Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 90: Na Mwanakazi pa Cisimi

Nkhani Nambara 90: Na Mwanakazi pa Cisimi

Yesu wakakhala pasi kuti wapumure pafupi na cisimi mu Samariya. Ŵasambiri ŵake ŵakaluta mu muzi kuti ŵakagule vyakurya. Mwanakazi uyo Yesu wakuyowoya nayo wiza kuti wazakateke maji. Yesu wakati kwa iyo: ‘Nipako maji ndimwe.’

Yesu wakuyowoya na mwanakazi Musamariya

Ici cikaziziswa comene mwanakazi uyu. Kasi ukumanya cifukwa cake? Nchifukwa cakuti Yesu ni Muyuda ndipo mwanakazi uyu ni Musamariya. Ŵayuda ŵanandi ŵakaŵatemwanga yayi Ŵasamariya. Nanga kungaŵa kuyowoya nawo ŵakakhumbanga yayi! Kweni Yesu wakatemwanga ŵanthu ŵa mitundu yose. Ntheura wakati: ‘Umanyenge munthu uyo wakukulomba maji, mphanyi iwe ndiwe watenge umulombenge ndipo iyo watenge wakupenge maji gha umoyo.’

Mwanakazi wakati: ‘Fumu, cisimi nchitali comene, ndipo mulije nanga nchakutekera maji wuwo. Kasi mughatorenge nkhu maji gha umoyo?’

‘Usange wamwa maji gha mu cisimi ici womirwengeso,’ Yesu wakati ntheura. ‘Kweni maji agho ine nkhupeleka ghangapangiska munthu kukhala kwamuyirayira.’

Mwanakazi uyu wakati: ‘Fumu, nipaniko maji agha! Ntheura kuti nileke komirwaso. Ndiposo nilekenge kwiza kuno kuzakateka maji.’

Mwanakazi uyu wakaghanaghana kuti Yesu wakuyowoya za maji gheneco. Kweni Yesu wakayowoyanga za unenesko wakukhwaskana na Ciuta na ufumu wake. Unenesko uwu uli nga ni maji ghakupeleka umoyo. Ungapeleka umoyo wamuyirayira ku munthu.

Sono Yesu wakaphalira mwanakazi uyu kuti: Luta ukaceme mfumu wako ndipo ukizeso.’

Mwanakazi wakazgora kuti: ‘Nilije mfumu.’

Yesu wakati: ‘Wazgora makora. Kweni uli kutengwapo ku ŵanalume ŵankhondi, ndipo uyo wuli nayo sono kuti ni mfumu wako cara.’

Mwanakazi uyu wakazizwa, cifukwa vyose ivi mbunenesko nadi. Kasi Yesu wakamanya wuli vinthu vyose ivi? Nchifukwa cakuti Yesu ni Munthu uyo wakayowoyeka na Ciuta kuti wizenge, ndipo Ciuta ndiyo wakamuphaliranga vinthu ivi. Pa nyengo iyi ŵasambiri ŵa Yesu ŵakawerako uko ŵakaya, ndipo ŵakazizwa kuti wakayowoyanga na mwanakazi Musamariya.

Kasi tikutorapo sambiro wuli pa vinthu vyose ivi? Cikulongora kuti Yesu ngwalusungu ku ŵanthu ŵa mafuko ghose. Ndipo ise nase ndimo tikwenera kuŵira. Tikwenera cara kughanaghana kuti ŵanthu ŵanyake mbaheni cifukwa cakuti mba fuko linyake. Yesu wakukhumba kuti ŵanthu wose ŵamanye unenesko uwo ukulongozgera ku umoyo wamuyirayira. Ndipo nase tikwenera kuŵa ŵakukhumbisiska kovwira ŵanthu kuti ŵasambire unenesko.

Yohane 4:5-43; 17:3.



Mafumbo

  • Cifukwa wuli Yesu wakhala pasi pafupi na cisimi mu Samariya, ndipo wakuyowoyaci na mwanakazi uyu?
  • Cifukwa wuli mwanakazi wakazizwa, Yesu wakamuphalira vici, ndipo cifukwa wuli?
  • Kasi mwanakazi uyu wakaghanaghana kuti Yesu wakuyowoya za maji wuli, kweni Yesu wakang’anamuranga maji wuli?
  • Cifukwa wuli mwanakazi wakazizwa kuti Yesu wakamumanya makora, ndipo Yesu wakamanya wuli vinthu ivi?
  • Kasi nkhani ya mwanakazi uyo Yesu wakakumana nayo pa cisimi yikutisambizgaci?

Mafumbo ghanyake

  • Ŵazgani Yohane 4:5-43.

    Mwakulondezga ciyelezgero ca Yesu, kasi tikwenera kuŵawona wuli ŵanthu ŵa mafuko ghanyake? (Yoh. 4:9; 1 Kor. 9:22; 1 Tim. 2:3, 4; Tito 2:11)

    Ni maphindu wuli ghauzimu agho munthu uyo ni musambiri wa Yesu wakusanga? (Yoh. 4:14; Yes. 58:11; 2 Kor. 4:16)

    Kasi tingalondezga wuli ivyo wakacita mwanakazi wa ku Samariya, uyo wakakhumbisiska kuphalira ŵanji ivyo wakasambira? (Yoh. 4:7, 28; Mat. 6:33; Luka 10:40-42)

Manyani Vinandi

Wakasambizga Mwanakazi Musamariya

Yesu wakamuphalira chinthu icho wakaŵa kuti wandaphalirepo munthu waliyose.