciuta wakamovwiranga kucita vici?
  • Kasi Stefano wakayowoya vici ivyo vikakwiyiska ŵalongozgi ŵa cisopo?
  • Peneapo ŵanalume ŵakamukunkhuzgira Stefano kuwaro kwa msumba, kasi ŵakacita nayo vici?
  • Pa cithuzithuzi apa, Kasi mwanalume muwukirano uyo wamilira pafupi na minjilira ni njani?
  • Pambere wandafwe, kasi Stefano wakalomba vici kwa Yehova?
  • Mwakuyana na umo Stefano wakacitira, kasi ise tikwenera kucitaci para munthu munyake waticitira cinthu ciheni?

Mafumbo ghanyake

  • Ŵazgani Milimo 6:8-15.

    Kasi ni mautesi wuli agho ŵalongozgi ŵa cisopo ŵakuyowoya kuti ŵalekeske nchito ya kupharazga ya Ŵakaboni ŵa Yehova? (Mil. 6:9, 11, 13)

  • Ŵazgani Milimo 7:1-60.

    Nchivici ico cikamovwira Stefano kuvikilira makani ghawemi pamaso pa Sanhedrin, ndipo tingasambirapo vici pa umo wakacitira? (Mil. 7:51-53; Rom. 15:4; 2 Tim. 3:14-17; 1 Pet. 3:15)

    Kasi tikwenera kuŵawona wuli ŵanthu awo ŵakususka mulimo withu? (Mil. 7:58-60; Mat. 5:44; Luka 23:33, 34)