Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 113: Apo Paulosi Wakaŵa ku Roma

Nkhani Nambara 113: Apo Paulosi Wakaŵa ku Roma

Wona unyoro uwo ŵakakira Paulosi, wonaso msilikari wa Roma uyo wakulaŵilira Paulosi. Paulosi ni mukayidi kuno ku Roma. Wakulindizga ico Kesare wa Roma walangurenge kuti wacite nayo. Nangauli wakaŵa mukayidi, ŵanthu ŵakazomerezgeka kuti ŵamuwonenge.

Mazuŵa ghatatu ghakati ghajumphapo kufuma apo Paulosi wakafikira ku Roma, wakatuma uthenga kuluta ku ŵalongozgi ŵanji ŵa Ŵayuda kuti ŵize kuzakamuwona. Lekani Ŵayuda ŵanandi awo ŵakakhalanga mu Roma ŵakiza. Paulosi wakaŵapharazgira za Yesu na ufumu wa Ciuta. Ŵanthu ŵanyake ŵakagomezga ndipo ŵakazgoka Ŵakhristu, kweni ŵanyake ŵakagomezga yayi.

Paulosi wali mu jere

Paulosi wakapharazgaso ku ŵasilikari ŵakupambanapambana awo ŵakamulaŵiliranga. Kwa vilimika viŵiri ivyo wakasungika nga ni mukayidi, Paulosi wakapharazga ku ŵanthu ŵanandi. Cifukwa ca kucita nthena, nanga ŵaŵe ŵanthu ŵa mu mbumba ya Kesare ŵakapulika makani ghawemi gha Ufumu, ndipo ŵanyake ŵakazgoka Ŵakhristu.

Kweni kasi mulendo uyo wali pa thebulu apa wakulemba ninjani? Kasi ungasacizga zina lake? Ni Timote. Timote nayo wakaŵikika mu jere cifukwa ca kupharazga Ufumu, kweni wakafwaturika. Wakiza kuno kuti wawovwire Paulosi. Kasi ukumanya ivyo Timote wakulemba? Tiye tiwone.

Kasi ukukumbukira misumba ya Filipi na Efeso iyo tikasambira mu Sambiro 110? Paulosi wakawovwira kuti mipingo ya Cikhristu yiyambike mu misumba iyi. Peneapo wakaŵa mu jere, Paulosi wakalemba makalata ghakuluta ku Ŵakhristu ŵa mu mipingo iyi. Makalata agha ghakusangika mu Baibolo, ndipo ghakucemeka Ŵaefeso na Ŵafilipi. Apa Paulosi wakuphalira Timote vyakuti walembere mabwezi gha Cikhristu agho ghali mu Filipi.

Ŵanthu ŵa ku Filipi ŵakamucitira lusungu comene Paulosi. Ŵakamutumizgira vyawanangwa mu jere, ndipo apa Paulosi wakuŵawonga. Munthu uyo wakiza na vyawanangwa ivi wakaŵa Epafurodito. Pa nyengo yinyake wakalwara comene ndipo wakakhala pacoko waka kuti wafwe. Wakati waŵa makora wakanozgeka kuluta kukwawo. Wakaluta ku Filipi na kalata iyo Paulosi na Timote ŵakalemba.

Apo wakaŵa wacali mu jere Paulosi wakalemba makalata ghanyake ghaŵiri gheneagho tili nagho mu Baibolo. Yinyake wakalembera Ŵakhristu ŵa mu msumba wa Kolose. Kasi zina la kalata iyi ukulimanya? Likucemeka Ŵakolose. Yinyake yikaŵa kalata yakuluta kwa mubwezi wake wapamtima Filemone, uyo nayo wakukhala mu Kolose. Kalata iyi yikuyowoya za muzga wa Filemone, Onesimo.

Onesimo wakamucimbira Filemone ndipo wakaluta ku Roma. Wali ku Roma, wakapulika za Paulosi kuti wali mu jere. Wakaluta kukamuwona, ndipo Paulosi wakamupharazgira Onesimo. Mwaluŵiro Onesimo wakazgoka Mkhristu. Onesimo wakaŵa na citima kuti wakamucimbira Filemone. Antheura kasi ukumanya ivyo Paulosi wakalemba mu kalata yakuluta kwa Filemone?

Paulosi wakapempha Filemone kuti wamugowokere Onesimo. ‘Namuwezgera kwa iwe,’ Paulosi wakalemba ntheura. ‘Iye sono ni muzga wako pera yayi. Kweniso ni mbali Wacikhristu wakutemweka.’ Apo Onesimo wakalutanga ku Kolose, wakaluta na makalata ghaŵiri agha, yimoza yikaŵa ya Ŵakolose, ndipo yinyake yikaŵa ya Filemone. Filemone wakwenera kuti wakakondwa comene kupulika kuti muzga wake wakazgoka Mkhristu.

Apo Paulosi wakalembanga kalata yakuluta ku Ŵafilipi na kwa Filemone, wakalemba za nkhani yakukondweska comene. ‘Nkhutuma Timote kwiza kwa imwe,’ Paulosi wakaphalira Ŵafilipi. ‘Nane nizenge luŵiro.’ Filemone wakamulembera kuti: ‘Uninozgere malo kuti nizakakhale nawe.’

Apo Paulosi wakasuturika wakaluta na kuwonana na ŵabali na ŵadumbu ŵake Ŵacikhristu mu vigaŵa vinandi. Kweni pamanyuma pake Paulosi ŵakamukakaso ukayidi mu Roma. Pa nyengo iyi wakamanya kuti wakomekenge. Antheura wakalembera kalata Timote kuti wize luŵiro uko kukaŵa iyo. ‘Naŵa wakugomezgeka kwa Ciuta,’ Paulosi wakalemba ntheura, ‘ndipo Ciuta wanisungira cawanangwa.’ Vilimika vicoko waka pamanyuma pakuti Paulosi wakomeka, msumba wa Yerusalemu ukabwangandulikaso, pa nyengo iyi ŵakabwangandura ni Ŵaroma.

Kweni mu Baibolo muli nkhani zinandi comene. Yehova Ciuta wakapangiska kuti mpositole Yohane walembe mabuku ghaumaliro, kusazgapo buku la Civumbuzi. Buku ili likutiphalira vinthu vyamunthazi. Sono tisambirenge ivyo vizamucitika kunthazi.

Milimo 28:16-31; Ŵafilipi 1:13; 2:19-30; 4:18-23; Ŵahebere 13:23; Filemone 1-25; Ŵakolose 4:7-9; 2 Timote 4:7-9.



Mafumbo

  • Kasi Paulosi wakapharazganga kwa njani apo wakaŵa mu jere ku Roma?
  • Pa cithuzithuzi apa, kasi mulendo uyo wali pa thebulu ni njani, ndipo wakumulembera vici Paulosi?
  • Kasi Epafurodito wakaŵa njani, ndipo wakaluta na vici apo wakaweleranga ku Filipi?
  • Cifukwa wuli Paulosi wakalembera kalata mubwezi wake wapamtima Filemone?
  • Kasi Paulosi wakacitaci wakati wasuturika, ndipo nchivici ico cikacitika pamanyuma pake?
  • Ni njani uyo Yehova wakamutuma kuti walembe mabuku ghaumaliro gha Baibolo, ndipo buku la Civumbuzi likutiphalira vici?

Mafumbo ghanyake

  • Ŵazgani Milimo 28:16-31 na Ŵafilipi 1:13.

    Apo Paulosi wakaŵa mu jere ku Roma, kasi wakacitanga vici, ndipo cipulikano cake cakukhora cikukhwaska wuli mpingo wa Cikhristu? (Mil. 28:23, 30; Fil. 1:14)

  • Ŵazgani Ŵafilipi 2:19-30.

    Ni mazgu wuli ghakuwonga Timote na Epafurodito agho Paulosi wakayowoya, ndipo tingalondezga wuli ciyelezgero cake? (Fil. 2:20, 22, 25, 29, 30; 1 Kor. 16:18; 1 Tes. 5:12, 13)

  • Ŵazgani Filemone 1-25.

    Kasi nchivici ico cikapangiska Paulosi kuciska Filemone kuti wacitenge vinthu vyakwenelera, ndipo ŵalara ŵa mpingo ŵakwenera kulondezga wuli ici? (File. 9; 2 Kor. 8:8; Gal. 5:13)

    Kasi mazgu gha Paulosi agho ghali pa Filemone 13, 14 ghakulongora wuli kuti wakacindikanga njuŵi za ŵanji mu mpingo? (1 Kor. 8:7, 13; 10:31-33)

  • Ŵazgani 2 Timote 4:7-9.

    Nga ni mpositole Paulosi, kasi tingaŵa wuli na cigomezgo kuti Yehova watitumbikenge usange tilutilirenge kugomezgeka mupaka kuumaliro? (Mat. 24:13; Heb. 6:10)