Vya screen reader

Sankhani chiyowoyero

Lutani pa menyu yachiŵiri

Lutani apo pali mitu ya nkhani

Lutani apo pali nkhani

Ŵakaboni ŵa Yehova

Chitumbuka

Buku Lane la Nkhani za mu Baibolo

Nkhani Nambara 86: Ŵanalume Awo Ŵakalongozgeka na Nyenyezi

Nkhani Nambara 86: Ŵanalume Awo Ŵakalongozgeka na Nyenyezi
Ŵakusanda nyenyezi

Kasi ukuyiwona nyenyezi yakuŵala comene iyo yumoza mwa ŵanalume aŵa wakuyilongora? Ŵakati ŵafuma mu Yerusalemu, nyenyezi yikawoneka. Ŵanthu aŵa ŵakafumira Kumafumiro gha dazi, mbakusanda nyenyezi. Iwo ŵakagomezga kuti nyenyezi iyi yiŵalongozgerenge ku munthu munyake wakuzirwa

Ŵanalume aŵa ŵakati ŵafika ku Yerusalemu, ŵakafumba kuti: ‘Kasi mwana uyo waŵenge fumu ya Ŵayuda wali nkhu?’ “Ŵayuda” ni zina linyake la Ŵaisrayeli. ‘Tikawona nyenyezi yake kakwamba apo tikaŵa Kumafumiro gha dazi,’ iwo ŵakayowoya ntheura, ‘ndipo tiza kuti tizakamulambire.’

Herode, uyo wakaŵa fumu mu Yerusalemu wakati wapulika mazgu agha wakakwiya comene. Wakakhumbanga yayi fumu yinyake kutora malo ghake. Mwantheura Herode wakacema ŵasofi ŵalara na kuŵafumba kuti: ‘Kasi fumu iyo yikalayizgika yibabikirenge nkhu?’ Iwo ŵakazgora kuti: ‘Baibolo likuti mu Betelehemu.’

Ntheura Herode wakacema ŵanalume ŵa Kumafumiro gha dazi na kuŵaphalira kuti: ‘Lutani mukamupenje mwana uyu. Para mwamusanga, mwize muzakanimanyiske. Nane nkhukhumba kuluta kuti nkhamulambire.’ Kweni Herode wakakhumbanga kusanga mwana uyu kuti wamukome!

Nyenyezi yikenda na kudangilira panthazi pa ŵanalume aŵa mupaka ku Betelehemu na kwimilira apo pakaŵa mwana. Ŵanalume aŵa ŵakati ŵanjira mu nyumba, ŵakasanga Mariya na Yesu. Ŵakatora vyawanangwa vyawo na kupeleka kwa Yesu. Kweni pamanyuma pake Yehova wakacenjezga ŵanalume ŵa Kumafumiro gha dazi aŵa mu loto kuti ŵaleke kuwelera kwa Herode. Ntheura ŵakenda nthowa yinyake pakuwelera ku caru ca kwawo.

Herode wakati wapulika kuti ŵanalume aŵa ŵaluta kukwawo, wakakwiya comene. Mwantheura wakalangura kuti ŵana wose ŵasepuka ŵa vilimika viŵiri kukhilira pasi ŵa ku Betelehemu ŵakomeke. Kweni Yehova wakacenjezga Yosefe mwakutendekera mu loto, ndipo Yosefe wakacimbilira ku Egupto na mbumba yake. Mukuluta kwa nyengo, Yosefe wati wapulika kuti Herode wafwa, wakatora Mariya na Yesu na kuwelera ku Nazarete. Ku Nazarete ndiko Yesu wakakulira.

Kasi ukughanaghana kuti ni njani uyo wakapangiska nyenyezi yira kuŵala? Kumbuka kuti ŵanalume ŵara pakwamba ŵakaluta dankha ku Yerusalemu ŵati ŵawona nyenyezi. Satana Dyabulosi wakakhumbanga kukoma Mwana wa Ciuta, ndipo wakamanya kuti Fumu Herode ya ku Yerusalemu yikhumbenge kumukoma. Ntheura Satana ndiyo wakwenera kuti wakapangiska nyenyezi yira kuŵala.

Mateyu 2:1-23; Mika 5:2.



Mafumbo

  • Kasi ŵanalume awo ŵali pa cithuzithuzi apa mbanjani, ndipo nchifukwa wuli yumoza wa iwo wakulongora nyenyezi iyo yikuŵala comene?
  • Cifukwa wuli Fumu Herode yikakwiya comene, ndipo yikacita vici?
  • Kasi nyenyezi yakuŵala yikaŵalongozgera nkhu ŵanalume, kweni nchifukwa wuli ŵakenda nthowa yinyake pakuwelera ku caru ca kwawo?
  • Kasi Herode wakaŵaphalira vici, ndipo cifukwa wuli?
  • Kasi Yehova wakaphalira Yosefe kuti wacite vici?
  • Ni njani uyo wakapangiska kuti nyenyezi yira yiŵare, ndipo cifukwa wuli?

Fumbo linyake

  • Ŵazgani Mateyu 2:1-23.

    Kasi Yesu wakaŵa na vilimika vilinga ndipo wakakhalanga nkhu apo ŵavinjeru ŵa kumafumiro gha dazi ŵakamucezgera? (Mat. 2:1, 11, 16)

Manyani Vinandi

Ŵakumanya vya Nyenyezi Ŵakaluta Kukawona Yesu

Chifukwa wuli nyenyezi iyo ŵakawona kumafumiro gha dazi yikadankha kuŵalongozgera kwa Herode, themba lankhaza, kufuma apo kwa Yesu?