Lutani apo pali nkhani

Lutani pa menyu yachiŵiri

Lutani apo pali mitu ya nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 98: Pa Phiri la Olive

Nkhani Nambara 98: Pa Phiri la Olive

Uyu ni Yesu, wali pa phiri la Olive. Ŵanalume ŵanayi aŵa mbapositole ŵake. Iwo ni Petrosi na munung’una wake Andireya, ndiposo Yakobe na munung’una wake Yohane. Ilo ukuliwona ca patali ni tempele la Ciuta mu Yerusalemu.

Pajumpha mazuŵa ghaŵiri kufumira apo Yesu wakanjira mu Yerusalemu pa mwana wa mbunda. Pa zuŵa ili pakaŵa pa Ciŵiri. Kukwambilira kwa zuŵa ili, Yesu wakaŵa pa tempele. Kwenekura, ŵasofi wakakhumbanga kumukora kuti ŵamukome. Kweni ŵakawopa kumukoma cifukwa ŵanthu ŵakamutemwa Yesu.

Yesu na ŵapositole ŵake

Yesu wakaphalira ŵalongozgi ŵa cisopo ŵara kuti: ‘Njoka imwe na ŵana ŵa njoka!’ Yesu wakaŵaphalira kuti Ciuta waŵalangenge cifukwa ca mauheni ghose agho ŵacita. Pamanyuma pake Yesu wakaluta ku Phiri la Olive, ndipo wakati wafika, ŵapositole ŵanayi ŵakamba kumufumba mafumbo. Kasi ukumanya ivyo ŵakamufumba Yesu?

Ŵapositole ŵakafumba vinthu vyamunthazi. Ŵakamanya kuti Yesu wazamumazga uheni wose pa caru capasi. Kweni ŵakakhumbanga kumanya nyengo apo vinthu ivi vizamucitikira. Kasi Yesu wizengeso pawuli kuzakawusa nga ni Fumu?

Yesu wakamanya kuti ŵalondezgi ŵake pa caru capasi ŵazamumuwona cara pa nyengo iyo wazamwizaso. Ici nchifukwa cakuti wazamuŵa kucanya, ntheura ŵazamutondeka kumuwona. Cifukwa ca ici Yesu wakaphalira ŵapositole ŵake vinthu vinyake ivyo vizamucitika pa caru capasi para iyo wayamba kuwusa nga ni Fumu kucanya. Kasi vinyake mwa vinthu ivi ni vici?

Yesu wakati kuzamuŵa nkhondo, ŵanthu ŵanandi ŵazamuŵa ŵalwari, ŵanjara, kuswa malango kuzamuŵa palipose, ndiposo kuzamuŵa vindindindi vikuru. Yesu wakayowoyaso kuti makani ghawemi gha ufumu wa Ciuta ghazamupharazgika pa caru cose capasi. Kasi vinthu ivi tikuviwona vikucitika mu nyengo yithu? Enya! Ntheura tingaŵa ŵakusimikizga kuti Yesu sono wakuwusa kucanya. Sonosono apa wawuskengepo uheni wose pa caru capasi.

Mateyu 21:46; 23:1-39; 24:1-14; Marko 13:3-10.



Mafumbo

  • Pa cithuzithuzi apa, kasi Yesu ni nju, ndipo wali na njani?
  • Kasi ŵasofi wakakhumbanga kucita vici na Yesu mu tempele, ndipo wakaŵaphaliraci?
  • Kasi ŵapositole ŵakamufumba vici Yesu?
  • Cifukwa wuli Yesu wakaphalira ŵapositole ŵake vinthu vinyake ivyo vizamucitika pa caru capasi para iyo wayamba kuwusa nga ni Fumu kucanya?
  • Ni vinthu wuli ivyo Yesu wakati vizamucitika pambere wandamazge uheni wose pa caru capasi?

Mafumbo ghanyake

  • Ŵazgani Mateyu 23:1-39.

    Nangauli Malemba ghakuyowoya kuti mazina ghakulongora udindo wa munthu ghangaŵa ghakwenelera, kasi ivyo Yesu wakayowoya pa Mateyu 23:8-11 vikulongoraci za kumanyikwa na mazina agho ghakulongora udindo wa munthu mu mpingo wa Cikhristu? (Mil. 26:25; Rom. 13:7; 1 Pet. 2:13, 14)

    Kasi Ŵafarisi ŵakatondeskanga wuli ŵanthu kuti ŵaŵe Ŵakhristu, ndipo ŵalongozgi ŵa visopo ŵakulondezga wuli kacitiro aka mazuŵa ghano? (Mat. 23:13; Luka 11:52; Yoh. 9:22; 12:42; 1 Tes. 2:16)

  • Ŵazgani Mateyu 24:1-14.

    Kasi lemba la Mateyu 24:13 likudidimizga wuli kuzirwa kwa kuzizipizga?

    Kasi lizgu lakuti “ku umaliro” ilo lili pa Mateyu 24:13 likung’anamuraci? (Mat. 16:27; Rom. 14:10-12; 2 Kor. 5:10)

  • Ŵazgani Marko 13:3-10.

    Pa lemba la Marko 13:10, ni lizgu wuli ilo likulongora kukhumbikwa kwa kupharazga makani ghawemi mwamwamphu, ndipo mazgu agho Yesu wakayowoya ghakwenera kutikhwaska wuli? (Rom. 13:11, 12; 1 Kor. 7:29-31; 2 Tim. 4:2)

Manyani Vinandi

YESU NI NTHOWA, UNENESKO, NA UMOYO

Ŵapositole Ŵakapempha Chimanyikwiro

Uchimi wake ukamba kufiskika mu nyengo ya ŵapositole. Kasi ukaŵa wakuti uzamufiskikaso chomene kunthazi?

GONGWE LA MULINDA

Kasi Umaliro Uli Pafupi?

Wonani vinthu vinayi ivyo Baibolo likulongosora kuti ntchimanyikwiro cha umaliro.