Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 97: Yesu Wakanjira Nga ni Fumu

Nkhani Nambara 97: Yesu Wakanjira Nga ni Fumu

Pati pajumpha nyengo yicoko waka wati wacizga ŵaciburumutira ŵaŵiri, Yesu wakaluta ku cikaya cinyake pafupi na Yerusalemu. Wakaphalira ŵasambiri ŵake ŵaŵiri kuti: ‘Lutani mu cikaya ndipo mwamusanga mwana wa mbunda. Mukamusuture na kwiza nayo kwa ine.’

Ŵati ŵiza nayo mwana wa mbunda, Yesu wakakwerapo. Wakaluta nayo ku msumba wa Yerusalemu. Wati wafika pafupi na Yerusalemu, wumba ukuru wa ŵanthu ukiza kuti ukumane nayo. Ŵanandi ŵa iwo ŵakavura minjilira yawo na kuyiŵika mu nthowa. Ŵanyake ŵakadumura minthavi ya makuni na kuyiŵika mu nthowa. Iwo Ŵakacemerezga kuti: ‘Ngwakucindikika uyo wakwiza mu zina la Yehova!’

Ŵanthu ŵakupokelera Yesu

Nyengo zakale mu Israyeli, mafumu ghaphya ghakanjiranga mu Yerusalemu uku ghakwera pa mwana wa mbunda kuti ghajilongore ku ŵanthu. Ici ndico Yesu wakacita. Ndipo ŵanthu aŵa ŵakalongora kuti ŵakakhumbanga kuti Yesu waŵe fumu yawo. Kweni ni ŵanthu wose yayi awo ŵakakhumbanga. Tingawona ici mwakuwona ivyo vikacitika Yesu wati waluta ku tempele.

Mu tempele Yesu wakacizga ŵanthu ŵaciburumutira na ŵakupendera. Ŵana ŵacoko ŵati ŵawona ici, ŵakamba kulumba Yesu. Kweni ici cikakwiyiska ŵasofi, ndipo ŵakaphalira Yesu kuti: ‘Kasi ukupulika ivyo ŵana ŵakuyowoya?’

‘Enya, nkhupulika,’ Yesu wakazgora ntheura. ‘Kasi mulije kuŵazga mu Baibolo apo pakuti: “Mu milomo ya ŵana ŵa bonda Ciuta wazamunozga malumbo?”’ Ntheura ŵana ŵakalumba fumu iyo Ciuta wakayimika.

Tikukhumba kuŵa nga ni ŵana aŵa, asi nthena? Ŵanthu ŵanyake ŵangayezga kutikanizga kuti tileke kuyowoya za ufumu wa Ciuta. Kweni tilutilirenge nipera kuphalira ŵanyithu vinthu vyakuziziswa ivyo Yesu wazamucitira ŵanthu.

Apo Yesu wakaŵa pa caru capasi, nyengo yikaŵa kuti yindafike yakuti wayambe kuwusa. Kasi nyengo iyi yizamufika pauli? Ŵasambiri ŵa Yesu ŵakakhumba kumanya. Tisambirenge za ici mu nkhani yakulondezgapo.

Mateyu 21:1-17; Yohane 12:12-16.



Mafumbo

  • Peneapo Yesu wakaluta ku cikaya cinyake pafupi na Yerusalemu, kasi wakaphalira ŵasambiri ŵake kuti wacite vici?
  • Pa cithuzithuzi apa, kasi cikacitika nchivici apo Yesu wakafika pafupi na msumba wa Yerusalemu?
  • Kasi ŵana ŵacoko ŵakacita vici ŵati ŵawona Yesu wakucizga ŵanthu ŵaciburumutira na ŵakupendera?
  • Kasi Yesu wakaŵaphalira vici ŵasofi awo ŵakakwiya kwa zanimuwone?
  • Kasi tingacita wuli kuti tiŵe nga ni ŵana awo ŵakalumba Yesu?
  • Kasi ŵasambiri ŵakakhumbanga kuti ŵamanye vici?

Mafumbo ghanyake

  • Ŵazgani Mateyu 21:1-17

    Ni mphambano wuli iyo yikaŵapo umo Yesu wakanjilira mu Yerusalemu nga ni Fumu na umo ŵakanjiliranga ŵalongozgi ŵa ŵasilikari wa Ciroma? (Mat. 21:4, 5; Zek. 9:9; Fil. 2:5-8; Kol. 2:15)

    Kasi ŵana ŵangasambira vici kufuma ku ŵana Ŵaciisrayeli awo wakazunura mazgu gha mu buku la Salmo 118, apo Yesu wakanjiranga mu tempele? (Mat. 21:9, 15; Sal. 118:25, 26; 2 Tim. 3:15; 2 Pet. 3:18)

  • Ŵazgani Yohane 12:12-16.

    Kasi kugwiliskira nchito mahamba gha vinchindo uko ŵanthu wakacita pa kulumba Yesu kukayimira vici? (Yoh. 12:13; Fil. 2:10; Civ. 7:9, 10)

Manyani Vinandi

Themba Likanjira mu Yerusalemu pa Mwana wa Mbunda

Wakafiska uchimi uwo ukayowoyeka vyaka 500 kumasinda.