Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 93: Yesu Wakaryeska Ŵanthu Ŵanandi

Nkhani Nambara 93: Yesu Wakaryeska Ŵanthu Ŵanandi

Cinthu cinyake cakofya cikacitika. Yohane Mbapatizi wakaŵa kuti wakomeka waka. Herodiya, muwoli wa fumu, wakamutemwanga yayi. Ndipo wakapangiska fumu kuti yidumure mutu wa Yohane.

Yesu wati wapulika ici, wakaŵa na citima comene. Wakaluta na kukakhala kwayekha. Kweni ŵanthu ŵakamulondezga. Yesu wati wawona wumba, wakawulengera lusungu. Ntheura wakayowoya nawo za ufumu wa Ciuta na kucizga ŵalwari ŵawo.

Kukati kwafipa ŵasambiri ŵake ŵakiza kwa iyo na kuyowoya nayo kuti: ‘Pano mpha mapopa, ndipo zuŵa nalo lanjira kale. Ŵawezgani ŵanthu mwakuti ŵalute kukajigulira vyakurya mu mizi ya pafupi.’

Yesu wakulyeska mzinda

‘Nchakwenelera yayi kuti ŵalute,’ Yesu wakazgora nthena. ‘Ŵapani vyakurya.’ Yesu wakazgokera kwa Filipu na kumufumba kuti: ‘Kasi tingakagula nkhu vyakurya kuti vikwane ŵanthu wose aŵa?’

Filipu wakuzgora kuti: ‘Pakukhumbikwira ndarama zinandi kuti tigule vyakurya vyakukwanira ŵanthu wose aŵa.’ Andireya wakacemerezga kuti: ‘Musepuka pano wali na vingwa vinkhonde na somba ziŵiri. Kweni vingakwana yayi ŵanthu wose aŵa.’

Yesu wakati: ‘Ŵaphalirani ŵanthu kuti ŵakhale pasi pa utheka.’ Ntheura wakawonga Ciuta cifukwa ca cakurya na kwamba kumenya mu viduswa. Wati wamara kumenya, ŵasambiri ŵake ŵakapeleka vingwa na somba ku ŵanthu wose. Pakaŵa ŵanalume 5,000, na ŵanakazi na ŵana ŵanandi. Wose ŵakarya mupaka kukhuta. Ndipo ŵasambiri ŵati ŵawunjika ivyo vyakhalako, pakaŵa vidunga 12 vyakuzura!

Sono Yesu wakaphalira ŵasambiri ŵake kunjira mu boti kuti ŵambuke Nyanja ya Galileya. Nausiku mphepo yikuru yikamba kuputa, ndipo majigha ghakapangiska boti kuya uku na uku. Ŵasambiri ŵakaŵa na wofi comene. Ndipo pakati pa usiku, ŵakawona munthu munyake wakwenda pa nyanja kwiza uko kuli iwo. Ŵakakoromoka cifukwa ca wofi, pakuti ŵakamanya yayi ico ŵakawonanga.

Yesu wakati: ‘Lekani kopa, ndine!’ Kweni ŵakagomezga yayi nipera. Ntheura Petrosi wakati: ‘Fumu, usange ndimwe nadi, muniphalire nane nende pa maji nize kwa imwe.’ Yesu wakazgora kuti: ‘Zanga!’ Petrosi wakakhira mu boti na kwamba kwenda pa maji! Wakacita wofi na kwamba kubira kweni Yesu wakamuponoska.

Mukuluta kwa nyengo, Yesu wakaryeskaso ŵanthu ŵanandi. Pa nyengo iyi wakagwiliskira nchito vingwa vinkhondi na viŵiri na tusomba tucoko waka. Ndipo nga mphakwamba, pakaŵaso vyakurya vinandi vyakukwanira wose. Kasi nchakuziziswa yayi umo Yesu wakapweleleranga ŵanthu? Para wayamba kuwusa mu ufumu wa Ciuta tizamufipa mtima na cilicose yayi!

Mateyu 14:1-32; 15:29-38; Yohane 6:1-21.



Mafumbo

  • Nchinthu wuli cakofya ico cikamucitikira Yohane Mbabapatizi, ndipo Yesu wakakhwaskika wuli?
  • Kasi Yesu wakaryeska wuli ŵanthu awo ŵakamulondezga, ndipo cakurya ico cikakhalako cikaŵa cinandi wuli?
  • Cifukwa wuli ŵasambiri ŵakaŵa na wofi comene pakati pa usiku, ndipo nchivici ico cikamucitikira Petrosi?
  • Mukuluta kwa nyengo, kasi Yesu wakaryeska wuli ŵanthu masauzandi ghanandi?
  • Cifukwa wuli tizamukondwa comene para Yesu wayamba kuwusa caru nga ni Fumu ya Ciuta?

Mafumbo ghanyake

  • Ŵazgani Mateyu 14:1-32.

    Kasi nkhani iyo yikusangika pa Mateyu 14:23-32 yikulongosora kuti Petrosi wakaŵa na nkharo wuli?

    Kasi Malemba ghakulongosora wuli kuti Petrosi wakasintha na kuleka nkharo yake yakale? (Mat. 14:27-30; Yoh. 18:10; 21:7; Mil. 2:14, 37-40; 1 Pet. 5:6, 10)

  • Ŵazgani Mateyu 15:29-38.

    Kasi Yesu wakawonga wuli cakurya ico Ŵadada ŵake ŵakamupa? (Mat. 15:37; Yoh. 6:12; Kol. 3:15)

  • Ŵazgani Yohane 6:1-21.

    Kasi Ŵakhristu mazuŵa ghano ŵangalondezga wuli Yesu pa nkhani ya kucindika boma? (Yoh. 6:15; Mat. 22:21; Rom. 12:2; 13:1-4)