Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 94: Wakutemwa Ŵana

Nkhani Nambara 94: Wakutemwa Ŵana

Wona Yesu apa wakora mwana musepuka. Nawe ungawona kuti Yesu wakutemwa nadi ŵana. Ŵanalume awo ŵakulaŵilira mbasambiri ŵake. Kasi Yesu wakuŵaphalira vici? Tiye tiwone.

Yesu na ŵapositole ŵake ŵakiza waka kufuma ku ulendo utali. Ŵapositole ŵakapindananga mu nthowa. Ntheura ŵati ŵafika Yesu wakaŵafumba kuti: ‘Kasi mwapindanangaci mu nthowa?’ Mwambura kukayika, Yesu wakamanya ico ŵakapindananga. Kweni wakafumba kuti wawone usange ŵapositole ŵamuphalirenge.

Yesu na mwana

Ŵapositole ŵakazgora yayi, cifukwa mu nthowa ŵakapindananga za uyo ngwakuzirwa pakati pawo. Ŵapositole ŵanyake ŵakakhumba kuŵa ŵakuzirwa kuluska ŵanyawo. Kasi Yesu wakaŵaphalira wuli kuti mbuwemi yayi kukhumba kuŵa wakuzirwa kuluska ŵanji?

Wakacema musepuka mucoko na kumwimika panthazi pawo. Wakaphalira ŵasambiri ŵake kuti: ‘Nkhukhumba kuti imwe mumanye ici kuti, kwambura kuti mwasintha na kuŵa nga ni twana tucoko, mwamunjira yayi mu ufumu wa Ciuta. Mukuru mu ufumu wakucanya ni uyo wakujipepura nga ni mwana uyu.’ Kasi ukumanya cifukwa ico Yesu wakayowoyera nthena?

Ŵana ŵacoko ŵakwenjerwa yayi za kuŵa mukuru panji wakuzirwa kuluska ŵanji. Ntheura ŵapositole ŵakenera kusambira kuŵa nga ni ŵana mu nthowa iyi na kuleka kupindana za uyo ni mukuru panji wakuzirwa.

Paliso nyengo zinyake apo Yesu wakalongora kuti wakapwelelera comene ŵana. Pati pajumpha myezi yicoko waka, ŵanthu ŵakiza na ŵana ŵawo kwa Yesu. Ŵapositole ŵakaŵakanizganga. Kweni Yesu wakaphalira ŵapositole ŵake kuti: ‘Ŵalekani ŵana ŵize kwa ine, mungaŵakanizganga yayi, cifukwa ufumu wa Ciuta ngwa ŵanthu wantheura.’ Pamanyuma pake Yesu wakatora ŵana na kuŵapakata na kuŵatumbika. Kasi nchakukondweska yayi kumanya kuti Yesu wakutemwa ŵana?

Mateyu 18:1-4; 19:13-15; Marko 9:33-37; 10:13-16.



Mafumbo

  • Kasi ŵapositole ŵakapindananga vici mu nthowa apo ŵakafumanga ku ulendo utali?
  • Cifukwa wuli Yesu wakacema musepuka mucoko na kumwimika panthazi pa ŵapositole?
  • Kasi ŵapositole ŵakenera kusambira vici kuti ŵaŵe nga ni ŵana?
  • Pati pajumpha myezi yicoko waka, kasi Yesu wakalongora wuli kuti wakutemwa ŵana?

Mafumbo ghanyake

  • Ŵazgani Mateyu 18:1-4.

    Cifukwa wuli Yesu wakayowoyanga ntharika pakusambizga? (Mat. 13:34, 36; Mrk. 4:33, 34)

  • Ŵazgani Mateyu 19:13-15.

    Kasi ni mikhaliro wuli ya ŵana iyo tikwenera kulondezga usange tikukhumba kuti tisange vitumbiko vya Ufumu? (Sal. 25:9; 138:6; 1 Kor. 14:20)

  • Ŵazgani Marko 9:33-37.

    Kasi Yesu wakasambizga vici ŵasambiri ŵake pa nkhani yakukhumba kuŵa wakuzirwa? (Mrk. 9:35; Mat. 20:25, 26; Gal. 6:3; Fil. 2:5-8)

  • Ŵazgani Marko 10:13-16.

    Nchifukwa wuli ŵanthu ŵakawopanga yayi kwiza kwa Yesu, ndipo Ŵalara ŵa mpingo ŵangasambirapo vici kwa iyo? (Mrk. 6:30-34; Fil. 2:1-4; 1 Tim. 4:12)

Manyani Vinandi

Wakasambizga vya Kupatana na Kutemwa Ŵana

Umo Yesu wakachitiranga na ŵana vikapambananga na ŵasambiri ŵake. Chifukwa wuli?