Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 95: Umo Yesu Wakasambizgiranga

Nkhani Nambara 95: Umo Yesu Wakasambizgiranga

Zuŵa linyake Yesu wakaphalira mwanalume munyake kuti wakwenera kutemwa muzengezgani wake. Mwanalume uyu wakafumba Yesu kuti: ‘Kasi muzengezgani wane ninjani?’ Yesu wakamanya ico munthu uyu wakaghanaghananga. Wakaghanaghananga kuti ŵanthu ŵa fuko lake pera na cisopo ndiwo mbazengezgani ŵake. Ntheura tiye tiwone ivyo Yesu wakamuphalira.

Nyengo zinyake Yesu wakasambizganga mwakuyowoya ntharika. Ici ndico pa nyengo iyi Yesu wakacita. Wakayowoya ntharika yakukhwaskana na Muyuda na Musamariya. Tasambira kale kuti Ŵayuda ŵanandi ŵakatinkhanga Ŵasamariya. Ntharika ya Yesu ni iyi:

Zuŵa linyake Muyuda munyake wakikhanga kuya ku Yeriko. Kweni ŵankhungu ŵakamulotokera. Ŵakamupoka ndarama zake na kumutimba mupaka pafupi kufwa.

Khalekhale, musofi Waciyuda wakendanga mu nthowa yeneyiyi. Wakamuwona munthu wakutimbika yura. Kasi ukughanaghana kuti wakacitapo vici? Iye wakamugega na kuluta. Ndipo musopi munyake wakiza. Wakaŵa Mulevi. Kasi wakimilira? Yayi, nayoso wakimilira yayi kuti wawovwire munthu uyo wakatimbika. Ungawona musofi na Mulevi ca patali pa cithuzithuzi apa ŵakwenda mu nthowa.

Kweni wona uyo wali apa na munthu wakutimbika. Ni Musamariya. Wakovwira Muyuda. Wakumuphaka munkhwara pa vilonda vyake. Pamanyuma pake, wakatora Muyuda na kuluta nayo ku malo uko wakapumura na kuŵa makora.

Musamariya muwemi

Wati wamalizga kuyowoya ntharika yake, Yesu wakufumba munthu yura wakamufumba fumbo kuti: ‘Kasi ni njani pakati pa ŵanthu ŵatatu aŵa uyo wakaŵa muzengezgani wa munthu wakutimbika uyu? Kasi wakaŵa musofi, Mulevi panji Musamariya?’

Munthu yura wakazgora kuti: ‘Musamariya, cifukwa wakalengera lusungu munthu wakutimbika.’

Yesu wakati: ‘Wazgora makora. Ntheura lutanga nawe ukacitenge mwakuyana waka.’

Kasi ukutemwa yayi umo Yesu wakasambizgiranga? Tingasambira vinthu vinandi comene usange tikupulikira ivyo Yesu wakuyowoya mu Baibolo, kasi ni nthena yayi?

Luka 10:25-37.



Mafumbo

  • Kasi mwanalume munyake wakafumba Yesu fumbo lakuti mbu, ndipo cifukwa wuli?
  • Nyengo zinyake Yesu wakasambizganga mwakuyowoyaci, ndipo ni vici ivyo tasambira vyakukhwaskana na Ŵayuda na Ŵasamariya?
  • Mu nkhani iyo Yesu wakayowoya, nchivici ico cikacitikira Muyuda uyo wakikhanga kuya ku Yeriko?
  • Kasi cikacitika nchivici apo musofi Waciyuda ndiposo Mulevi ŵakendanga mu nthowa yeneyiyo?
  • Pa cithuzithuzi apa, kasi ni njani uyo wakovwira Muyuda uyo watimbika?
  • Wati wamalizga kuyowoya ntharika yake, kasi Yesu wakafumba fumbo wuli, ndipo mwanalume yura wakazgora mbu?

Mafumbo ghanyake

  • Ŵazgani Luka 10:25-37.

    M’malo mwa kuzgora mwakudunjika, kasi Yesu wakawovwira wuli mwanalume wakumanya Malango kuti waghanaghanire makora nkhani iyi? (Luka 10:26; Mat. 16:13-16)

    Nchifukwa wuli Yesu wakayowoyanga ntharika kuti wamazge ukhaliro wakutemwera uwo ukaŵa pakati pa ŵapulikizgi ŵake? (Luka 10:36, 37; 18:9-14; Tito 1:9)

Manyani Vinandi

Musamariya Wakaŵa Mzengezgani Muwemi

Kasi Yesu wakasambizga vichi mu ntharika ya “Musamariya muwemi”?

Mwana Wakuzgeŵa Wawera

Kasi ntharika ya Yesu ya mwana wakuzgeŵa yikutisambizga vichi?